Nduña​—“Di nkiiña ni njiiha bipes gwobisôna”

NDUÑA i ntihba bôt bobasôna, yak bagwélél ba Djob. Ntôp tjémbi a bi tila le: “Nduña i mahoñol mem i mbôl.” (Tjémbi 94:19) Yak Yésu a bi kal le, i masuk ma ngéda, “nduña nom ini” i nla ba ngok baagene ikeñi téntén inyu bagwélél ba Yéhôva. (Lukas 21:34) Baa i yé lelaa inyu yoñ? Baa u nôgda le mam ma moni, mindañ ikété lihaa, tole makon, ma ntéñga we? Baa Yéhôva a nla hôla we i témbna ngui yoñ?

“Sôkbôk lipémba”

Di nla bé yémbél nduña ni ngui yés bés botama. Ñoma Paul a bi tila le bikristen bi bisu bi bi kôhna “njiiha bipes gwobisôna,” ndi bi bé bé nhamga wengoñle bi nla bé nyiñgha. Bi bé kikii bôt ba nimis yi, ndi bi bi “lehel bé ñem.” A kal ki le bi bé kikii bôt le ba net isi, ndi bi bi “tjiba bé.” Kii bi hôla bo i hônba mandutu? “Sôkbôk lipémba,” hala we ngui i nlôl yak Yéhôva, Nyambe nu Ngui yosôna.—2 Korintô 4:7-9.

Témb hoñol lelaa u bi kôhna “sôkbôk lipémba” i ngéda bisu. Baa u ngi bigdaga ngim nkwel, u u bi ti we makénd i diihe gwéha Yéhôva a gwé inyu yoñ? Baa u bé lédés bé hémle yoñ, ngéda u bé toñle bôt bape botñem inyu Paradis? Ngéda di nke i makoda, di keneg i likalô, di nkôhna ngui i nihbe mandutu ma niñ, ni i bana ñem ñwee u u nla hôla bés i gwélél Yéhôva ni maséé.

“Noodana, ni tehe le Yéhôva a yé longe!”

I yé mbale le, ngéda u mbéñge mam momasôna u gwé i boñ, u nla nôgda le hala yé ngandak inyu mut wada. Kii héga, Yéhôva a mbat le di yéñ nduk Ane yé, ni le di bana ntjegeg ngéda inyu mam ma mbuu. (Matéô 6:33; Lukas 13:24) Ndi ibale bôt ba nkolbaha we, tole u nkon, tole u gwé mindañ ikété lihaa? Kii nla hôla we i tééda makénd u bééna i ngéda bisu? Mambe makidik u nlama yoñ ibale bôlô i nyoñ we ngéda ni ngui u lamga ti inyu likoda? Hala a nla tômbôs we ibale u gwé ngandak mam i boñ, ndi u gwé bé ngui to ngéda i boñ momasôna. Ha ngéda i, u nla hoñol le Yéhôva a mbat we iloo héga.

Yéhôva a nok bés. Kekikel, a mbat bé bés yom di nla bé ti. A nyi ki le ibale di yé ikété nduña, ngéda i nlama tagbe inyu boñ le di témbna mbôô wés.—Tjémbi 103:13, 14.

Kii héga, béñge lelaa Yéhôva a bi tôñ mpôdôl wé le Elia. Ngéda Elia a bi nimis makénd mé, a bi ôt ngwé i ñoñ inyule a bé kon woñi. Baa Yéhôva a bi bam mpôdôl wé Elia? Baa a bi ti nye oda le a témb i homa a bi ep nye nson? Heni. Yéhôva a bi ep añgel yé ngélé iba inyu tôdôl Elia mbeñel, ni inyu ti nye bijek. Ndi to hala, mbus 40 ma dilo, Elia a bé a ngi konok woñi, a ban-ga ki nduña. Kii Yéhôva a bi boñôl ki nye? Jam li bisu li yé le, Yéhôva a bi unda nye le a nla sôñ nye. Mam ma nyônôs ima ma yé le, Yéhôva a bi ti nye hogbe, ngéda a bi pôdôs nye ni “himaga hi kiñ nwee.” Jam li nsôk li yé le, Yéhôva a bi yelene nye le dikôô di bôt dipe di ngi gwélak nye ni maliga. Mbus ndég ngéda, Elia a bi témb a ligip i kena nson u Yéhôva ni bisu. (1 Bikiñe 19:1-19) Baa hala a niiga bés kii? Kiki nduña i ba téñga Elia, Yéhôva a bi hôla nye ni ñemlima, ni wongut. Yéhôva a nhéñha bé. A ngi gwé nlélém nduña inyu yés i len ini.

Ngéda u nyéñ boñ yom inyu Yéhôva, boñ kiki u nla. U hégha bañ yom u mboñ i len ini ni yom u bé boñ yani. Wan héga hini: Mut nu a nke i pémsan, a yé a béna kôôba i ôt ngwéé. Ndi ibale a nwas pémsan mbus ngandak ñwii, baa u nhoñol le a nla hoo ôt ngwéé ni nlélém ngui kii bibôdle? I yé loñge le a bôdôl kôôba i ôt ngwéé mbeñel mbeñel, letee a témbna ngui a bééna. Bikristen bi yé kii bôt ba ñôt ngwéé. Ba nyéñ ke pam lisuk. Jon, ba ntjeg mam ba nlama yônôs, jada mbus lipe. (1 Korintô 9:24-27) Jon yak we, bôdôl ndug boñ jam jada u nla yônôs hanano inyu mahol moñ i pes mbuu. Kii héga, u nla kit le u mbôdôl ke makoda. Bat Yéhôva le a ti we ngui i yônôs makidik moñ. Kii u ga témbna ngui yoñ inyu mam ma mbuu, u ga noode “ni tehe le Yéhôva a yé longe!” (Tjémbi 34:9) Bigda le, to imbe yom u mboñ inyu unda Yéhôva le u ngwés nye, to ibale i nene isii, i yé nséñ inyu yé.—Lukas 21:1-4.

“Makénd i loñge ngéda”

Lelaa Yéhôva a bi ti sista June ngui i témb bôdôl gwélél nye? Nyemede a ntimbhe le: “Me bi ke ni bisu i soohe Yéhôva, me bat nye le a hôla me. Ha nyen, nkiya wem a bi kal me le, likoda likeñi li nke ba i tison yem. Jon, me bi tep hilo hiada inyu ke nyoo. Me bi kon maséé ngandak i kodba ki ni bilôk biké gwem! Me bi kôhna ki makénd i loñge ngéda. Nano, me gwé ngandak maséé i gwélél ki Yéhôva. Niñ yem i ntémb i bana mahee. Kekikel, ma ga bagla ha bé ni bilôk biké, to tjél mahôla map. Me nti Yéhôva mayéga le a bi ti me ngéda i témb i nyeni.”