Pétrô a ntañba Yésu

Ngéda a ba i tuñ ngii ni baôma bé, Yésu a bi kal bo le: ‘I u unu, bébobasôna ni ga tjôô me.’ Pétrô a kal le: ‘He me bé! Inyule to ibale bobasôna ba ntjôô we, to kel to yada me ga tjôô bé we.’ Ndi Yésu a añle Pétrô le: ‘Nlôm kôp ngi oñ, u ga tañ ngélé aa le u nyi me.’

Ngéda bisônda bi bi gwel Yésu, bi kena nye yak Kaifa, bebee le baôma bobasôna ba bi ke ngwéé. Ndi baôma iba ba bi noñ limut li bôt. Wada wap a bé Pétrô. A jôp i kotoo i ndap Kaifa, a bôdôl nohop hié. Ngéda mapubi ma bi bép nye i su, hingonda hiada, hi hi bé ngwelnson, hi yi Pétrô, hi kal le: ‘Me nyi we! U bé lôñni Yésu!’

Pétrô a timbhe le: ‘To, me bé nu! Me nyi bé kii u yé kal!’ A bagba, a ke bebee ni likôga. Ndi mbus ha, hingonda hiada hipe, hi yak hio hi bé ngwelnson, hi yi Pétrô, hi añle bôt le: ‘Mut nunu a bé ni Yésu!’ Pétrô a timbhe le: ‘Me nyi bé me to Yésu!’ Mut wada a kal le: ‘U yé wada ikété yap! Hilémb hioñ hi ñunda le u nlôl i Galiléa, kiki Yésu.’ Ndi Pétrô a kum soñ, a kal le: ‘Me nyi bé me nye!’

Ha nyen, nlôm kôp a bi oñ. Pétrô a tehe Yésu a nhielba, a béñge nye. A bigda bibuk Yésu a bi kal nye, a pam ngwéé, a ee ngandak, a siidaga.

Nlélém ngéda, ntôñ bakéés bakeñi u bi kodba yak Kaifa inyu tehe lelaa ba nla gwélél Yésu i bipôdôl gwé. Ba bi mal kit le b’a nol Yésu, ndi nano njom yon ba bé yéñ. Ba bi la bé léba yom yo ki yo. Sôk i nsôk, Kaifa a bat Yésu i mbom mbom le: ‘Baa wee u yé Man Nyambe?’ Yésu a timbhe le: ‘Me yé nye.’ Kaifa a kal le: ‘Di gwé ha bé ki i yéñ njom yo kiki yo. Hana a yé ôbôs Nyambe jôl!’ Likoda jolisôna li neebe, li kal le: ‘Mut nunu a kôli ni nyemb.’ Ba kôt Yésu mabai, ba tjôle nye matai, ba hô nye mis, ba bép nye, ndi ba kalak nye le: ‘Ibale u yé mpôdôl, kal bés njee a mbép we!’

Kel i bi ye bañ, ba kena Yésu i ndap bikééhene, ba tiimba bat nye le: ‘Baa wee u yé Man Djob?’ Yésu a timbhe bo le: ‘Kiki ni nkal, me yé nye.’ Ha nyen ba bi la lébna nye njom, ba kal le a ñôbôs jôl li Nyambe. Ba kena nye i ndap man Rôma, nu a bé ngomin, le Pôntiô Pilatô. Kii i bôña nyoo? Di wan le jam li.