Bonjee ba mbôñôl base i maliga?

1. Kinje jam di nlama boñ inyu lémél Djob?

INYU boñ le di bana maada malam ni ma gwéha ni Djob, di nlama bé bana ngaba yo kii yo ni kwéha base. Di nlama bôñôl base i maliga. I len ini didun di bôt di mboñ hala ikété nkoñ isi wonsô.

2. Hee ba nla lébna Mbôgi Yéhôva, ni umbe nson ba nsal?

² Kiki Bibel i bôk pot, bagwélél ba maliga ba yé “limut li keñi” li li nlôl “biloñ gwobisôna, ni mahaa momasôna, ni matén momasôna, ni dilémb tjodisôna.” (Masoola 7:9) Ikété 235 biloñ, didun di Mbôgi Yéhôva di mpégdaha bomede i hôla bôt bape i nigil manjel ma Yéhôva ma gwéha ni mam a mbat le di boñ.

Lelaa di nla yi babégés Djob ba maliga?

3. Njee Mbôgi Yéhôva ba mbégés, mimbe mintén mi bibéghene ba ntjél?

³ Mbôgi Yéhôva i neebe le ndik Yéhôva nyetama nyen a kôli ni bibégés gwés. Ba ntjél ôôp i bisu bi bisat tole bititii bi bibase. (1 Yôhanes 5:21) Ba mbégés bé bawoga ni njel bilélhe bi maéa tole mangand mape ma ma nhôlôs kwéha base ni “biniigana bi mimbuu mimbe.” (1 Timôtéô 4:1) Ndi to hala ba nyoñ ndun i hôgbaha miñem mi bet ba nlep, i toñol ba ntoñle bo mimbônga mi Djob le bitugne bi bawoga gw’a ba i paradis hana isi.​—Yôhanes 5:28, 29; Minson mi baôma 24:15.

4. Kii i yé bitelbene bi litén li Djob ikolba makañ?

⁴ Mbôgi Yéhôva i nyoñ bé ngaba ni makañ, to ni ngwe’, to ni liemb, inyule ba nyi le mam mana ma nlôl ni Nsohop. Ba nhémle bé le makañ ma nla tat bo​—botñem yap i yé ni Yéhôva.​—Bingéngén 18:10.

5. Ni imbe njel Mbôgi Yéhôva i nyoñ bé “ngaba ni nkoñ isi”?

⁵ Yésu a kal le banigil bé b’a yoñ “bé ngaba ni nkoñ isi.” (Yôhanes 17:16) Yésu nyemede a tjél yoñ ngaba ni mbô’ ngéda yé. (Yôhanes 6:15) Hala nyen yak Mbôgi Yéhôva i yoñ bé ngaba to ni mbô’, to ni libégés loñ, to ni sôñna bitel bi nkoñ isi. Ndi ba nligip i saa tas ni i nôgôl mambén ma biloñ bi ba yiine.​—Yôhanes 15:19; Rôma 13:1, 7.

6. Mambe maéba bagwélél ba Djob ba noñ inyu libii ni mabos?

⁶ Hala kii ba nôgôl matiñ ma baane, Mbôgi Yéhôva i yoñ yihe le mabii map ma kiha ni mambén ma ngomén. (Titô 3:1) Ba noñ bitelbene bi Djob, jon ba ntjél mabii ma ñamb. (1 Timôtéô 3:2) I loo ki hala, ntel ngéda ba ngwélél mambén ma Bibel, i yé nledek jam le mabii map ma mal ni mabos.

7. Lelaa Mbôgi Yéhôva i ñéba le ba gwé gwéha ipôla yap?

⁷ Mbôgi Yéhôva i gwé gwéha i pôla yap. Ngéda gwéha ini i nkiha ni gwéha Djob, i ñat bo ikété ngembe lisañ li bôt, to hala kii ba nlôl matén ni biloñ nya ndi nya. Ngéda kuu i nkwo tole liyep li nlo, Mbôgi Yéhôva i mpala hôlna bo ni bo. Mbôgi Yéhôva i ñunda gwéha ikété libak jap li niñ.​—Yôhanes 13:35.

8. Mambe maboñok mabe litén li Djob li ntjél?

⁸ Litén li Yéhôva li nsal ni ngui inyu niñ i nya i téé sép, i ngi tjéga nsohi. Ba ntjél wip, bitembee, ndéñg, lihiua, ni bikuhul bi ngitelepsép. Balôm ba mbép bé baa bap. Ilole ba bé yila Mbôgi Yéhôva, bape ba bé boñ mam mana. Ndi ni hôla i Yéhôva ba bi nwas mo. Ba bi “pubhana” i mis ma Djob.​—1 Korintô 6:9-11.

Baboñ sômbol Djob

9. Kinje jam kaat yada i pot inyu bibase bi mbuu mpubi bi Afrika?

⁹ I maliga, ngandak bibase bi nkatba le bon ba gwé maliga. Ba nla unda minson nwap mi hélha kii mbogye ngalba yap. Kii héga: ikolba bibase bi nsébla le bibase bi mbuu mpubi i Afrika, kaat yada i nkal le: “Bibase bi mondo bi ndôk bikristen, bi bi héñha bôt ba makañ. . . . Bi nkatba le bi mpot bindéé ni boñ mam ma hélha. Bapôdôl ba ba yé ikété yap ba ntehe biyiinda, ba toñlak bieem. Ba ngwélél malép mapubi, nsaibak lañ, libu, bitjandre ni binjinjiñ inyu mélés ni kolba makon.”

10, 11. Inyuki mam bôt ba nsébél len le mam ma hélha ma ñéba bé le ngim base i nlôl ni Djob?

¹⁰ Bôt ba bibase bini ba nkatba le mam ma hélha mon ma ñéba le base yap i yé nsaibak ni Djob. Ndi mam ma hélha ba nkal le ba mboñ ma ñéba bé le ngim base i nlémél Yéhôva. Satan a nti ngim babégés ba bitembee ngui i bôñôl ‘mam ma lipémba.’ (2 Tésalônika 2:9) I loo ki hala, Bibel i bi bôk i pot le mam ma hélha ma nlôl ni Djob, kii bo pot bindéé, pot dilémb, bana ngim yi i tôbô, “gw’a mal.”​—1 Korintô 13:8.

¹¹ Yak Yésu a kal le: “Ha hi mut a nsébél me le ‘a Nwet, a Nwet,’ bé nyen a’ jôb ane ngii, ndi mut a mboñ nsômbôl i Tata nu a yé ngii. Ngandak y’a kal me yokel le, ‘a Nwet, a Nwet, baa di bi pot bé bindéé i jôl joñ, di pémhak mimbuu mimbe i jôl joñ, di boñok ki ngandak mimpémba mi mam i jôl joñ?’ Ha nyen m’a pahle bo le: me maa yi yaga bé me bé! Nyodna me ha, a bé ba ni mboñ mam ma liyan mbén.”​—Matéô 7:21-23.

12. Njee a’ jôp i Ane ngii?

¹² Bonjee ni b’a jôb Ane ngii? Ndik bôt ba boñ sômbôl i Yéhôva.

Baañal Ane Djob

13. Umbe nson Djob a ñéga litén jé le li sal len ini, bonjee ba nsal wo?

¹³ Kii i yé sômbôl Djob inyu litén jé len ini? Yésu a kal le: ‘Ñañ nlam ane unu w’a añlana i nkoñ isi wonsôna, i ba matén momasôna mbôgi.’ (Matéô 24:14) Nson unu won Mbôgi Yéhôva i nyônôs ni makénd.

14. Kii i yé Ane Djob, bonjee b’a ane mu?

¹⁴ Ikété “nkoñ isi wonsôna,” Mbôgi Yéhôva i ñañal le Ane Djob i yé énél i ngii, yon y’a éga nkoñ isi wonsôna ni telep sép. Ba niiga le Yéhôva a bi téé Yésu Kristô kii Kiñe Ane i, ni nye ni 144 000 baso baane, mintebek i pôla bôt.​—Daniel 7:14, 18; Masoola 14:1, 4.

15. Kii Ane ya’ tjé?

¹⁵ Ni Bibel i woo, Mbôgi Yéhôva i ñunda bôt le Ane Djob y’a tjé hiai hi Satan hiosôna. Hala a’ ba mamélél ma kwéha base ni biniigana gwé bi bi nyan Djob ndi bi béghak Nsohop! (Masoola 18:8) To biane bi bôt ba binam bi bi nkolba Djob gw’a ba ha bé.​—Daniel 2:44.

16. Bonjee b’a ba isi énél i Kristô Yésu, ni hee b’a niñil?

¹⁶ Ngi momasô, Mbôgi Yéhôva i nyis bôt le Kristô Yésu a’ lona mam malam ma mbuma ñañ inyu ba bobasô ba mboñ jam Djob a mbat. B’a ba isi énél yé hana isi. Bibel i mbôn le: “A’ kobol mut liyep nu a nlond le ba hôla nye, yak mut mandutu, ni nu a gwé bé nhôla. A’ kon bôt ba sôhga, ni diyeyeba ngoo, a’ tohol ki nom diyeyeba.”​—Tjémbi 72:12, 13.

17. Bonjee botama ba ñañal Ane Djob?

¹⁷ Jut li bôt lipe li ta bé li li boñ sômbôl Djob ni njel ñañ nlam Ane ba ñañal. Ndik Mbôgi Yéhôva yon i nyis nkoñ isi wonsôna Ane Djob.