Biniigana inyu mabos ni i gwés boñge

Ibôdôl i Galiléa, Yésu ni banigil bé ba ntagbe Lom Yordan, ba kenek i nwelmbok i Péréa. I ngéda Yésu a bi sôk ke i Péréa, a bi ti farisai mahoñol ma Djob inyu mabos. (Lukas 16:18) Nano, ba mpôdôl mu jam li inyu noode Yésu.

Môsi a bi tila le mut a nla bos nwaa wé ibale a nléba “jam li nhénd” nye ñem (Ndiimba Mbén 24:1) Mahoñol ma yé ngandak inyu jam li mabos. Inyu ngandak bôt, hala a nla béñge disii di mam. Jon Farisai i mbat le: “Baa i yé mut kunde i bos ni nwaa wé to inyu imbe njom?”​—Matéô 19:3.

Iloole a gwélél mahoñol ma bôt ba binam, Yésu a nhôñlaha bo litehge li Djob inyu libii. A nkal bo le: “Baa ni bi añ bé le nu a bi hek bo i bibôdle, a hek bo munlôm ni muda, a kal ki le: ‘Inyu hala nyen munlôm a’ yék isañ bo nyañ, a adbe ni nwaa wé kayéle bo iba b’a ba nsôn wada’? Kayéle ba ta ha bé iba ndi nsôn wada. Jon, jam Nyambe a ñat, mut nye ki nye a bagal bañ jo.” (Matéô 19:4-6) Ngéda Djob a bi téé libii ipôla Adam bo Éva, bitelbene bi bé bé inyu mabos.

Farisai i mpééna bibuk bi Yésu, i nkal le: “Inyuki ni Môsi a bi bat le mut a ti nwaa kaat inyu mélés libii ngéda a mbos ni nye?” (Matéô 19:7) Yésu a nkal bo le: “Inyu minledek minan mi miñem nyen Môsi a bi nwas le ni bos ni baa banan, ndi hala bé nyen mam ma bé i bibôdle.” (Matéô 19:8) “Bibôdle” bi, bi nsômbôl bé pôdôl dilo di Môsi, ndi bi mpôdôl ngéda Djob a bi téé libii i wom Éden.

Nano, Yésu a nkal ngim maliga i yé nseñ: “Me nkal bé le nu ni nu a mbos ni nwaa, handugi inyu malal ma nyega [ni hop Grikia por·neiʹa], ndi a bii muda numpe, wee a nke ndéñg.” (Matéô 19:9) Inoñnaga ni Bitilna, ndéñg yotama yon i nti kunde i bos!

Banigil ba nhel, ba kal le: “Ibale hala nyen munlôm a nlama niñ ni nwaa wé, wee nseñ u ta bé i biiba.” (Matéô 19:10) I pot maliga, i mut a nsômbôl bii a nlama yi le libii ipôla muda ni munlôm li yé maada inyu niñ yap yosôna!

Inyu bet ba yé ngi biiba, Yésu a ntoñol le bape ba bi gwéé nwak, ba nla bé bana maada ma libii. Ba bi yilha bape nwak, hala wee ba nla bé gwélél gwom gwap bi mbôô. Ndi bape ki ba nla gwel ngôñ yap i malal inyu kônde ti bomede i noñ gwéñe bi Ane. Yésu a nkal baemble nye le: “I mut a nla neebe jam li [libak li ngibiiba], a neebe jo.”​—Matéô 19:12.

Bôt ba mbôdôl lona bon bap yak Yésu. Ndi banigil ba gwé bé ngôñ le bôt ba tééñga Yésu. Kiki ba sôña bôt, Yésu a nok bé maséé, jon a nkal le: “Nwaha boñge ba lo meeni, ni noode bañ sôña bo, inyule Ane Nyambe i yé inyu bôt ba yé kiki bo. Me nkal bé maliga le: Nu ni nu a nleege bé Ane Nyambe kiki mañge ntitigi, kekikel a’ jôp bé mukété.”​—Markô 10:14, 15; Lukas 18:15.

Kinje biniigana bilam! Inyu jôp i Ane Djob, di nlama ba bôt ba limoma ni ba ba gwé ngôñ i nigil kiki boñge. Nano Yésu a ñunda gwéha yé inyu boñge, a nyoñ bo i moo mé, a sayap ki bo. A gwé nlélém gwéha inyu ba bobasôna ba ‘nleege Ane Nyambe kiki mañge ntitigi.’​—Lukas 18:17.