Yésu a ntuge, a mpémél ngandak bôt

I kel Sonde, hilo 16 hi sôñ Nisan, banigil ba yé nhelek. Ba nyi bé inyuki soñ i yé hôlô. (Matéô 28:9, 10; Lukas 24:11) I mbus ngéda i nlélém kel, Kléôpa ni nnigil numpe ba nyodi i Yérusalem inyu ke i Émaus nu a yé i 11 kilôméta.

Mu njel, ba mpôdôl inyu mam ma ntagbe. Nkén mut a nkoba bo, a mbôdôl bat bo le: “Mambe mam ni yé i kwélél hala i njel?” Ndi Kléôpa a ntimbhe nye le: “Baa u yé nkén mut? Lelaa ni u niñ i Yérusalem ndi u nyi bé i mam ma ntagbe munu dilo dini?” Nkén mut a bat bo le: “Mambe mam?”​—Lukas 24:17-19.

Ba ntimbhe nye le: “I mam ma mbéñge Yésu mut Nasaret,  . . . Di bééna botñem le i mut nu nyen a lam-ga tohol Israel.”​—Lukas 24:19-21.

Kléôpa ni nuu nigil numpe ba mbôdôl toñle nye mam ma ntagbe kel i. Ba nkal le bôda iba ba bak i soñ, ba nkoba yo hôlô, ba ntehe ki bihélha bi mam: Biañgel bi mpémél bo, bi nkal bo le Yésu a yé niñ. Banigil ba nyigye le bôt bape ba bé ki i soñ, “ba koba yo kiki bôda ba bak ba kal.”​—Lukas 24:24.

I pot maliga, banigil ba nyi bé kii hala a nkobla. Ni ngandak makénd, nkén mut a nkodol litehge jap libe li li nlona bo ndutu ñem. A nkal bo le: “A bé ba ni nyéñ bé hek pék, miñem minan mi tiñhaga ki hémle mam momasôna bapôdôl ba bi pot! Baa i bé bé nseñ le Kristô a nok ndutu inyu mam mana le ndi a jôp i lipém jé?” (Lukas 24:25, 26) I mbus, a ntoñle bo ngandak minlôñ mi Bitilna mi mi mpôdôl inyu Kristô.

I mbus ngéda, bo baa ba mbol bebee ni Émaus. Banigil boba ba nsômbôl kônde emble nkén mut, jon ba mbat nye le: “Yén ni bés, inyule kôkôa i nkwo, yak u u yé bebee ni sude.” A neebe yén, ni i je ni bo. Ngéda nkén mut a nsoohe, a bôk bret, a ti bo, ha nyen ba nyi le Yésu nu, ndi Yésu a nyoi kunda yada. (Lukas 24:29-31) Nano ba yé nkwoog nkaa le Yésu a ntuge!

Ni maséé, banigil ba nkalna bo ni bo le: “Baa hala a bak nga a tihba miñem nwés ngéda a pôdhak bés mu nloñ, a tiblak toñle bés Bitilna?” (Lukas 24:32) Ba mpala témb i Yérusalem i het ba nkoba baôma ni bôt bape ba ba kôdi. Ilole Kléôpa ni mut bo nye ba nkiha ba laa toñol jam li mpémél bo, i bôt ba yé ha ba nkal bo le: “Ibabé pééna, Nwet a ntuge, a mpémél Simôn!” (Lukas 24:34) I mbus, yak banigil bo iba ba ntoñol kiki Yésu a mpémél bo. Ñ, yak bomede ba yé mbôgi.

Kunda yada, Yésu a mpémél bo mu ndap! Bobasôna ba yé nhelek inyule mu kiki ba nkon Lôk Yuda woñi, makôga ma yé nkwéhék. Ndi nano, Yésu a yé ha i ñemkété wap. Ni nwee nyensôna, a nkal bo le: “Nsañ u ba ni bé.” Ndi ba nkon woñi. Kiki ba bi boñ nwii i bi tagbe, ‘ba nhoñol le ba yé i tehe añgel.’​—Lukas 24:36, 37; Matéô 14:25-27.

Inyu kwés bo nkaa le ba ta bé tehe yiinda, tole ba ta bé emel, ndi, le nyemede nu ni nyuu yé minsôn, Yésu a ñunda bo moo mé ni makôô mé, a kal bo le: “Inyuki ni nkon woñi? Inyuki ni mpééna mu miñem minan? Ni béñge moo mem ni makôô mem, memede nu; tihbana me inyu tehe, inyule añgel i gwé bé minsôn to bihés kiki ni yé i tehe i meeni.” (Lukas 24:36-39) Maséé ma nlo nol banigil, ba yé ki nhelek, ndi bahogi ba nginda gwé pééna.

Inyu kônde hôla bo i tehe le nye toi nu, Yésu a mbat bo le: “Baa ni gwé yom je hana?” A nyoñ két mbômôk hiobi a je yo. I mbus, a kal le: “Bibañga gwem bini gwon me bi kal bé ngéda me bé me ngi yii lôñni bé, le i mam momasôna ma yé ntilga ikété Mbén Môsi ni Bapôdôl ni Tjémbi ma nlama yon.”​—Lukas 24:41-44.

Yésu a nhôla Kléôpa ni mut bo nye ba bé kiha i tibil nok Bitilna, nano a mboñ nlélém inyu ba bobasôna ba kôdi ha, a nkal bo le: “I yé ntilga le: Kristô a nlama nok ndutu, a tuge ikété bawoga i hilo hi nyônôs daa, ni le b’a añal ki ikété biloñ gwobisôna le bôt ba nlama tam bibéba inyu kôhna nwéhél i jôl jé; nson unu w’a bôdle i Yésusalem. Ni nlama ba mbôñ i mam mana.”​—Lukas 24:46-48.

Inyu ngim njom i di nyi bé, ñôma Tômas a ta bé ha. I dilo di noñ, ni maséé ba nkal nye le: “Di ntehe Nwet!” Di Tômas a ntimbhe le: “Ibale me ntehe bé ndôndôô i batone i moo mé, me ha bé to hinoo hiem mu ndôndôô i batone, me ha bé to woo wem i mbai yé, me yé mbén i hémle.”​—Yôhanes 20:25.

I mbus dilo juem, banigil ba ntiimba kodba, makôga nkwéhék, ndi yak Tômas a yé ha. Yésu a mpam ipôla yap ni nyuu minsôn, a nyéga bo, a kal le: “Nsañ u ba ni bé.” Yésu a mbéñge Tômas, a kal nye le: “Ha hinoo hioñ hana, béñge yak moo mem, sambal ki woo woñ, u ha wo hana mbai yem le ndi u waa pééna, u hémle.” Tômas a timbhe nye le: “A Nwet wem, ni Nyambe wem!” (Yôhanes 20:26-28) Jon, Tômas a gwé ha bé pééna yo ki yo le Yésu a yé niñ. A nkal le “Nyambe wem,” inyu kal le Yésu a yé “ngim nyambe,” hala wee nu bañga Nyambe le Yéhôva a ñom.

Yésu a nkal le: “Baa u nhémle inyule u ntehe me? Maséé ma yé ni ba ba nhémle bo ngi tehe.”​—Yôhanes 20:29.