Élisabet a ngwal man

Iloo 400 nwii i mbus le mapénd ma Yérusalem ma bi témb ma ôña, prisi yada le Sakaria bona nwaa Élisabet ba bé niñ bebee ni tison. Ibôdôl nu ba bi biiba, ba bi bana bé man. Kel yada, kiki Sakaria a yé ligis bijiñjiñ i témpel, añgel Gabriel i pémél nye. Sakaria a séhba, ndi Gabriel a kal nye le: ‘U kon bañ woñi. Yéhôva a ñéble we nwin nlam. Nwaa woñ Élisabet, a ga gwal man, a ga sébla le Yôhanes. Nyen Yéhôva a mpohol inyu nson u tôbôtôbô.’ Sakaria a bat nye le: ‘Lelaa me yé le me hémle we? Me ni nwaa wem di yé miñunuk inyu bana man.’ Gabriel a timbhe nye le: ‘Djob nyen a ñep me inyu legel we i nwin unu. Ndi kiki u nhémle bé me, w’a kwo mbuk letee man nu a gwéé.’

Yokel, Sakaria a bi tiñha pam i témpel. Jon kiki a bi sôk a pam, bôt ba bat nye kii i ntagbe, ndi a bi la bé pot. A kahal añle bo ni moo kii i mpémél nye. Ha nyen bôt ba bi nôgda le Sakaria a ntip kôhna nwin u nlôl ni Djob.

Kiki ngéda i nkola, Élisabet a nembee, a gwal man munlôm, ndik kiki añgel i bi pot. Mawanda mé ni bôt bé ba lihaa ba lo i béñge man. Ba bé maséé ngandak inyu yé. Élisabet a kal le: ‘A ga sébla le Yôhanes.’ Ba kal nye le: ‘Ndi mut nye ki nye a gwé bé jôl li Yôhanes ikété lihaa joñ. O nye le Sakaria, kiki isañ.’ Ni Sakaria a tila le: ‘Jôl jé le: Yôhanes.’ Ha nyen Sakaria a bi témb a bôdôl pot! Ñañ inyu man u tjama mbôk Yudéa yosôna, ndi bôt ba badbaga le: ‘Man nunu a’ ba laa?’

Ndi Sakaria a yon bañ ni mbuu mpubi, a kahal pot bidéé, nye: ‘Yéhôva a kôli ni bibégés. A bi bôn Abraham le a ga om ntohol, Mésia, inyu kobol bés. Yôhanes a’ yila mpôdôl, nyen a’ kôôba Mésia njel.’

Yak Maria, muda wada ikété lihaa li Élisabet, a bi kôhna hélha jam. Di béñge jo ikété yigil i noñ.