Kiñe bisu i litén li Israel

Yéhôva a bi ti Lôk Israel bakéés inyu éga bo, ndi bo ba bi bat kiñe. Ba kal Samuel le: ‘Biloñ bipe gwobisôna bi gwé bikiñe. Yak bés di nsômbôl wés.’ Samuel a nôgda le béba jam i, a soohe Yéhôva. Yéhôva a kal nye le: ‘We bé nyen ba ntjél. Men ba ntjél. Añle bo le ba nla bana kiñe, ndi ba yi le kiñe i ga bat bo ngandak mam.’ To hala, ba timbhe le: ‘Ndi hala a mboñ kii? We ti bés kiñe!’

Yéhôva a añle Samuel le mut wada le Saulô nyen a’ ba kiñe bisu. Ngéda Saulô a bi ke i pôdôs Samuel i Rama, Samuel a kôp nye môô i ño inyu téé nye kiñe.

I mbus ngéda, Samuel a kot Lôk Israel yosôna inyu unda bo kiñe yap mondo. Ndi ba bi la bé léba Saulô homa nye ki nye. Baa u nyi inyuki? Inyule a bi solop ikété mambegee. Kiki ba bi sôk léba nye, ba lona nye i ti bôt. Saulô a bé loo bôt bobasôna ntel, a bé ki nlam ngandak. Samuel a kal le: ‘Nuna-ki nu Yéhôva a ntep.’ Bôt ba leñ diléla: ‘Niñ nom inyu kiñe!’

I bibôdle, Kiñe Saulô a bé emble Samuel, a nôglak Yéhôva. Ndi i mbus, a héñha. Kiki hihéga, kiñe bé yon i bé lama ti bisesema. Kel yada, Samuel a kal Saulô le a bem nye, ndi Samuel a bi pala bé lo. Ha nyen Saulô a kit le nyemede a ga ti bisesema. Kii Samuel a bi boñ? A bi kal nye le: ‘U bé lama bé ndogbene Yéhôva.’ Baa Saulô a bi ôt biniigana i mbus hihôha hié?

I ngéda Saulô a bi ke jôs Lôk Amalek gwét, Samuel a kal nye le a nwas bañ mut nye ki nye i niñ. Ndi Saulô a bi top bé nol Kiñe Agag. Yéhôva a añle Samuel le: ‘Saulô a nkôm me mbus, a nôgôl ha bé me.’ Samuel a bi nôgda ndutu mu ñem, a kal Saulô le: ‘Inyule u nôgôl ha bé Yéhôva, a ga tep kiñe ipe.’ Kiki Samuel a bôdôl témb, Saulô a kabda linjek jé li mbot, li pédi. Jon Samuel a kal Saulô le: ‘Yéhôva a nkadal ane i moo moñ.’ Yéhôva a bé kôôba i ti ane i moo ma mut a bé gwés nye, a nôglak ki nye.