Yéhôva a bi tat Yésu

Loñ yada i pes likôl i loñ Israel, i bééna bôt ba bé hémle le tjôdôt di nla éga bo. U wada, ngim bôt i mbok Likôl i tehe yom i mbai i ngii kiki hiôdôt, i kenek; ni bo ba kahal noñ yo. “Hiôdôt” hi, hi kena bo i Yérusalem. Ba kahal bat bôt ba loñ le: ‘Man a’ yila kiñe Lôk Yuda, a yé hee? Di nlo ôm maboñ bisu gwé.’

Ngéda kiñe Yérusalem le Hérôdé a bi nok ñañ u kiñe mondo, a kon woñi. A bat baéga biprisi le: ‘Baa hee homa ini kiñe i nlama gwééne?’ Ba timbhe nye le: ‘Bapôdôl ba bi kal le a nlama gwéé i Bétléhém.’ Inyu hala nyen, a sébél bôt ba Likôl, a añle bo le: ‘Kengana i Bétléhém, ni léba mañge nu. Ni loo, ni kal me hee homa a yé. Yak me me nsômbôl ôm maboñ bisu gwé.’ Ndi a bé tembee.

“Hiôdôt” hi bôdôl ki liké. Ba noñ hio teeni Bétléhém. “Hiôdôt” hi bi lo hi telep i ngii ndap yada, mu nyen i bôt ba, ba bi jôp. Ba koba Yésu ni nyañ Maria. Ba ôm maboñ bisu bi mañge, ba ti nye makébla ma gôl, ni binunumba, ni mire. Baa Yéhôva nyen a bi om bôt bana i yéñ Yésu? To.

Nlélém u, Yéhôva a kal Yôsep ikété eem le: ‘Hérôdé a nyéñ nol Yésu. Yoñ nyañ bo man, u kena bo Égiptô. Yégle nyoo letee me kal we le u témb.’ Bitéé bilôñi, Yôsep ni lihaa jé ba ke Égiptô.

Yéhôva a bi kal bôt ba nlôl Likôl le ba témb ha bañ yak Hérôdé. I ngéda Hérôdé a bi nôgda le i bôt ba, ba nlo ha bé i nyeni, a kala ni hiun. Kiki a bé la bé léba Yésu, a ti oda le ba nôl bon bôlôm ba Bétléhém bobasôna ba ba bééna nwii mi Yésu. Ndi Yésu a bé nkenek behee i Égiptô.

I ngéda Hérôdé a bi wo, Yéhôva a kal Yôsep le: ‘Nano u nla témb.’ Yôsep, Maria ni Yésu ba témb Israel, ba yééne i tison Nasaret.