Ba nke béba kiñe ngwéé

Yôsep a ntôdôl Maria inyu legel nye nwin mahee. Añgel Yéhôva i ntip pémél nye i eem, i nkal le: “Telep, yoñ hisiina mañge bo nyañ, ke ngwéé i Égiptô, yén ki nyoo letee me kal we le u nyodi inyule ndék ngéda, Hérôdé a’ yéñ hisiina mañge inyu nol nye.”​—Matéô 2:13.

Ibabé lep ngéda, Yôsep, Maria ni man wap Yésu, ba njôp njel, kel yo ngi ye. Hala a yé loñge jam le ba mboñ hala, inyule Hérôdé a mpam i yi le bayitjôdôt ba nyan nye. Hérôdé a bi kal bo le ba tiimba lo i añle nye mam ba ntehe. Ndi ba mboñ bé hala, ba nyodi i loñ ibabé i tehe nye. Hérôdé a nkala ni hiun. Mu kiki a tiñi i nol Yésu, a nti oda le ba nol bon bôlôm bobasôna ba yé i Bétléhém ni i pes mbok i yosôna, bon bôlôm ba ba gwé nwii ima i sôs. A ñôt nsoñgi u nwii mi, inoñnaga ni jam bayitjôdôt ba bé lôl i pes likôl ba bi kal nye.

Tjiba i bon bôlôm ba, i bé béba kiyaga! Di nla bé yi nsoñgi u bon bôlôm ba bi nol, ndi minlénd, maéa ma njiiha mi banyan mi nyônôs mbañ i Bibel mpôdôl Djob le Yérémia a bi legel.​—Yérémia 31:15.

Ha ngéda i, Yôsep ni lihaa jé ba nke ngwéé i Égiptô. U wada, añgel Yéhôva i ntémb i pémél Yôsep ikété eem, i nkal nye le: “Telep, yoñ hisiina mañge bo nyañ, u kena bo i loñ Israel inyule i bet ba yéñék nol hisiina mañge ba nwo.” (Matéô 2:20) Ha nyen Yôsep a nsôk a nok le nye ni lihaa jé ba nla témb i loñ i het ba bi gwéé. Ni njel i nyen mbañ i Bibel ipe i bi yon: Man Djob a nséblana Égiptô.​—Hôséa 11:1.

I nene le Yôsep a gwé ngôñ i yén i Yudéa ni lihaa jé, bebee ni tison i Bétléhém het ba bé niñ ilole ba nke ngwéé i Égiptô. Ndi a nok le béba lok i Hérôdé le Arkélaô, nyen a yé kiñe i Yudéa nano. Ikété eem ipe, Djob a nyis Yôsep hala. Jon Yôsep ni lihaa jé ba nke i ñombok i yén i tison Galiléa yada le Nasaret, haa ni Yérusalem. Ha nyen Yésu a néñél inoñnaga ni mbañ i Bibel ipe i i nkal le: “B’a sébél nye le mut Nasaret.”​—Matéô 2:23.