Njel, maliga, ni niñ
Ibabé pééna ni yé ni ba maséé i kôhna ñañ nlam. I pot maliga, di gwé ñañ nlam inyu yoñ ni inyu lihaa joñ.
Ñañ nlam u, u yé ikété Bibel, kaat i Nhek nu ngiinda yosôna le Yéhôva Djob a bi boñ le ba tila hala a yé ngandak nwii. Munu kaat ini, di ga béñge bikaat bi Bibel bina bi bi gwé miñañ minlam inyu bés bobasôna. Bi gwé môl ma bôt Djob a bi gwélél inyu tila gwo: Matéô, Markô, Lukas, ni Yôhanes.
Ngandak bôt i nsébél bikaat bina bi le Miñañ minlam. Bikaat bi gwo bina, bi gwé ñañ nlam inyu Yésu, nu a yé nwet Djob a ngwélél inyu tohi i bôt ba binam. Bi ñunda ki le mu kii a yé Kiñe i Ane ngii, Yésu a ga lona bisai bi boga inyu ba bobasôna ba nhémle nye.—Markô 10:17, 30; 13:13.
MIÑAÑ MINLAM MINA, INYUKI?
Bebek le ni yé badba inyuki Djob a bi boñ le miñañ mina mi niñ Yésu ni biniigana gwé bi tilba.
I yé loñge i bana mini miñañ mi mam Yésu a bi kal, a boñ ki. Inyu tibil nok jam li, hégda le bôt ba-na ba yé ipañ malét nkeñi. Mut a yii bisu bi malét a yé nkottas. Nu a yé woo wé walôm, a yé dokta. Nu a yé woo wé waé a yé nlop tjobi, a bak ki liwanda li ñem nyuu li malét. Mut nu nyônôs ina, nu a yé béñge bo a bak i mbus, a yé njohok iloo bana bape. Bôt ba bobasôna ba yé bôt ba maliga, hiki wada wap a gwé ngim njômbi. Ibale hiki mut a ntila mam Yésu a yé pot a boñok, ibabé pééna miñañ mi nwo mina mi ga toñol bé mam nlélém. Ibale di ntibil wan miñañ mini nwo mina, di téédaga ki njômbi i batila bana bo ba-na, d’a tibil yi mam momasôna malét a bi boñ, a kal ki. Hala a ñunda nseñ di nla kôhna i bana miñañ nwo mi-na mi niñ i Malét Nkeñi le Yésu.
Hégda ki le, nkottas a gwé ngôñ i pôdôl bôt ba Lôk Yuda, jon a nyoñ ngim biniigana tole ngim mam inyu hôla bôt ba ntip bôdôl nigil maliga. Dokta a mpôdôl mbôô u bakokon, jon a nsima bé ngim mam nkottas a bi tila tole a nkal mo nya ipe. Liwanda li ñem nyuu li nyigye mahoñol ni bilem bi malét. Ñañ njohok mut u yé sem kwep. Ndi ñañ u hiki mut u yé maliga. Hala a ñunda kiki miñañ mina mi niñ i Yésu mi nhôla bés i tibil nok mam a bi boñ, biniigana gwé ni libak jé.
Bôt ba nla pôdôl ‘Ñañ nlam u Matéô’ tole ‘Ñañ nlam u Yôhanes.’ Bitembee bé bi, inyule hiki ñañ u gwé “ñañ nlam u Yésu Kristô.” (Markô 1:1) Ndi ñañ nlam inyu Yésu u yé ndik wada, u yé ñañ di nléba ikété miñañ nwo mina.
Ngandak bôt i i nigil Bañga i Djob i bi hégha, i noode ki boñ le mam di nléba i kaat Matéô, Markô, Lukas, ni Yôhanes ma kiha. Bebee ni nwii 170 N.Y., ntila Syria le Tatian a bi noode boñ hala. A bé neebe le bikaat bi gwo bina bi yé maliga, bi lôlak ni mbuu mpubi. A bi yilha gwo kaat yada i ba nsébél le Diatessaron, ngim ñañ u niñ ni nson u Yésu.
I kaat ini le Yésu: Njel, maliga, ni niñ i gwé nlélém njômbi, ndi i nlôôha ba i yôni. Hala a nôga inyule i len ini, di ntibil nok biyônôl bi ngandak mbañ Yésu a bi pôdôl ni dihéga a bi ti. I nokna i i nhôla bés i bana litehge lilam inyu mam Yésu a bi kal, a boñ ki, ni lelaa ma bé noñna. Mam bahun hisi ba bi léba ma nit ngim mam batila miñañ minlam ba bi kal. I pot maliga, mut to wada a nla bé kal ntiik lelaa mam momasôna ma bi bôña, ndi i kaat ini le Yésu: Njel, maliga, ni niñ i ñañal mam kiki ma bé le ma bôña, ni i nya i nôga.
NJEL, MALIGA, NI NIÑ
Kiki u mba u ñañ i loñge kaat ini, mu mahoñol moñ, tééda nwin u tôbôtôbô i gwé inyu yoñ ni inyu lihaa joñ. Bigda le Yésu nyemede a bi kal ñôma Tômas le: “Men me yé njel, me yé maliga, me yé ki niñ. Mut to wada a nlo bé yak Tata handugi ni njel yem.”—Yôhanes 14:6.
I kaat ini le Yésu: Njel, maliga, ni niñ, i ga hôla we i tehe inyuki Yésu a yé “njel.” Ndik ni njel yé nyen di nla kôôge Yéhôva bebee ni masoohe. Jam lipe li yé le, ni njel Yésu nyen di nla tiimba sañgla ni Yéhôva. (Yôhanes 16:23; Rôma 5:8) Jon, ndik ni njel Yésu nyen Djob a nla neebe le di bana maada ni nye.
Yésu a yé “maliga.” A bi pot, a niñ ki inoñnaga ni maliga; i bé wengoñle Yésu a bé lona maliga. A bi yônôs ngandak mbañ, i i bi yila “‘ñ’ ni njel yé.” (2 Korintô 1:20; Yôhanes 1:14) I mbañ i, i nhôla bés i tehe tel yé i tôbôtôbô ikété biyônôl bi sômbôl Djob.—Masoola 19:10.
Yésu Kristô a yé ki “niñ.” Ni njel binoñ, a bi ti niñ yé i peles ni matjél mé, a ti ki bés pôla i bana “bañga niñ,” hala wee “niñ boga.” (1 Timôtéô 6:12, 19; Éfésô 1:7; 1 Yôhanes 1:7) A ga ba ki “niñ” inyu didun di bôt di di bi wo, ndi di ga lo bitugne inyu niñ boga ni boga i Paradis.—Yôhanes 5:28, 29.
Bés bobasôna di nlama diihe tel Yésu a gwé mu bitééne bi Djob. Di nhémle le n’a ba maséé i nigil mam mape ma mbéñge Yésu, “njel, maliga, ni niñ.”