Diloga dina di di bi nôgôl Yéhôva

I ngéda Nébukadnézar a bi kena dikoo di mbok di Yuda i Babilôn, a téé ngwélél wé nunkeñi wada le Aspénaz, le nyen a tééda bo. Nébukadnézar a kal Aspénaz le a toñ ipôla yap, diloga di di nlôôha ba mbôô, di lôôhaga ki yi jam. Ba bé lama uñgus boñge ba inyu nwii maa. Hala a bé inyu kôôba bo i ba bañga bôt ba Babilôn. Diloga di, di bé lama nigil i ãn, i tila, ni i pot hop Kaldéa u Babilôn. Di bé lama ki je minlélém mi bijek kiñe ni bôt bé ba nje. Boñge bôlôm ba-na, le Daniel, Hanania, Misaél, ni Azaria, ba bé ikété nsoñgi diloga ti. Aspénaz a ti bo môl ma mondo ni hop Babilôn le: Beltésasar, Sadrak, Mésak, ni Abed-négô. Baa biniigana ba bé kôs bi bi boñ le ba hôya Yéhôva?

Diloga dina tini di bi kit le di ga nôgôl Yéhôva. Ba bé yi le ba bééna bé kunde i je bijek bi kiñe inyule Mbén Yéhôva i bé kal le ngim bijek mu i yé nyega. Inyu hala nyen ba kal Aspénaz le: ‘Soho, u jés bañ bés bijek bi kiñe.’ Aspénaz a timbhe bo le: ‘Ibale ni nje bé, ndi kiñe i tehe le masu manan ma mbai bé, a’ nol me!’

Ha nyen yi i bi lôl Daniel. A kal ntééda wap le: ‘Soho ti ndik bés bikai kiki bijek, ni malép, inyu jôm di dilo. Ndi u hek masu més ni masu ma diloga di di nje bijek bi kiñe.’ Ni ntééda wap a neebe.

Jôm di dilo di tagbe bañ, Daniel ni mawanda mé momaa ba bé nene mbôô iloo tini diloga dipe tjodisôna. Yéhôva a bi kon maséé le ba nôgôl nye. A ti yak Daniel pék i nok biyiinda ni bieem.

Ngéda uñgus yap (tole yigil yap) i bi mal, Aspénaz a jôbna diloga tjodisôna bisu bi Nébukadnézar. Kiñe i kwélés bo, i yimbe le Daniel, Hanania, Misaél bo Azaria ba bé yi jam, ba bak ki makwasi iloo tini diloga dipe tjodisôna. A tep bo ba-na inyu sal i kotoo i ndap kiñe. Kiñe i bé bat bo maéba hiki ngéda inyu mam makeñi. Yéhôva a bi ti bo pék iloo batipék ni bôt ba makañ bobasôna ba kiñe.

To hala kiki Daniel, Hanania, Misaél bo Azaria ba bé i loñ ipe, ba bi hôya bé le ba yé bôt ba litén li Yéhôva. Baa yak we w’a hoñol Yéhôva hiki ngéda, to ibale bagwal boñ ba ta bé we ipañ?