PES 3
I mut a nlama kôôba njel a ngwéé
YÔHANES NSÔBLE A NGWÉÉ, BA O KI NYE JÔL
BISU BI NGÉDA, SAKARIA A MPÔDÔL INYU NSON U YÔHANES
Élisabet a yé bebee ni bana man wé. Mut wé lihaa le Maria a nyén ni nye jam kiki bo sôñ aa. Nano ngéda i nkola le Maria a tjôla nye, a boñ mbôñgô liké i pes i ñombok inyu témb i mbai yé i Nasaret. I mbus sôñ isamal, yak nye a’ gwal wé man munlôm.
Ndék ngéda i mbus le Maria a nke, Élisabet a ngwal. Kinje maséé le gwal u ntagbe loñge, ni ki le Élisabet bo man wé ba yé mbôô! Ngéda Élisabet a ñunda bôt bé ba libôk ni bôt bé ba lihaa man wé, ba nkon maséé lôñni nye.
Mbén Djob a bi ti Lôk Israel i bé kal le i mbus dilo juem, ba bé lama kwee man munlôm. Ha ngéda i nyen ba bé ti nye jôl. (Lôk Lévi 12:2, 3) Ngim bôt i nhoñol le Sakaria a nlama o man wé jôl jé. Ndi Élisabet a nyoñ hop, a kal le: “Heni! B’a sébél nye le Yôhanes.” (Lukas 1:60) Bigda le añgel Gabriel a bi kal le man a nlama sébla le Yôhanes.
Bôt ba lihaa ni ba libôk ba neebe bé hala, ba nkal le: “Mut woñ lihaa to wada a gwé bé jôl li.” (Lukas 1:61) Ni moo map, ba mbat Sakaria lelaa a nsômbôl le ba sébél man wé. Sakaria a mbat bo tafel, ni nye a ntila le: “Jôl jé le Yôhanes.”—Lukas 1:63.
Bitéé bilôñi, nyo wé u nyibla. Bebek u ngi hoñlak le a bi kwo mbuk inyule a bi hémle bé jam añgel i bi kal, hala wee ngéda añgel i bi kal nye le Élisabet a bé lama bana man. Jon, nano kiki Sakaria a mpot, bôt bé ba libôk ba yé nhelek, ba badbaga le: “Umbe ntén mut i man nunu a’ sôk yila?” (Lukas 1:66) Ba ntehe le jôl li Yôhanes li bi lôl nye ni Djob.
Nyonok ni mbuu mpubi, Sakaria a nkal le: “Yéhôva Nyambe nu Israel a kôhna bibégés, inyule a bi yoñ ngéda ni litén jé, a lona ki jo tohi. A bi téé yak toñ i tohi inyu yés ikété ndap David, ngwélél wé.” (Lukas 1:68, 69) Ngéda a nkal le “toñ i tohi,” a yé pôdôl Nwet Yésu, nu a nlama gwéé. Sakaria a nkal le ni njel i Mut nu nyen ‘ngéda di mal kôhna tohi i moo ma baoo bés, [Djob] a ga ti bés bisai i gwel nson pubhaga inyu yé ibabé i kon woñi lôñni ndéñbe ni telepsép i bisu gwé dilo tjés tjodisôna.’—Lukas 1:74, 75.
Inyu man wé, Sakaria a nkal bisu bi ngéda le: “Ndi inyu yoñ, a nkéñéé man, w’a séblana le mpôdôl nu Nungingii, inyule w’a bôk Yéhôva i bisu inyu kôôba manjel mé, inyu añle litén jé nwin u tohi ni njel nwéhél i bibéba gwap, inyu ñem konangoo u Nyambe wés. I konangoo ini y’a bai i ngii yés kiki ngéda hiañgaa hi mpam, i ti mapubi inyu bôt ba yé ikété jiibe lôñni yiye i nyemb, ni inyu éga makôô més ikété njel i nsañ.” (Lukas 1:76-79) Kinje makénd mbañ ini i nti bés!
Ha ngéda i, Maria nu a yé ngi biiba a mpam i mbai yé Nasaret. Kii i ga pémél nye ngéda bôt ba ga yi le a yé jém?