Yérémia
11 I bibañga bini gwon Yéhôva a bi kal Yérémia: 2 “A bôt ba litén, emblana bibañga bi malômbla mana!
“Kal* gwo bôt ba Yuda ni bôt ba nyééne i Yérusalem, 3 añle bo le: ‘Haana nyen Yéhôva, Nyambe nu Israel a mpot: “Tiihe tiihe ni mut nu a nôgôl bé bibañga bi malômbla mana+ 4 me bi ti basôgôlsôgôl banan i ngéda me bi héya bo i loñ Égiptô,+ i juu li li nyimbi kei,*+ me kal bo le: ‘Nôglana me, ni boñ ki i mam momasôna me nkal bé, ha nyen n’a yila litén jem, yak me me yila Nyambe nan,+ 5 inyu boñ le me yônôs likak me bi ti basôgôlsôgôl banan inyu ti bo loñ i i nkuli milik ni wéi,+ kiki i yé i len ini.’”’”
Ha nyen me bi timbhe le: “Amen* a Yéhôva.”
6 I mbus, Yéhôva a témb a kal me le: “Añal bibañga bini gwobisôna i bitison bi Yuda ni i minloñ mi Yérusalem: ‘Emblana bibañga bi malômbla mana, ni nôgôl ki gwo. 7 Inyule me bi yoñ ngéda i béhe basôgôlsôgôl banan ibôdôl i kel me bi nyodna bo i loñ Égiptô letee ni len, me bé béhe bo, béhe ni béhe* le: “Nôglana me.”+ 8 Ndi ba bi emble bé me, ba bi sédi bé to maôô; hiki wada wap a bi nai ndik le a mboñ mam mabe ñem wé u ntinde nye i boñ.+ Jon me bi boñ le i mam momasôna me bi pot munu malômbla mana ba bi tjél nôgôl, ma kwél bo.’”
9 I mbus, Yéhôva a kal me le: “Bôt ba Yuda ni bôt ba nyééne i Yérusalem ba njubul me i jimb. 10 Ba bi nigle bibéba basôgôlsôgôl bap ba bi boñ i ngéda kôba, ba ba bi tjél nôgôl bibañga gwem.+ Yak bo ba kahal bégés banyambe bape, ba gwéélak ki bo.+ Bôt ba litén li Israel ni bôt ba litén li Yuda ba bi bôk malômbla mem me bi boñ ni basôgôlsôgôl bap.+ 11 Inyu hala nyen Yéhôva a nkal le: ‘Me ga lona bo bikuu,+ ba ga pei bé gwo. I ngéda ba ga lôndôl me le me hôla bo, me ga emble bé bo.+ 12 Ha nyen bôt ba nyééne i bitison bi Yuda ni i Yérusalem ba ga ke i bat banyambe ba ba nsémél bisesema* mahôla,+ ndi to banyambe ba, ba ga la bé sôñ bo i ngéda bikuu bi ga lo. 13 Inyule banyambe boñ ba mbôl kiki bitison gwoñ, a Yuda; kiki nsoñgi u minloñ mi Yérusalem u yé, hala nyen u ñôñôl yom i nwéhna nyuu* ngandak muu ma bisesema. Ñ, muu inyu sémél Baal bisesema.’+
14 “Ndi we,* u soohe bañ inyu litén lini. U lôndôl bañ me inyu yap, u soohene bañ to bo,+ inyule me ga emble bé i ngéda ba mba ba nlôndôl me inyule bikuu bi yé i kwél bo.
15 Baa litén jem me ngwés li kôli ki yén ikété ndap yem,
ndi ki le ba yé ngandak i hek bipék bibe?
Baa ba nla kéñ bikuu njel le bi kwél bañ we* inyule ba nti nuga ipubhaga?*
Ha ngéda i, baa ba ga kon maséé?
16 Yéhôva a bé sébél we le, loñge e ôlivé,
i i gwé matam malam.
A mbam, a nligis i e i,
ba bôk ki mintjep nwé.
17 “Yéhôva nu mintôñ mi gwét, Nu a bi bel we,+ a nkal le bikuu bi ga kwél we, a litén li Yuda, inyu mam mabe we ni litén li Israel ni bi boñ; inyule ni bi unbaha me i ngéda ni bi sémél Baal bisesema.”+
18 “A Yéhôva, u bi yis me i mam ma bé tagbe;
ha ngéda i, u bi boñ me le me yi i mam ba bé boñ.
19 Me bé kiki man ntômba nu ba nke i nol, ndi a yén nwee.
Me bé yi bé le ba njubul me i jimb,+ ba kalak le:
“Di tjé e ni matam mé,
di héya nye i loñ i bayômi,
inyu boñ le mut a bigda ha bañ jôl jé kekikel.”
Boñ le me tehe mapuna moñ i ngéda u ga kogse bo,
inyule me bi bii hop wem i moo moñ.
21 Haana nyen Yéhôva a mpot inyu bôt ba Anatôt+ ba ba nyéñ nol we, ba kalak le: “U pot ha bañ i jôl li Yéhôva,+ tiga le di nol we;” 22 jon Yéhôva nu mintôñ mi gwét a nkal le: “M’a kéés bo. Pansoñ i ga nol boñge ba wanda,+ njal i nol bon bap bôlôm ni bon bap bôda.+ 23 Mut to wada ikété yap a ga pei bé, inyule me ga boñ le bikuu bi kwél bôt ba Anatôt+ i nwii me ga kéés bo.”