Yésu a ntimbhe ngwañ mañge wanda

Yésu a yé tagbe Péréa, inyu ke i Yérusalem. Ngwañ mañge wanda i nlo ngwéé i kwo nye makôô. I mañge wanda nu a yé “ñéga wada,” i ndap bibégés tole wada mu Ntôñ bakéés bakeñi. A mbat le: “A loñge Malét, kii me nlama boñ inyu kôhna niñ boga?”​—Lukas 8:41; 18:18; 24:20.

Yésu a ntimbhe le: “Inyuki u nsébél me le loñge? Mut to wada a ta bé loñge, ndik Nyambe nyetama.” I nene le i mañge wanda nunu a ngwélél i buk ini le “loñge” kiki ngim tel ba mbéna gwélél inyu sébél baéga bibase. To hala kiki Yésu a niiga loñge, a nyis mut nu le buk ini le “loñge” i yé ngim tel ni le Djob nyetama nyen a kôli ni yo.

Yésu a nti nye mana maéba, a nkal nye le: “Ndi ibale u nsômbôl kôhna niñ, nôgôl mambén ibabé waa.” Ndi mañge wanda a mbat le: “Mambe?” Yésu a nsima mambén matan ikété jôm li mambén ma ma bé béñge manola, ndéñg, wip, mbôgi bitembee, lôñni lipém ba nlama ti bagwal. A nkônde mbén ipe i nlôôha ba nseñ i ngéda a kal le: “Gwés mut woñ libôk kiki wemede.”​—Matéô 19:17-19.

Mañge wanda a ntimbhe le: “Me bi nôgôl momasôna; kii ipe me nlama boñ?” (Matéô 19:20) Bebek a nhoñol le a nlama boñ jam lilam ni li hélha inyu kôhna niñ boga. Kiki Yésu a ntehe le mut nunu a yé toi maliga, a nôgda ‘gwéha inyu yé.’ (Markô 10:21) Ndi, ngim jam i ngi kéñék nye.

Kiki mut a tiñi ni nkus wé, Yésu a nkal nye le: “Jam jada li ngi hañak we: Ke nuñul gwom gwobisôna u gwé, u ti diyeyeba, ha nyen w’a bana nkus i ngii; i mbus, lo, u noñ me.” Ñ, mut nu a nla kap moni nwé a ti nwo diyeyeba di di nla bé timbhe nye, i mbus a yila nnigil Yésu. Ndi Yésu a nkônôl nye ngoo mu kiki a ntehe nye a nke ni nkañak su. I mut nunu a tiñi ni “ngandak lingwañ” a gwé, gwom a gwé bi mboñ nye le a tehe bañ bañga nkus i yé nye bisu. (Markô 10:21, 22) Yésu a nkal le: “Hala a’ ba ndutu inyu bôt ba gwé moni i jôp i Ane Nyambe!”​—Lukas 18:24.

Bibuk bi Yésu bini bi nhélés banigil bé, yak jam a nke kal hanano: “I pot maliga, hala a yé jam li ntomb le kamél i sooma ikété lituba li ndondok kôñôl, iloole ngwañ mut u jôp i Ane Nyambe.” Hala a ntinde banigil i bat nye le: “Njee ni a yé le a kôhna tohi?” Baa tohi i nlôôha ndutu kayéle mut binam a nla bé kôhna yo? Yésu a mbéñge bo i mbombom, a kal le: “I mam bôt ba binam ba nla bé boñ, Nyambe a nla boñ mo.”​—Lukas 18:25-27.

Pétrô a nkal Yésu le bo ba nyoñ makidik ma yé maselna ni ma ngwañ mut, a nkal le: “Nun-ki! Di bi yék mam momasôna, di noñ we; bés d’a bana ni kii?” Yésu a mpôdôl bibom bi mbem bo, a nkal le: “I ngéda mam momasôna ma ntémb yondo, kiki Man mut a’ yén ikété lipém i yééne yé Ane, bé ba ni bi noñ me n’a yén i jôm li biyééne bi Ane ni biba, ni kéés ki jôm li matén ma Israel ni ima.”​—Matéô 19:27, 28.

I pot maliga, Yésu a yé hoñol i ngéda mam ma ga ba hana isi kiki ma bé i wom Éden i ngéda bisu. Pétrô ni banigil bape ba ga bana bisai i énél ni Yésu i Paradis i ga ba hana isi, i bom i, i nloo yaga bisesema gwobisôna ba nla boñ!

Ndi bisai bi ta ndik bé inyu dilo di nlo. Banigil ba Yésu ba yé kôhna ngim bisai nano. Yésu a nkal le: “Mut nye ki nye a ta bé, nu a bi yék bo ndap, bo nwaa, bo lôkisañ, bo bagwal, bo bon inyu Ane Nyambe, nu a’ kôhna bé i mam ma ngandak ngélé munu ngéda ini; ndi i hiai hi nlo, a kôhna ki niñ boga.”​—Lukas 18:29, 30.

Maliga ma yé le, to hee banigil bé ba ga kee, b’a bana maada malam ni bagwélél ba Djob bape, maada ma ma yé mahee, ma nlel ma ba nla bana ni bôt bap ba lihaa. Ndi béba jam i yé le, njohok ngwañ mut u yé bebee i nimis bisai bini, a yé ki bebee i nimis pôla a gwé i kôdôl Ane Djob i ngii.

Yésu a nkônde le: “Ndi ngandak i i yé bôt ba bisu y’a ba bôt ba nsôk, yak ba ba nsôk b’a ba bôt ba bisu.” (Matéô 19:30) Kii a nsômbôl kal?

Njohok mut u yé ikété nsoñgi u “bôt ba bisu” mu kiki a yé ipôla bakena ba Lôk Yuda. Kiki mut a noñ mambén ma Djob, ba mbémél nye ngandak. Ndi nye a mpohol i bii lingwañ jé kiki jam li bisu i niñ yé. Maselna ni hala, inyu bôt ba litén, biniigana bi Yésu bi yé maliga, bi yé ki njel i nkena i niñ. Di yé le di kal le, bon ba yé “ba ba nsôk.” Ndi nano, ba yé yila “bôt ba bisu.” Ba nla bana botñem i yén biyééne bi ane ni Yésu i ngii inyu énél i Paradis hana isi.