Bigdana nwaa Lôt

Lôt a bé niñ ni Abraham, manyañ isañ, i loñ Kanaan. Ba bi sôk ba bana ngandak bilém kayéle hisi hi bé kola ha bé inyu bilém gwap gwobisôna. Abraham a kal Lôt le: ‘Di nla ha bé yén homa wada. Soho, pohol hee homa u ngwés ke, me m’a ke pes ipe.’ Baa hala a ñunda bé le Abraham a bé mut a ntôñ bape?

Lôt a bi tehe loñge nkoñ bebee ni tison ba bé sébél le Sôdôm. U bé nyonok ni malép ni bikai bilam. Jon a bi pohol nkoñ u, a ke nyoo ni lihaa jé.

Bôt ba Sôdôm ni ba tison ipe i i bé ha bebee le Gômôra, ba bé bibéba bi bôt ngandak. Bibéba gwap bi bi loo héga kayéle Yéhôva a kit le a ntjé bitison bi. Ndi, Djob a bé sômbôl tohol Lôt ni lihaa jé, jon a bi ep biañgel i béhe bo le: ‘Hoo so! Pam munu i tison ini! Yéhôva a ntjé yo.’

Lôt a bi hoo bé nyodi. A bi tiñha. Jon biañgel bi bi gwel Lôt i woo, bi gwel ki woo u nwaa ni u bingond gwé gwobiba, bi hoo pémés bo i tison. Bi kal Lôt le: ‘Kee ngwéé! Péyés niñ yoñ, u béñge bañ mbus. Ibale u mbéñge mbus, u nwo!’

I ngéda ba bi pam i tison ba bé sébél le Zôar, ha nyen Yéhôva a nôs solfa ni hié i ngii Sôdôm ni Gômôra. Bitison bi, bi bi tjiba hies! Nwaa Lôt a bi ndogbene Yéhôva, a hielba, a béñge mbus, a yila jél li bas. Ndi Lôt ni bingond gwé ba bi pei, inyule ba bi nôgôl Yéhôva. Hala a bi lama nôgha bo njôghe ngandak kiki nwaa Lôt a bi ndogop. Ndi ba bé maséé, inyule ba bi nôgôl i mam Yéhôva a bi kal bo.