Kaat Korintô iba
7 Jon, a bagwéha, hala kiki di gwé i mimbônga mini,+ wee di pubus bésbomede ni mam momasôna ma nhindis minsôn ni mbuu,+ inyu boñ le di bana libak lipubhaga, di konok Nyambe woñi.
2 Ni yible bés miñem minan.+ Di bi boñ bé mut nye ki nye béba, di bi ôbôs bé bilem bilam bi mut nye ki nye, di bi je bé to mut nye ki nye nseñ.+ 3 Me mpot bé hala inyu ôm bé nsohi. Inyule me bi bôk me kal le ni yé ikété miñem nwés, to di niñ, to di nwo. 4 Me gwé makénd ngandak i pot i bisu binan. Me nkônôl bé maséé ngandak. Me yé nyonok ni hogbe; me yé maséé iloo hihéga ikété njiiha yés yosôna.+
5 Ni maliga, i ngéda di bi pam i Makédônia,+ manyuu* més ma bi kôhna bé hogbe, ndi di bi ke ni bisu i nok ndutu inyule bisañ bi bé i mbégdé, woñi u bak ikété. 6 Ndi Nyambe nu a nti bôt ba nimis makénd hogbe,+ a bi ti bés hogbe ni njel mayuuga* ma Titô; 7 ha mayuuga mé ndik bé, ndi yak ni hogbe ni bi ti nye, inyule a bi kal bés le ni gwé ngôñ i tehe me, ni lelaa ni nok njôghe, ni nduña ikeñi* ni gwé inyu yem; jon me bi kônde kon maséé.
8 Inyule to ibale kaat yem+ i bi nôgha bé ndutu ñem, me ntam bé, to ibale me bi bôk me tam (hala a bé inyu ndék ngéda ndigi, kiki me bi tehe le kaat i nôgha bé ndutu), 9 nano me yé maséé, ha inyu bé le ni bi nok ndutu, ndi inyule ndutu nan i bi tinde bé i hiel miñem. Ni bi nok ndutu i nya i nlémél Nyambe, kayéle bés bé bon di bi nôgha bé ndutu. 10 Inyule ndutu ñem i nya i nlémél Nyambe i ntinde mut i hiel ñem le ndi a kôhna tohi, a nyik tam bé to hala;+ ndi ndutu ñem inoñnaga ni nkoñ ’isi i nlona nyemb. 11 Inyule nuna-ki, ndutu ni bi nok i nya i nlémél Nyambe i bi ti bé ngandak makénd. Ñ, i bi tinde bé i pubus jôl linan; ñ, i oo béba; ñ, i kon woñi; ñ, i boñ biliya bi ngui; ñ, i bana makénd; ñ, i kodol béba!+ Ikété manjel momasôna, ni bi unda le ni yé ngi nsohi* munu jam lini. 12 To hala kiki me bi tilna bé, me bi boñ bé hala inyu mut a bi boñ béba,+ to inyu mut ba bi boñ béba, ndi inyu boñ le makénd manan inyu yés ma nene i bééni ni i bisu bi Nyambe. 13 Inyu hala nyen di bi kôhna hogbe.
Ndi handugi hogbe ni bi ti bés, maséé ma Titô ma bi kônde kônha bés maséé, inyule bébobasôna ni bi ti nye makénd.* 14 Inyule ibale me bi kadba inyu nan i bisu gwé, me bi bana bé wonyuu; ndi kiki i mam momasôna di bi kal bé ma bé maliga, hala nyen yak kadba yés inyu Titô i bi ba maliga. 15 Yak gwéha ikeñi Titô a gwé inyu nan i bi kônde keñep hala kiki a nhoñol manôgla manan bébobasôna,+ ni lelaa ni bi leege nye, ni diihege nye, ni tinak nye njôôñ lipém.* 16 Me nkon maséé le me nla bôdôl bé ñem* ikété manjel momasôna.