Man yik muda a ntémb i niñ

Ngéda sép keñi, Yéhôva a kal Élia le: ‘Kee i Sarépta. Nyoo, yik muda y’a ti we bijek.’ Élia a pam bañ makôga ma nkoñ, a tehe hiyeyeba hi yik muda hi mbada tjéé. A bat muda kop malép. Kiki a bé ke i lona yo, Élia a témb a sébél nye, a kal nye le: ‘Soho lona ki me két koga.’ Ndi yik muda i timbhe nye le: ‘Me gwé bé me koga i ti we. Flawa ni môô me gwé, bi kôli ndigi inyu me ni man wem.’ Ndi Élia a kal nye le: ‘Yéhôva a mbôn le, ibale u mbôñôl me koga, flawa ni môô moñ bi ga mal bé letee nop a témb a bôdôl no.’

Muda a ke mbai, a lémbél mpôdôl Yéhôva koga. Kiki Yéhôva a bi bôn, yik muda bo man wé ba bi bana bijek sép yosôna. Himbôga hié hi flawa ni lingak jé li môô bi bi mal bé letee nop a témb a bôdôl no.

Ndi jam libe li bi pémél bo. Lok i yik muda i bi kon, i wo. Muda a bat Élia mahôla. Élia a begee mañge, a betna nye i tuñ ngii. A niñi nye i ngii nañ, a soohe le: ‘A Yéhôva, soho timbis man nunu i niñ.’ Baa u nyi inyuki i jam li, li bé tôbôtôbô inyu Yéhôva? Inyule yôha, mut nye ki nye a bi bôk bé a témb i niñ. I bak ki le, yik muda bo lok yé ba bé bé to bon ba Israel.

I mbus masoohe, mañge munlôm a témb i niñ, a bôdôl hép! Ha nyen Élia a kal yik muda le: ‘Nun-ki! Man woñ a yé yômi.’ Ikété ngandak maséé, muda a kal Élia le: ‘U yé toi mut Djob. Me nkélél hala inyule, ndik yom Yéhôva a nkal we le u pot, yon u mpot.’