Nyemb Yésu i Gôlgôta

Baéga biprisi ba bi kena Yésu i ndap ngomin keñi. Pilatô a bat bo le: ‘Limbe jam libe mut nunu a mboñ?’ Ba timbhe nye le: ‘A nkadba le a yé kiñe!’ Pilatô a bat Yésu le: “Baa u yé Kiñe Lôk Yuda?” Yésu a timbhe, a kal le: “Ane yem i ta bé i nkoñ isi unu.”

I mbus, Pilatô a om Yésu yak Hérôdé, ñane nkoñ Galiléa, inyu tehe too nye a nla lébna nye njom. To Hérôdé a laa bé léba njom yo ki yo i kolba Yésu, a timbis nye yak Pilatô. Ha nyen Pilatô a añle bôt le: ‘To Hérôdé, to me yaga, di nlébna bé i mut nunu ngim njom. Jon me ga kobol nye.’ Limut li lond: ‘Nol nye! Nol nye!’ Bisônda bi bép Yésu disôô, bi tjole nye matai, bi bép nye mabai. Bi ha nye ntut u biloo i ño, bi nolok nye hiol, bi kalak le: ‘Di nyéga, a Kiñe Lôk Yuda.’ Pilatô a tiimba kal limut le: ‘Me nlébna bé i mut nunu béba yo ki yo.’ Ndi ba lond le: “Tômôl nye i kék!” Jon Pilatô a bi nwas le ba nol Yésu.

Ba kena Yésu i homa ba nsébél le Gôlgôta, ba tômôl nye i kék ndi ba téé yo. Yésu a soohe le: ‘A Ta, nwéhél bo, inyule ba nyi bé jam ba yé boñ.’ Bôt ba bé ndegle Yésu, ba kalak nye le: ‘Ibale u yé toi Man Djob, sôs nano i kék! Tohol wemede.’

Ba bi tômôl mintonba ipañ Yésu; wada a kal nye le: “U hoñlak me ngéda u nlo i Ane yoñ.” Ha nyen Yésu a bôn nye le: ‘W’a ba ni me i Paradis.’ I mbus kosi, jiibe li kôp loñ yosôna, li nom ngeñ aa. Ngim banigil i kôôge bebee ni kék, wada wap a bé Maria, nyañ Yésu. Yésu a kal Yôhanes le a tééda Maria kiki nyañ ngwal nye.

Sôk i nsôk, Yésu a kal le: ‘Hala a mal yon!’ A ue ño, a pémés nhébék wé u nsôk. I nlélém ngéda, hisi hi nyeñg ni ngui kiyaga. Nténdéé libadô li témpel, li li bé bagal Homa Mpubhaga ni Homa a Nlôôha Mpubhaga, li wéhi i ñemkété. Ñane mbôgôl bisônda a kal le: ‘Mut nunu a bak toi Man Djob.’