Yérémia
13 Yéhôva a bi kal me le: “Ke somb ngôli i libadô li loñge bôñgô,* téñ yo i bôbôk, ndi u yube bañ yo ikété malép.” 2 Ha nyen me bi ke, me somb ngôli kiki Yéhôva a bi kal me, me téñ yo i bôbôk. 3 Yéhôva a pôdôs me inyu ngélé i nyônôs iba, a kal me le: 4 “Yoñ i ngôli u bi somb, i i yé we i bôbôk, u kee i lom Ufraté, u sôô yo nyoo i mbôak liaa.” 5 Jon me bi ke, me sôô yo nyoo i lom Ufraté kiki Yéhôva a bi kal me.
6 I mbus ngandak dilo, Yéhôva a kal me le: “Telep, témb i lom Ufraté, u yoñ i ngôli me bi kal we le u sôô nyoo.” 7 Me bi ke i lom Ufraté, me tém i homa me bi sôône yo, me yoñ yo; me tehe le ngôli i ñôbi; i bééna ha bé nseñ wo ki wo.
8 I mbus, Yéhôva a kal me le: 9 “Haana nyen Yéhôva a mpot : ‘Hala nyen me ga mélés ngôk u Yuda, yak ni ngandak ngôk u Yérusalem.+ 10 I bibéba bi bôt bini bi ntjél nôgôl bañga yem,+ bi nai ndik le bi mboñ jam miñem nwap mi nkal bo,+ bi mbégés banyambe bape, bi ngwélél ki bo, bi ôôbak i bisu gwap; bi ga yila kiki i ngôli ini i i gwé ha bé nseñ wo ki wo.’ 11 ‘Kiki mut a ntéñba ngôli i bôbôk, hala nyen me bi téñba litén li Israel jolisôna ni litén li Yuda jolisôna, inyu boñ le ba yila litén jem,+ yom ilam, ba boñ le jôl jem li kee ngan,+ ba boñ ki le bôt ba bégés me. Ndi ba bi nôgôl bé me.’+ Hala nyen Yéhôva a mpot.
12 “U nlama ki legel bo i nwin unu: ‘Yéhôva Nyambe nu Israel a nkal le: “Hiki hibôi hikeñi hi nlama yon ni wai.”’ Ndi ba ga timbhe we le: ‘Baa di nek le hiki hibôi hikeñi hi nlama yon ni wai?’ 13 I mbus, kal bo le: ‘Yéhôva a nkal le: “Me ga boñ le i bôt bobasôna ba nyééne munu loñ ini ba hiôô wai,+ bikiñe bi bi nyén i yééne ane i David, biprisi ni bapôdôl, yak ni bôt ba Yérusalem bobasôna. 14 Me ga leñ wada, a kwél numpe, ba bugi; me ga boñ basañ ni bon bap bôlôm nlélém,” hala nyen Yéhôva+ a mpot. “Me ga kônôl bé bo ngoo, me ga bana bé ngôô, me ga tôñ bé to bo; yom yo ki yo i ga kéñ bé me njel i tjé bo.”’+
15 Emblana, sédna ki maôô.
Ni ngôgôp bañ, inyule Yéhôva nyen a mpot.
16 Tina Yéhôva Nyambe nan lipém
ilole a nlona jiibe,
ilole makôô manan ma mbômda i dikôa, i ngéda u u nsude.
17 Ibale ni ntjél emble,
me ga ee bisôsôli inyu ngôk nan.
19 Bitison bi nwelmbok bi yé nkwéhék,* mut nu a nyibil gwo a ta bé.
Bôt ba Yuda bobasôna ba nke i minkôm, bobasôna le fet.+
20 Pa mis, béñge bôt ba nlôl i ñombok.+
Bémba ba bi ti we i yé hee, biloñge gwoñ bi mintômba?+
21 I bôt u bi yoñ ibôdôl kôba kiki bañga yoñ mawanda,
w’a boñ lelaa i ngéda ba ga lo i kogse we?+
Baa nkôôga u ga gwel bé we kiki muda nu a nsômbôl gwal?+
22 U ga badba mu ñem woñ le: ‘Inyuki i mam mana ma mpémél me?’+
Inyule u bi boñ béba ikeñi, jon ba bi héya mbot yoñ,+
ba nôgha yak bitindi gwoñ njôghe.
23 Baa man Kus* a nla héñha koo yé, tole njéé i nla héñha maton mé?+
Ibale hala, wee yak bé ni nla boñ loñge,
bé ba ni meya ni mboñ béba.
24 Jon me ga sand bé kiki mbebi ñoñ i nsand minumuk mi bikai.+
25 I jam lini jon me ga boñ we, i ngaba ini yon me ga ti we,” hala nyen Yéhôva a mpot,
26 Inyu hala nyen me ga pa mbot yoñ, i hô we su,
hison hioñ hi ga nene,+
27 ndéñg yoñ,+ ngôñ yoñ malal,
ni libambe joñ li nyega.
Ngoo ni we, a Yérusalem!
W’a ba nyega letee ni ngéda mbe?”+