Môsi a bi pohol le a mbégés Yéhôva

I Égiptô, lihaa li Yakôb li bi yoñ jôl le: Lôk Israel. I mbus nyemb Yakôb ni Yôsep, Faraô nu mondo a bôdôl énél. A bé kon woñi le lipémba li bon ba Israel li nke i lel li bon ba Égiptô. Jon Faraô, a bi yilha bon ba Israel minkol. Faraô a nyégsa bo i bép brik, ni i sal ngandak ikété nwom. Ndi, kiki bon ba Égiptô ba bé kônde lédés bôlô, hala nyen nsoñgi u bon ba Israel u bé ndigi u mbet, bet ni bet. Hala a bi lémél bé Faraô, jon a bi ti oda le ba nol minkéñéé mi bon bôlôm nwominsôna mi bon ba Israel. Baa u nla hégda lelaa bon ba Israel ba bi kon woñi?

Muda wada ikété Lôk Israel le Yôkébed, a bééna nkéñéé man munlôm u u bé nlam ngandak. Inyu sôñ niñ i man wé, a bi ha nye ikété ngim sel, a sôô nye ipôla bikai bi lom le Nil. Miriam, ngond i Yôkébed, a bé a téé ha bebee, inyu tehe kii y’a bôña.

Ngond Faraô i lo i jogop i lom, a tehe sel, nkéñéé man won u ba mu, u eek, a kônôl wo ngoo. Miriam a bat nye le: ‘Baa me yiñil we muda nu a ga lel man nunu inyu yoñ?’ Ngéda ngond Faraô i bi neebe, Miriam a lona nyañ man nyemede le Yôkébed. Ngond Faraô i kal nye le: ‘Yoñ man nunu, lel nye inyu yem, me mba me saa we.’

Ngéda man a bi nañ, Yôkébed a kena nye yak ngond Faraô, a ti nye jôl le Môsi, a néñés ki nye kiki man wé. Môsi a bi nañ kiki man kiñe, a bé le a bana hiki yom i bé kon nye ngôñ. Ndi kekikel, Môsi a hôya bé Yéhôva. A bé yi toi le a bé man Lôk Israel, he man Égiptô bé. A bi pohol ki i sélél Yéhôva.

I ngéda a bi bolna 40 ma nwii, Môsi a kit le a ga hôla litén jé. Ngéda a bi tehe man Égiptô wada a yé bép nkol, u u bé man Lôk Israel, Môsi a bi bép nu man Égiptô ni ngui kayéle a wo. Môsi a bi sôô mim ikété lisege. I ngéda jam li, li bi pam maôô ma Faraô, a bi yéñ njel i nol Môsi. Ndi Môsi a bi so inyu ke i loñ Midian. Yéhôva a bi tééda nye nyoo.