Yérémia
16 Yéhôva a bi témb a kal me le: 2 “U nlama bé bii nwaa, u nlama bé bana bon bôlôm to bon bôda hana homa nunu. 3 Inyule haana nyen Yéhôva a nkal inyu bon bôlôm ni bon bôda ba ba ngwéé hana, inyu banyañ bap ba ba ngwal bo, ni inyu basañ bap ba ba bi boñ le ba gwéé munu loñ ini: 4 ‘Makon ma ga nol bo,+ ndi mut to wada a ga ee bé bo, to jô bo; ba ga yila kiki binan hana ’isi.+ Yak pansoñ ni njal bi ga nol bo,+ mim nwap mi ga yila bijek bi dinuni di ngii ni binuga bi bikai.’
5 Yéhôva a nkal le:
‘U jôp bañ i ndap, i het bôt ba nje bijek bi maéya,
u ke bañ i ee nyoo, to i hôgbaha bôt.’+
‘Inyule me nhéya nsañ wem munu litén lini,’ hala nyen Yéhôva a mpot,
6 Bañga bôt ni diyeyeba ba ga wo munu loñ ini.
7 Mut nye ki nye a ga ti bé i bôt ba nkôs maéya bijek,
i hôgbaha bo inyule ba nimis bôt bap;
mut nye ki nye a ga ti bé bo to libôndô li wai le ba nyo,
i hôgbaha bo inyu nyemb i basañ bap tole banyañ bap.
8 U jôp bañ i ndap ngand,
u yén bañ ni bo i je ni i nyo.’
9 “Haana nyen Yéhôva nu mintôñ mi gwét, Nyambe nu Israel, a nkal: ‘Me ga mélés maséé ni diléla hana homa nunu, ni kiñ i munlôm nu a mbii muda, yak ni kiñ i muda nu a nke libii;+ m’a boñ hala, ni bak ni ngi yii i niñ, ni tehge.’
10 “I ngéda w’a añle litén lini bibañga bini gwobisôna, ba ga bat we le: ‘Inyuki Yéhôva a nkal le bikuu bikeñi bini gwobisôna bi ga kwél bés? Imbe béba tole limbe jam libe di mboñ Yéhôva Nyambe wés?’+ 11 U nlama timbhe bo le: ‘“Inyule basôgôlsôgôl banan ba bi tjôô me,”+ hala nyen Yéhôva a mpot, “ba bi nôgôl banyambe bape, ba bi bégés bo, ba ôôp ki i bisu gwap.+ Ndi me, ba bi tjôô me, ba bi nôgôl bé mbén yem.+ 12 Ndi bé ni mboñ béba iloo basôgôlsôgôl banan,+ hiki wada nan a nai ndigi i boñ jam ñem wé mbe u ntinde nye i boñ, iloole a nôgôl me.+ 13 Jon me ga héya bé munu loñ ini, me leñ bé i loñ ni nyi bé,+ to bé to basôgôlsôgôl banan, n’a bégés banyambe bape juu ni njamuha,+ inyule m’a kônôl bé bé ngoo.”’
14 “‘Ndi dilo di ga lo,’ hala nyen Yéhôva a mpot, ‘ba ga kal ha bé le: “Me nkum soñ ni niñ i Yéhôva nu a bi héya litén li Israel i loñ Égiptô!”+ 15 Ndi ba ga kal le: “Me nkum soñ ni niñ i Yéhôva nu a bi héya litén li Israel i loñ ñombok ni i biloñ gwobisôna a bi sand bo!” Me ga témbna bo i loñ yap, i me bi ti basôgôlsôgôl bap.’+
16 ‘Me yé i om le ba sébél ngandak balop tjobi,’ hala nyen Yéhôva a mpot,
‘ba ga lop bo.
I mbus hala, me ga om le ba sébél ngandak bôt ba nsômbi,
ba ga noñ bo i ngii hiki hikôa ni hiki homa a nyôgi,
yak ni i bihôk bi maaa.
17 Inyule mis mem ma ntehe mam momasôna ba mboñ.*
Ma sôli bé i bisu gwem,
to béba yap i sôli bé i mis mem.
18 Me ga bôk ndugi me kogse bo i nya i kôli inyu liboñok jap libe ni béba yap,+
inyule ba bi hindis loñ yem ni biôñgba bi banyambe bap ba nyega ba ba niñ bé,*
ba yônôs ki ngababum yem ni mam map ma ma nhindha me ñem.’”+
19 A Yéhôva, ngui yem ni lisolbene jem,
homa me nla solop i ngéda me nke njiiha ngwéé,+
biloñ bi ga nyodi i masuk ma ’isi inyu lo i weeni,
bi ga kal le: “Basôgôlsôgôl bés ba bi kôdôl ndigi bitembee,
gwom bi bi yé yañga, bi bi gwé bé nseñ wo ki wo.”+
20 Baa mut binam a nla bañ banyambe inyu yé nyemede?
To ibale a mboñ hala, banyambe toi bé ba!+
21 “Jon me ga ti bo yi,
i lisañ lini, me ga éba bo ngui yem ni lipémba jem,
ba ga yi le jôl jem le Yéhôva.”