Yérusalem a ntjiba

Lôk Yuda i bééna lem i tjôô Yéhôva, hiki ngéda, i béghak bikwéha bi mop. Ndi Yéhôva a bi noode hôla bo, nwii ndi nwii. A bi ep ngandak bapôdôl inyu béhe bo, ndi ba bi top bé emble. Ndi ba bé yan ki bapôdôl. Lelaa Yéhôva a bi mélés libégés jap li bisat?

Kiñe Babilôn le Nébukadnézar, a bé yémbél biloñ, yada ni yada. Ngélé bisu a bi yémbél Yérusalem, a bi gwel Kiñe Yéhôyakin, dikoo di mbok, bôt ba gwét, ni bagwelnson, a kena bobasôna i Babilôn. A bi yoñ yak nkus wonsôna u bé ikété témpel Yéhôva. Ndi Nébukadnézar a téé Sédékia kiñe Lôk Yuda.

Bibôdle, Sédékia a bé nôgôl Nébukadnézar. Ndi biloñ bi bé nye ipañ ni bapôdôl ba bitembee, ba bi tinde nye i ndogbene Babilôn. Yérémia a béhe nye le: ‘U nlama yi le, ibale ni ndogop, nyemb, njal, ni makon, bi ga ba i Yuda.’

I mbus nwii juem mi énél yé, Sédékia a kit le a ndogbene Babilôn. A bat ntôñ gwét u Égiptô mahôla. Jon Nébukadnézar a bi ep ntôñ wé u gwét i jôs Yérusalem; ba kéña tison. Ha nyen Yérémia a kal Sédékia le: ‘Yéhôva a nkal le ibale ni nti Babilôn moo, ni ga pei, bé ni tison nan. Ndi ibale ni ntjél, bôt ba Babilôn ba ga ligis Yérusalem, ba kena ki bé minkôm.’ Sédékia a timbhe le: ‘Me nti bé bo moo!’

I mbus nwii wada ni pes, ntôñ gwét u Babilôn u yap lipénd, u ligis tison. Ba bi ligis témpel, ba nol ngandak bôt, ba kena ki dikôô di bôt minkôm.

Sédékia a bi so Yérusalem, ndi bôt ba Babilôn ba bi noñ nye. Ba gwel nye bebee ni Yérikô, ba témbna nye yak Nébukadnézar. Kiñe Babilôn i nol bon ba Sédékia bisu gwé. Nébukadnézar a tôp Sédékia mis, a ha nye i mok; mu nyen a bi wél. Ndi Yéhôva a bi bôn Lôk Yuda le: ‘Mbus 70 ma nwii, me ga témbna bé i Yérusalem, i mbai nan.’

Kii i ga pémél boñge ba wanda ba ba bi ke minkôm i Babilôn? Baa ba ga téñbe ni Yéhôva?