Kaat Yôhanes

20 I hilo hi bisu hi sonde, Maria Magdaléna a pule i soñ* i ngéda jiibe li bé li ngi yii,+ a tehe le ba mal héya ngok i soñ.*+ 2 Ha nyen a bi ke ngwéé yak Simôn Pétrô bo nuu nnigil numpe Yésu a bé gwés,+ a kal bo le: “Ba nhéya mim u Nwet ikété soñ,+ di nyi bé hee ba niñne wo.”

3 Ha nyen Pétrô ni nuu nnigil numpe ba bi pam inyu ke i soñ. 4 Bo iba ba bôdôl ôt ngwéé lôñ, ndi nuu nnigil numpe a ke ngwéé iloo Pétrô, a ba mut bisu i pam i soñ. 5 Kiki a nsedep, a tehe loñge mboñ i yé ha ’isi,+ ndi a bi jôp bé ikété soñ. 6 Yak Simôn Pétrô nu a bé noñ nye a lo, a jôp ikété soñ. A tehe loñge mboñ i yé ha ’isi. 7 I mboñ u bé Yésu i ño u bé bé ni unu mboñ umpe, ndi wotama u bé nhôdôk wé homa. 8 Ha nyen yak nuu nnigil numpe, nu a bé mut bisu i pam i soñ, a jôp, a tehe, yak nye a hémle. 9 Inyule ba bé ngi nok tilna i nkal le a nlama tuge ikété bawoga.+ 10 I mbus hala, banigil ba témb i mandap map.

11 Ndi Maria a bi yégle a téé ha mbégdé, bebee ni soñ, a eek. Kiki a bé ee, a sedep inyu béñge ikété soñ, 12 a tehe biañgel biba+ bi hééba bipuba bi mambot, bi bak bi yii i homa ba bi niñne mim u Yésu; añgel yada i bé i yii i homa ño u bé, ipe i bak i homa makôô ma bé. 13 Ha nyen bi bi bat nye le: “A muda, inyuki u ñee?” A timbhe le: “Ba nkena mim u Nwet wem, me nyi bé hee ba niñne wo.” 14 Kiki a mal pot hala, a hielba, a tehe Yésu a téé ha, ndi a yi bé le Yésu nu.+ 15 Yésu a bat nye le: “A muda, inyuki u ñee? Njee u nyéñ?” Kiki a bé hoñol le nsalnwom u mbônji nu, a kal nye le: “A Nwet, ibale wen u nhéya mim, kal me hee u mbiine wo le me kee me yoñ wo.” 16 Yésu a kal nye le: “A Maria!” Kiki Maria a nhielba, a kal Yésu ni hop Lôk Héber le: “Rabôni!” (hala a nkobla le: “A Lét!”) 17 Yésu a kal nye le: “Waa kabda me inyule me yé ngi bet yak Tata. Ndi kee yak lôktata,+ kal bo le: ‘Me yé i bet yak Tata wem+ ni Isoñ nan, yak Nyambe wem ni Nyambe nan.’”+ 18 Maria Magdaléna a ke, a legel banigil nwin le: “Me ntehe Nwet!” A añle ki bo i mam Nwet a bi kal nye.+

19 Kiki kôkôa i bi kwo i kel i, hala wee i kel bisu i sonde, makôga ma homa banigil ba bé ma bé nyibik inyule ba bé kon Lôk Yuda woñi; ha nyen Yésu a bi lo, a telep i ñemkété wap, a kal bo le: “Nsañ u ba ni bé.”+ 20 Kiki a mal pot hala, a unda bo moo mé ni mbai yé.+ Ha nyen banigil ba bi kon maséé le ba ntehe Nwet.+ 21 Yésu a témb a kal bo le: “Nsañ u ba ni bé.+ Me yé i ep bé+ ndik kiki Tata a bi ep me.”+ 22 Kiki a mal pot hala, a hue i ngii yap, a kal bo le: “Ni kôhna mbuu mpubi.+ 23 Hiki mut n’a nwéhél bibéba, wee ba mal nwéhél nye gwo; ndi hiki mut n’a nwéhél bé bibéba, wee ba nwéhél bé nye gwo.”

24 Ndi Tômas,+ wada ikété jôm ni iba, nu ba nsébél ki le Lihas, a bé bé lôñni bo i ngéda Yésu a bi lo. 25 Jon bana banigil bape ba bi kal nye le: “Di ntehe Nwet!” Ndi a kal bo le: “Ibale me ntehe bé ndôndôô i batone i moo mé, me ha bé to hinoo hiem mu ndôndôô i batone, me ha bé to woo wem i mbai yé,+ me yé mbén i hémle.”

26 Dilo juem i mbus hala, banigil ba témb ba kodba ikété ndap, yak Tômas a bé lôñni bo. To hala kiki makôga ma bé nkwéhék, Yésu a lo, a telep bo i ñemkété, a kal le: “Nsañ u ba ni bé.”+ 27 I mbus ha, a kal Tômas le: “Ha hinoo hioñ hana, béñge yak moo mem, sambal ki woo woñ, u ha wo i mbai yem le ndi u waa pééna,* u hémle ki.” 28 Tômas a timbhe nye le: “A Nwet wem ni Nyambe wem!” 29 Yésu a kal nye le: “Baa u nhémle inyule u ntehe me? Maséé ma yé ni ba ba nhémle bo ngi tehe.”

30 Ibabé pééna, Yésu a bi boñ ngandak bihélha bi mam ipe i bisu bi banigil bé, bi bi ta bé ntilga munu nhôôk kaat unu.+ 31 Ndi mana mam ma yé ntilga inyu boñ le ni hémle le Yésu nyen a yé Kristô, Man Nyambe; kayéle ni njel i hémle ini, ni bana niñ i jôl jé.+