Biañgel bi nlegel ligwéé li Yésu

Kaisa Agustô a bé énél Lôk Rôma ni minkoñ nwomisôna mi bé isi énél yap; a bi ti kiñ le Lôk Yuda yosôna i témb mambai map inyu tilba. Yôsep bo Maria ba bi ke i Bétléhém, inyule nyoo nyen mbai Yôsep i bééne. Ha ngéda i, Maria a bak bebee ni gwal.

I ngéda ba bi pam i Bétléhém, homa ba bi la léba kiki liyééne a bé ndap bilém. Ha nyen Maria a bi gwal man wé Yésu, a hô nye ni mabadô, a niñ nye mbeñee i jéhne bilém.

Bebee ni Bétléhém, ngim batééda mintômba i bé i mbédgé inyu tat bibémba gwap. Añgel yada i pémél bo, lipém li Yéhôva li béyél bo bipes gwobisôna. Batééda bibémba ba sehla, ndi añgel i kal bo le: ‘Ni kon bañ woñi. Me gwé nwin nlam. Mésia a ngwéé len i Bétléhém.’ I mbus, ngandak biañgel i pam i ngii, i kalak le: ‘Lipém li ba ni Nyambe nyoo ngingii, ni nsañ hana isi.’ I mbus, biañgel bi nyoi. Kii batééda mintômba ba bi boñ?

Ba kalna le: ‘Di kenek nano i Bétléhém.’ Ba hoo ke, ba koba Yôsep bo Maria ikété ndap bilém lôñni nkéñé wap man.

Hiki mut nu a bi nok jam añgel i bi legel batééda mintômba a bé nhelek. Maria a bi yégle a nsonda bibañga bi añgel, a bi hôya bé gwo niñ yé yosôna. Batééda bémba ba bi témb i béñge mintômba nwap, ba tinak Yéhôva mayéga inyu mam ba bi tehe ni nok.