Yérémia

40 Yéhôva a bi pôdôs Yérémia i ngéda Nébusaradan,+ ñane batat kiñe, a bi nwas nye le a nyodi i Rama.+ Nébusaradan a bi bôk a kena Yérémia nyoo i tison i, a kañ nye minsañ i moo; Yérémia a bé ni bôt ba Yérusalem lôñni bôt ba Yuda ba ba bé ke i minkôm i Babilôn. 2 Ñane batat kiñe a bi sébél Yérémia, a kal nye le: “Yéhôva Nyambe woñ a bi bôk a legel le bikuu bini bi ga kwél i homa nunu. 3 Yéhôva a bi lona ki bikuu bi kiki a bi pot, inyule ni bi boñ béba i mis ma Yéhôva, ni bi nôgôl bé nye. Inyu hala nyen i mam mana ma mpémél bé.+ 4 I len ini, me nhéya we minsañ i moo. Ibale u ngwés ke lôñni me i Babilôn, di kenek, m’a tééda we loñge. Ndi ibale u ngwés bé ke lôñni me i Babilôn, yéglege! Nun-ki! Loñ yosôna i yé i bisu gwoñ. U nla ke to hee u ngwés.”+

5 Kiki Yérémia a bé yi bé i jam a boñ, Nébusaradan a kal nye le: “Témb yak Gédalia,+ man Ahikam,+ man Safan,+ nu kiñe Babilôn i bi téé ñane bitison bi Yuda, yén lôñni nye ipôla bôt ba litén; tole kenek to hee u ngwés.”

Ñane batat kiñe a ti nye bijek, a ti ki nye likébla, a nwas nye le a kenek. 6 Yérémia a bi ke yak Gédalia man Ahikam i Mizpa,+ a yén lôñni nye ipôla bôt ba litén ba ba bi yégle mu loñ.

7 I mbus ngéda, baane ba mintôñ mi gwét bobasôna lôñni bôt bap ba gwét, ba ba bé mu loñ, ba nok le kiñe Babilôn i ntéé Gédalia man Ahikam ñane loñ, yak diyeyeba di bôt ba loñ, di ba bi kena bé i minkôm i Babilôn,+ bôlôm, bôda ni boñge, a bii i diyeyeba di isi énél i Gédalia. 8 I baane bana ba lo i tehe Gédalia i Mizpa.+ Môl map mana: Ismael+ man Nétania; Yôhanan+ ni Yônatan, bon ba Karéa; Séraya man Tanhumet, bon ba Éfai mut Nétôfa; ni Yaazania+ man mut Maaka; ba bi lo ni bôt bap ba gwét. 9 Gédalia, man Ahikam, man Safan, a boñ malômbla ni baane bana, yak ni bôt bap ba gwét, a kal bo le: “Ni kon bañ woñi i gwélél bôt ba Kaldéa. Yéna mu loñ, ni gwélél kiñe Babilôn, inyu boñ le mam ma kee loñge inyu nan.”+ 10 I pes yem, m’a yén hana i Mizpa inyu pot i jôl linan i bisu bi bôt ba Kaldéa ba ba nlo i béhni. Ndi bé, ni nlama tjo wai ni môô, ni bumbul ki matam ma ngéda sép, ni téédaga mo i dibee dinan, yéna mu bitison ni bi yoñ.”+

11 Bon ba Lôk Yuda bobasôna ba ba bé i Môab, i Amôn ni i Édôm; yak ni ba ba bé i biloñ bipe, ba nok le kiñe Babilôn i nyék ndék bôt i Yuda, i ntéé ki Gédalia, man Ahikam, man Safan, le nyen a ane bo. 12 Ha nyen bon ba Lôk Yuda bobasôna ba bi bôdôl nyodi i bahoma bobasôna i het ba bé ntjamak, ba témb yak Gédalia i Mizpa, i loñ Yuda. Ba tjo wai, ba bumbul ki matam ma ngéda sép ngandak kiyaga.

13 Yôhanan, man Karéa, ni baane ba mintôñ mi gwét bobasôna ba ba bé mu loñ ba bi lo i tehe Gédalia i Mizpa. 14 Ba kal nye le: “Baa u nyi bé le Baalis, kiñe Lôk Amôn,+ a ñom Ismael man Nétania le a nol we?”+ Ndi Gédalia a bi hémle bé bo.

15 I mbus, Yôhanan, man Karéa, a kal Gédalia bisôsôli i Mizpa le: “Ti me kunde le me kee, me nol Ismael, man Nétania, mut to wada a ga yi bé. Inyuki di nlama nwas le a nol we, kayéle bôt ba Yuda bobasôna ba ba kôdi hana ipañ yoñ ba tjama? Inyuki ndék bôt i Yudai i nyégle i nlama wo?” 16 Ndi Gédalia+ man Ahikam, a kal Yôhanan man Karéa le: “U boñ bañ i jam li, inyule i jam u yé i pot inyu Ismael li yé bitembee.”