Yésu a mpubus Témpel

I bibôdle bi sép, i nwii 30 N.Y., Yésu a ke i Yérusalem. Ngandak bôt i bi lo inyu tégbaha ngand Pasa. Kiki lem yap, ba bé ti bilém kiki bisesema i témpel. Ngim bôt i bi lona bilém gwap, ndi bahogi ba bé sômbôl gwap i Yérusalem.

Ngéda Yésu a bi pam i témpel, a tehe bôt ba yé nuñul bilém. Ba bé boñ nyuñga inyu kwo mingwañ, ikété ndap bibégés i Yéhôva yaga! Kii Yésu a bi boñ? A bi yoñ minkôô, a bak hisôô, a pémés mintômba ni nyaga i i bé ikété témpel. A kwés bitéblé bi bahéñha moni isi, yak ni moni nwap. Yésu a añle bôt ba bé nuñul dibeñ le: ‘Hénana gwom bini hana! Ni yilha bañ ndap Tata, homa nyuñga!’

I yom Yésu a bi boñ i bi hélés bôt ba bé i témpel. Hala a hôñlaha banigil ini mbañ i bé pôdôl Mésia le: ‘M’a ba nyonok ni makénd inyu ndap Yéhôva.’

Yésu a bi témb a pubus témpel, i nwii 33 N.Y., inyu ngélé yôhne iba. A bi neebe bé kel to yada le mut a yan ndap Isañ.