Kaat Matéô

19 I ngéda Yésu a bi mal pot mam mana, a nyodi i Galiléa, a ke bebee ni minwaa mi nkoñ u Yudéa, nyoo uu nwii u Yordan.+ 2 Yak mamut makeñi ma noñ nye, nyoo nyen a mélés ki makon map.

3 Yak Farisai i lo i nyeni inyu noode nye, i bat le: “Baa i yé mut kunde i bos ni nwaa wé to inyu imbe njom?”+ 4 Yésu a timbhe le: “Baa ni bi añ bé le nu a bi hek bo i bibôdle, a hek bo munlôm ni muda,+ 5 a kal ki le: ‘Inyu hala nyen munlôm a’ yék isañ bo nyañ, a adbe ni nwaa wé kayéle bo iba b’a ba nsôn wada’?+ 6 Kayéle ba ta ha bé iba ndi nsôn wada. Jon, jam Nyambe a ñat,* mut nye ki nye a bagal bañ jo.”+ 7 Farisai i kal nye le: “Inyuki ni Môsi a bi bat le mut a ti nwaa kaat inyu mélés libii i ngéda a mbos ni nye?”+ 8 A kal bo le: “Inyu minledek minan mi miñem nyen Môsi a bi nwas le ni bos ni baa banan,+ ndi hala bé nyen mam ma bé i bibôdle.+ 9 Me nkal bé le nu ni nu a mbos ni nwaa wé, handugi inyu malal ma nyega,* ndi a bii muda numpe, wee a nke i ndéñg.”+

10 Banigil ba kal nye le: “Ibale hala nyen munlôm a nlama niñ ni nwaa wé, wee nseñ u ta bé i biiba.” 11 A kal bo le: “Bôt bobasôna bé bon ba neebe i jam li, ndi ndik i bet ba gwé likébla.*+ 12 Inyule bôt ba yé nwak* le ba bi gwéé hala, bape ba yé nwak le bôt bon ba bi yilha bo nwak, bape ki ba yé nwak inyule ba bi yilha bomede nwak inyu Ane ngii. I mut a nla neebe i jam li, a neebe jo.”+

13 I mbus, ba lona nye boñge batitigi inyu boñ le a kéhi moo i ngii yap, a soohe ki inyu yap, ndi banigil bé ba nyéyéi bo.+ 14 Ndi Yésu a kal le: “Nwaha boñge batitigi nwee, ni noode bañ to kéñ bo njel i lo i meeni inyule Ane ngii i yé inyu bôt ba yé kiki bo.”+ 15 Ha nyen a bi kéhi moo i ngii yap; i mbus, a nyodi ha.

16 Ndi nuna-ki, mut wada a lo i nyeni, a kal le: “A Lét, imbe loñge me nlama boñ inyu kôhna niñ boga?”+ 17 A kal nye le: “Inyuki u mbat me kii i yé loñge? Wada ndik nyen a yé loñge.*+ Ndi ibale u nsômbôl kôhna niñ, nôgôl mambén ibabé waa.”+ 18 I mut nu a kal nye le: “Mambe?” Yésu a kal le: “U nlama bé nol mut,+ u nlama bé ke i ndéñg,+ u nlama bé nip,+ u nlama bé bok mbôgi bitembee,+ 19 ti isoñ bo nyuñ lipém,+ u nlama ki gwés mut woñ libôk kiki wemede.”+ 20 Mañge wanda a kal nye le: “Me bi tééda i mambén ma momasôna; kii ipe me nlama boñ?” 21 Yésu a kal nye le: “Ibale u nsômbôl ba peles,* ke nuñul gwom gwoñ gwobisôna, u ti diyeyeba, ha nyen w’a bana nkus i ngii;+ i mbus, loo, u noñ me.”+ 22 I ngéda mañge wanda a bi nok hala, a ke a modop inyule a bééna ngandak lingwañ.+ 23 Ha nyen Yésu a kal banigil bé le: “Me nkal bé maliga le, y’a ba ndutu le ngwañ mut u jôp ikété Ane ngii.+ 24 Me nkal ki bé le, hala a yé jam li ntomb le kamél i sooma i lituba li ndondok, iloole ngwañ mut u jôp i Ane Nyambe.”+

25 I ngéda banigil ba bi nok hala, ba hel ngandak, ba kal le: “Njee ni a nla toi kôhna tohi?”+ 26 Kiki a nun bo siim, Yésu a kal bo le: “Bôt ba binam ba nla yaga bé boñ hala, ndi Nyambe a nla boñ mam momasôna.”+

27 Ha nyen Pétrô a bi timbhe, a kal le: “Nun-ki, di bi yék mam momasôna, di noñ we; bés d’a bana ni kii?”+ 28 Yésu a kal bo le: “Me nkal bé maliga le, i ngéda mam momasôna ma ntémb yondo, i ngéda Man mut a’ yén ikété lipém i yééne yé Ane, bé ba ni bi noñ me n’a yén i 12 biyééne bi Ane, ni kéés ki 12 matén ma Israel.+ 29 Ni le hiki mut nu a bi yék mandap, to lôkisañ i bôlôm tole i bôda, to isañ, to nyañ, to bon, to disi i jôl jem a’ kôhna hala mbôgôl ngélé, a kôdôl ki niñ boga.+

30 “Ndi ngandak i i yé bôt ba bisu y’a ba bôt ba nsôk, ndi ba ba nsôk b’a ba bôt ba bisu.+