Mbus kel libii

1, 2. Baa i boma mandutu ikété libii, i nkobla le li ñôbi? Toñol.

LIBII li yé likébla li nlôl ni Yéhôva. Li nla ti mut maséé. Ndi to hala, hiki libii li ga boma mé mé mandutu. I nla nene wengoñle mandutu ma ga mal ha bé, kayéle i nla pam le nwaa bo nlôm ba ba ha bé mawanda kiki i bibôdle bi libii jap.

² Hala a nlama bé hélés bés ibale libii jés li mboma mandutu ngim mangéda. Ndi, mandutu ma, ma nkobla bé le libii jés li ñôbi. Yak babiina ba ba bééna mindañ, ba bi léba manjel inyu sañgal nwo ipôla yap, ni inyu lédés libii jap. Lelaa hala?

KÔÔGE NYAMBE BEBEE, NDI W’A KÔÔGE SOBIINA WOÑ BEBEE

3, 4. Kii i nla pam ngim mangéda ikété ndap libii?

³ Libii li ñat bôt iba, ba ba gwé bé bilem gwada, hiki wada wap a gwé mé mam a ngwés, ni ma a ñoo, a gwé ki mé mé mahoñol, ni jé jé liboñok li mam. I nla ki ba le nwaa bo nlôm ba bi nañ bé nya yada, tole ba nlôl bé litén jada. I mbéda ngandak ngéda ni biliya inyu boñ le babiina ba pam i tibil yina.

⁴ Kiki ngéda i ntagbe, nwaa bo nlôm ba nla ba ba pégi ni mam map, kayéle ba bana ha bé ngéda i tégbaha ntôñ. Ndik wengoñle hiki wada wap a gwé yé niñ. Kii i nla hôla bo i kôôge wada ni nuu bebee?

5. (a) Kii i nla hôla kristen i kôôge bebee ni sobiina wé? (b) Inoñnaga ni kaat Lôk Héber 13:4, lelaa di nlama tehe libii?

⁵ Yéhôva a nti bés maéba malam ma ma nla hôla we, i kôôge sobiina woñ bebee. (Tjémbi 25:4; Yésaya 48:17, 18) A nkal bés le: “Libii li ba yaga jam li lipém manjel momasôna.” (Lôk Héber 13:4) Hala a nkobla le di tehe libii kiki jam li ba ndiihe, ni jam li li yé tik. Li yé jam le u nsôñ, ni li u nyan bé. Ñ, hala toi nyen Yéhôva a ngwés le di tehe libii.

GWÉHA NAN INYU YÉHÔVA I NLA HÔLA BÉ

6. Kii kaat Matéô 19:4-6 i niiga bés inyu litehge li Djob li libii?

⁶ Yéhôva nyen a bi bot libii li bisu. Man wé Yésu a kal le: “Baa ni bi añ bé le, nu a hek bo ilo yaga bibéé, a hek bo munlôm ni muda, a kal le: ‘Jo ni jon mut a’ yék isañ bo nyañ, a adbe nwaa wé, boba b’a ba nsôn wada’? Hala nyen ba ta ha bé iba, ndik nsôn wada. Jon jam Nyambe a ñat, mut a bagal bañ jo.” (Matéô 19:4-6) Ibôdôl yaga bibéé, Yéhôva a bé gwés le libii li nom niñ yosôna. A bé gwés le mahaa ma bana maada ma bas bas, le ma niñ ntôñ ikété maséé.

7. Lelaa nwaa bo nlôm ba nla lédés libii jap?

⁷ Ndi i len ini, babiina ba mboma ngandak mandutu ni njôghe iloo ngéda kôba. Ngim mangéda mam ma nla lôôha let kayéle ba hoñol le libii jap li ga nom bé, ba nla yak waa boñ biliya. Ndi i bana litehge li Yéhôva inyu libii, i nla hôla bés.​—1 Yôhanes 5:3.

8, 9. (a) Imbe ngéda di nlama noñ maéba ma Yéhôva inyu libii? (b) Lelaa di nla unda le libii jés li yé tik jam i mis més?

⁸ Maéba ma Yéhôva ma yé ndik inyu loñge yés. Kiki di ntehe, a mbéhe bés le: “Libii li ba yaga jam li lipém.” (Lôk Héber 13:4; Ñañal 5:4) Ibale di noñ maéba ma Yéhôva ngéda mam ma mbep, di ga sôk kôhna bisai.​—1 Tésalônika 1:3; Lôk Héber 6:10.

⁹ Kiki libii jés li nlôôha ba mahee i mis més, di nlama keñgle maboñok, tole bipôdôl gwo ki gwo bi bi nla ôbôs libii jés. Maselna ni hala, di nlama lédés maada més ni sobiina wés. Lelaa di nla pam i boñ hala?

TI LIBII JOÑ LIPÉM NI NJEL BIPÔDÔL GWOÑ NI MABOÑOK MOÑ

10, 11. (a) Mimbe mindañ mabii mahogi ma mboma? (b) Inyuki i yé nseñ le di wan bipôdôl di ngwélél ngéda di mpôdôs sobiina wés?

¹⁰ Mut a nla nôgha sobiina wé njôghe ikété ngandak manjel. Di nyi le, kristen i nlama bé bép sobiina wé kekikel, to nôgha nye njôghe yo ki yo i pes minsôn. Ndi, i nla pam le di babaa nye ni bibuk gwés. Bibuk bi nla babaa kiki pansoñ. Muda wada a nkal le: “Nlô wem a ñôm me bibuk bibe. I yé maliga le me gwé bé mbabaa i i nene i mis, ndi bibuk gwé bibe kiki bo bini le ‘u yéne me nkôô joo!’, ni bipe le ‘me ntehe bé nseñ woñ hana’ bi mal bi mpat me ñem.” Munlôm wada a nkal le nwaa wé a mbéna wéha nye nyuu ni bibuk gwé, a tinak nye môl. A kal le: “Me nla bé tiimba mam a nkal me i bisu bi bôt. Jon me yé me lim nye, ni le me yé me yén i bôlô letee. Me yé nwee nyoo bôlô iloo i mbai yem.” Nyo mbe, bibuk bi mbaabana, ni bipôdôl bi bi nla pat mut ñem, bi ntôl i len ini.

¹¹ Ngéda nwaa bo nlôm ba ñômna bibuk bibe, hala a mbaabana i ñem kayéle mbabaa i, i nla nom inyu mbôôp. I yé ntiik le, hala bé nyen Yéhôva a ngwés le nwaa bo nlôm ba boñ. Ndi i nla pam le mut a babaa sobiina wé nye ngi kôôba. U nla hoñol le u mpôdôs bé sobiina woñ béba, ndi lelaa nyemede a nôgda? Ibale u mpot ngim jam, i i mbabaa sobiina woñ, baa u ga ba bebee i héñha yo?​—Galatia 5:15; añ Efésô 4:31.

12. Lelaa mut a yé mbiibaga a nla nimis maada mé malam ni Yéhôva?

¹² Bipôdôl u gwé ipañ sobiina woñ, ngéda ni yé i ti bôt tole ngéda ni yé ndik bé boba, bi nlôôha ba nseñ i mis ma Yéhôva. (Añ 1 Pétrô 3:7.) Kaat Yakôbô 1:26 i nhôñlaha bés le: “Ibale mut a nhoñol le a yé [ngwélél Djob], ndi a ane bé hilémb hié, a lôgôk ndigi ñem wé, wee base i mut nu i yé yañga.”

13. Ni imbe njel ipe mut a nla babaa sobiina wé?

¹³ Babiina ba nla ki bana maboñok mape ma ma nla unbaha wada ni nuu. Kiki hihéga, lelaa sobiina woñ a nôgda ibale u nkahal lôôs ngandak ngéda ni muda tole ni munlôm numpe? Tole lelaa a nôgda ngeñ u ntégbaha ngandak ngéda i likalô ni mut nu a ta bé sobiina woñ, tole ngeñ u nhôla nye i yémbél mandutu a mboma? Mankéé nu muda wada nu a kôs i nya jam i, a nkal le: “Hala a ntééñga me ngandak i tehe le nlô wem a nyoñ ngandak ngéda inyu muda numpe likoda. Me nôgda wengoñle muda nu a yé nseñ iloo me.”

14. (a) Mambe maliga ma nset bé di nigil i kaat Bibôdle 2:24? (b) Kii di nlama badba?

¹⁴ Bés bikristen, di nlama tôñ ni bagwal bés, ni bilôk bikéé bi likoda. Ndi to hala, ngéda di mbiiba, matéak ma Djob ma yé le sobiina wés nyen a ba mut bisu i niñ yés. Yéhôva a kal le munlôm “a’ yék isañ bo nyañ, a adbe nwaa wé.” (Bibôdle 2:24) Yom sobiina wés a nôgda i nlama bana mahee ngandak i mis més. Badba le: ‘Baa me ntôñ toi sobiina wem, me tinak nye ngéda ni gwéha a gwé toi ngôñ, ni bi bi kôli ni nye?’

15. Inyuki kristen i i yé mbiibaga, i nlama keñgle lem i lôôs ngandak ngéda ni mut nu a ta bé sobiina wé?

¹⁵ Ibale di nlôôha tégbaha ngéda yés ni mut numpe, ibabé ni sobiina wés, hala a’ lona mindañ ikété libii jés. Di yé le di bôdôl nôgda ngôñ i ba lôñ ni mut nu hiki ngéda, tole di nla yak bôdôl gwés nye mu ñem wés. (Matéô 5:28) Gwéha i, i nla keñep kayéle i tinde we i boñ ngim jam i ga hindis libii joñ.

“TO MPUÑGU U BET BAÑ I NAÑ LIBII”

16. Imbe oda Bibel i nti inyu libii?

¹⁶ Mbus mabéhna mana le: “Libii li ba yaga jam li lipém,” Bibel i nkônde le: “To mpuñgu u bet bañ nañ libii, inyule Nyambe nyen a’ pémhene bôt ba biyabda [bôt ba ba ngwés malal ma nyega] ni bôt ba ndéñg mbagi.” (Lôk Héber 13:4) Hana, “nañ libii” i yé malal ipôla nwaa bo nlôm. (Bingéngén 5:18) Lelaa di nla unda le di ndiihe maada ma, ni le di ngwés bé hoo mo mahindi?

17. (a) Lelaa ngandak bôt i ntehe ndéñg i len ini? (b) Ndi lelaa bikristen bi nlama tehe yo?

¹⁷ Bôt bahogi i len ini, ba nhoñol le béba i ta bé i lalna mut numpe, u héya sobiina woñ. Di ta bé le di neebe le mahoñol ma nkoñ isi ma, ma yoña bés. Yéhôva a nyis bés loñge loñge le a ñoo malal ma nyega ni ndéñg. (Añ Rôma 12:9; Lôk Héber 10:31; 12:29) Ibale di mbana maada ma ndéñg ni mut numpe, u héya sobiina wés, ki di ga hoo libii jés mahindi. Ha ngéda i, di ñunda le di ndiihe bé matéak ma Yéhôva, hala a ga boñ le di nimis maada més malam ni nye. Jon di nlama tjél hek kôô mu njel i nkena ndéñg. Mu mam di nla boñ inyu ke haa ni jam li, di nlama keñgle lem i bana mahoñol ma ndéñg inyu mut numpe.​—Hiôb 31:1.

18. (a) Inyuki ndéñg i yé béba nlélém kiki bibégés bi bikwéha bi mop? (b) Lelaa Yéhôva a ntehe ndéñg?

¹⁸ Ngéda nlômbi Israel i bé i si Mbén Môsi, ndéñg i bé béba keñi kiki i bégés bikwéha bi mop. Kogse inyu bibéba bi gwobiba i bé nyemb. (Lôk Lévi 20:2, 10) Mambe maada ma yé ipôla ndéñg ni bibégés bi bikwéha bi mop? Ibale man Lôk Israel a bé bégés bikwéha bi mop, a bé bôk mbônga a bôñôl Yéhôva le a’ téñbe ndik ni nye. Nlélém jam won u bé inyu ndéñg, ngéda mut a bé ke ndéñg, a bé bôk mbônga a bôñôl sobiina wé i téñbe ndik ni nye. (Manyodi 19:5, 6; Ndiimba Mbén 5:9; añ Malaki 2:14.) Ñ, Yéhôva a bé tehe ndéñg ha ngéda i, kiki béba keñi.

19. Kii i nla lédés makidik més i ke ndéñg ngwéé?

¹⁹ Ndi mam ma yé lelaa i len ini? Tolakii di ta ha bé i si Mbén Môsi, litehge li Yéhôva inyu ndéñg li nhéñha bé. Kiki di nla bé hoñol i bégés bikwéha bi mop, hala ki nyen di nlama bé yék sobiina wés inyu ke ndéñg. (Psalm 51:3, 6; Kôlôsé 3:5) Ibale di mboñ hala, wee di nti bé libii lipém, to Yéhôva Djob jés.​—Béñge Ndoñi 26, i mamélél ma kaat.

LELAA U NLA LÉDÉS MAADA MOÑ MA LIBII

20. Lelaa pék i nla ba nseñ ikété libii?

²⁰ Lelaa u nla lédés maada moñ ma libii? Bañga i Djob i nkal le: “Pék yon i ñoñ ndap, i ntééba ki lôñni bañga yi.” (Bingéngén 24:3) Ngim ndap i nla bana lihep, i bak ki hôlô, tole i nla lék, i bak ilam ngi yom yo ki yo i nla hubus niñ i mut yañga, tole i i nla tééñga mbôô wé. Hala a yé nlélém jam ni libii. Mut pék a nyoñ bitelbene le libii jé li pôôna homa nlam ni nu maséé, het ba nléba bé ngim yom i nla hubus niñ i mut yañga, tole i i nla tééñga mbôô wé.

21. Lelaa yi i Bañga i Djob i nla hôla bés i lédés libii?

²¹ Bibel i nkônde kal inyu ndap i le: “Yi yon i nyônôs bituñ lôñni lingwañ jolisôna, li li yé tik, li nti ki maséé.” (Bingéngén 24:4) Mam u nigil mu Bañga i Djob ma nla lémés libii joñ. (Rôma 12:2; Filipi 1:9) Ngéda babiina ba nyoñ ngéda i añ Bibel ni bikaat bi ntôñ, ba nlama kwélél mu jam ba nla boñ inyu ha mam ba nigil i bisélél. Hiki wada wap a nlama yéñ manjel i unda sobiina wé le a ngwés nye ni le a ndiihe nye, nlélém ngéda a yéñék manjel i ba minyaô, a undga pék. U nla bat Yéhôva mahôla i numus bilem bilam bi bi ga lédés maada moñ ni sobiina woñ, ni bi bi nla boñ le u kônde lémél sobiina woñ.​—Bingéngén 15:16, 17; 1 Pétrô 1:7.

22. Inyuki di nlama unda sobiina wés gwéha, ni ti ki nye lipém?

²² Di boñ kii yosôna di nla inyu unda sobiina wés gwéha, ni ti ki nye lipém. Ni njel i nyen, libii jés li ga lôôha ba lilam, li bana ki ngui. Jam li nlôôha nseñ li yé le, d’a kônha ñem u Yéhôva maséé.​—Tjémbi 147:11; Rôma 12:10.