Di kolba dipa di nsohop

1, 2. Kii di nlama yi inyu Satan ni mimbuu nwé mimbe?

NIÑ i ga ba lam kiyaga i mbok yondo Yéhôva a mbôn bés. Ha nyen di ga sôk bana niñ Djob a bé gwés le di bana. Ndi inyu nano, di niñil nkoñ isi u u yé i si énél i Satan ni mimbuu nwé mimbe. (2 Korintô 4:4) Tolakii di ntehe bé bo, di nyi le ba yé, ni le ba gwé ngui ikeñi.

² Munu pes ini, di ga tehe lelaa di nla yén bebee ni Yéhôva, kayéle di sôñ niñ yés i moo ma Satan. Yéhôva a mbôn le, a ga hôla bés. Ndi di nlama tibil yi manjel Satan ni mimbuu nwé mimbe mi ngwélél inyu amb bés, ni i jôs bés.

“KIKI MBONDO NJÉÉ LE I NKÔND”

3. Kii Nsohop a nyéñ boñ bés?

³ Satan a nkadba le bôt ba binam ba ngwélél Yéhôva ni minsoñgi mimbe, ha bé inyule ba ngwés toi Nye, ni le ibale mam ma nlet, ba ga waa sélél Nye. (Añ Hiôb 2:4, 5.) Ngeñ mut a ñunda le a ngwés yi njee a yé Yéhôva, Satan ni mimbuu nwé mimbe ba nyimbe jam li, ba noode ki kéñ mut nu njel le a yi bañ Djob. Ba yé ñunbak ngéda mut a nti nyemede nkikip yak Yéhôva, ni i ngéda a nsôblana. Jon Bibel i nkal le Nsohop “a nhiôm kiki mbondo njéé le i nkônd, a yéñék i nwet a mil.” (1 Pétrô 5:8) Satan a ngwés mélés maada més malam ni Yéhôva.​—Tjémbi 7:2, 3; 2 Timôtéô 3:12.

4, 5. (a) Kii Satan a nla bé boñ bés? (b) “I kolba Nsohop,” i nkobla kii?

⁴ Ndi di nlama bé kon Satan ni mimbuu nwé mimbe woñi. Yéhôva a bi téé minwaa inyu béba ba nla boñ bés. Yéhôva a mbôn le “limut li bôt likeñi” li bañga bikristen li ga pei i “njiiha keñi.” (Masoola 7:9, 14) Nsohop a nla bé kéñ bés i kôs tohi, inyule Yéhôva nyemede a nsôñ litén Jé.

⁵ Ibale di nyén bebee ni Yéhôva, Satan a nla bé ôbôs maada més malam ni Nye. Bañga i Djob i nyis bés ntiik le: “Yéhôva a yé lôñni bé ngéda bé ki ni yé lôñni nye.” (2 Miñañ 15:2; añ 1 Korintô 10:13.) Ngandak bôlôm ni bôda i hémle, ba kôba, kiki bo Abel, Hénok, Nôa, Sara, ni Môsi ba bi kolba Nsohop mu kii ba bi téñbe i yén bebee ni Yéhôva. (Lôk Héber 11:4-40) Yak bés di nla boñ nlélém. Bañga i Djob i nti bés mbônga le: “Kolbana yaga Nsohop, ndi a’ ke bé ngwéé.”​—Yakôbô 4:7.

“DI NSIÑIS . . . MIMBUU MIMBE”

6. Lelaa Satan a njôs bés?

⁶ Tolakii Satan a nyi le Yéhôva a bi tééne nye minwaa inyu béba a nla boñ bés, a nwaa bé boñ biliya gwé gwobisôna i hôyôs maada més malam ni Djob. I len ini, Nsohop a ngwélél ngandak manjel inyu jôs bés, libim li yé dipa a ngwélél ibôdôl dikôô di nwii len. Ikété manjel ma, mambe di nla sima?

7. Inyuki Satan a njôs bagwélél ba Yéhôva?

⁷ Ñôma Yôhanes a tila le: “Nkoñ ’isi wonsôna u niñi isi ane i mut mbe.” (1 Yôhanes 5:19) Satan nyen a ñénél i béba nkoñ isi unu. Ibale ndik nyetama, ki a ñénél yak bagwélél ba Yéhôva. (Mika 4:1; Yôhanes 15:19; Masoola 12:12, 17) Nsohop a nyi le a ngi gwé ndik ndék ngéda, jon a ntét hiki wada wés ni mandutu inyu boñ le di tjôô ndéñbe yés ipañ Djob. Ngim mangéda, Nsohop a njôs bés mbom ni mbom ndi mangéda mape, a njôs bés bisôsôli.

8. Kii hiki kristen i nlama yi?

⁸ Di ñañ i kaat Efésô 6:12 le: “Di nsiñis [tole di “njôs”] . . . mimbuu mimbe mi yé ngii.” Hiki kristen i gwé le i jôs Nsohop ni mimbuu nwé mimbe. Di nlama yi le, i bôt bobasôna ba nti bomede nkikip yak Yéhôva ba njo i gwét bi. Mu kaat ñôma Paul a tilna bikristen bi Efésô, a béhe bo letee ni ngélé aa le bi “telep siñ.”​—Efésô 6:11, 13, 14, MN.

9. Kii Satan ni mimbuu nwé mimbe ba noode boñ bés?

⁹ Satan ni mimbuu nwé mimbe, ba noode yumus bés ni ngandak manjel. I ta bé inyule di mpei i hiandi hiada hi Satan, jon di nla hoñol le, a’ gwel ha bé bés i hiandi hipe. Nsohop a nyéñ yi bibomb gwés inyu pohol dipa a’ gwélél inyu gwel bés. Ndi kiki Bibel i niiga bés i yi tjandi di Nsohop, di nlama bé gwéla mu. (2 Korintô 2:11; béñge Ndoñi 31, i mamélél ma kaat.) Hiandi hiada a ngwélél, hi yé maada ni mimbuu mimbe.

DI YÉN HAA NI MIMBUU MIMBE

10. (a) Kii i yé i bana maada ni mimbuu mimbe? (b) Lelaa Yéhôva a ntehe jam li?

¹⁰ Ikété mam ma ñunda le di gwé maada ni mimbuu mimbe, di nla sima mam ma nloo nokna i bôt ba binam, kiki bo: I bo ngambi, i boñ makañ, i ke liemb, i sébél bawoga. Bibel i nkal bés le, i bana maada ni mimbuu mimbe i “nsuñgaha Yéhôva ñem,” ni le di ta bé le di bana maada ni mimbuu mimbe, ndi di kalak nlélém ngéda le di mbégés Yéhôva. (Ndiimba Mbén 18:10-12; Masoola 21:8) Bikristen bi nlama tjél maada mo ki mo ni mimbuu mimbe.​—Rôma 12:9.

11. Hee lem i yéñ yi mam ma nloo nokna i mut binam, i nla kena bés?

¹¹ Satan a nyi le, ibale di mbéna yéñ yi mam ma nloo nokna i mut binam, i ga bane nye ntombok jam i tinde bés i bana maada ni mimbuu mimbe. I bana maada mo ki mo ni mimbuu mimbe, i ga ôbôs maada més ni Yéhôva.

SATAN A NOODE YUMUS BÉS

12. Lelaa Satan a ngwés yumus mahoñol més?

¹² Satan a noode yumus mahoñol ma bôt. A mboñ le pééna i jôp bo ñem ndék ni ndék, letee ba pam i hoñol le ‘loñge i yé béba, ni le béba i yé loñge.’ (Yésaya 5:20) Nsohop a hôñôs mahoñol mana le, maéba ma Bibel ma ta bé nseñ, ni le di yé le di ba maséé ibale di ntjél nôgôl matéak ma Djob.

13. Lelaa Satan a noode bel pééna i ñem mut?

¹³ I bel pééna i ñem mut, i yé ngim njel Satan a mbéna gwélél. A ngwélél yo ibôdôl behee. Yon a bi gwélél ni Éva i wom Éden, ngéda a bat nye le: “Baa hodo le Nyambe a kal le ni je bañ matam ma bie gwobisôna mu wom?” (Bibôdle 3:1) Mbus ngéda, i dilo di Hiôb, Satan a bat Yéhôva i bisu bi biañgel le: ‘Baa yañga nyen Hiôb a nkon Nyambe woñi?’ (Hiôb 1:9) Mbus sôble i Yésu, Satan a bi kal inyu noode nye le: “Ibale u yé man Nyambe, kal le ngok ini i yila bikoga.”​—Matéô 4:3.

14. Lelaa Satan a ntinde bôt i pééna le maada ni mimbuu mimbe ma yé béba?

¹⁴ Yak i len ini, Nsohop a nke ni bisu i ha pééna miñem mi bôt. A ntinde bo i pééna le maada ni mimbuu mimbe ma yé toi béba, ni ini njel le a mboñ le ngim maada mu i nene lam. Yak bikristen bipe bi bi la bé yimbe i hiandi hi. (2 Korintô 11:3) Jon, kii di yé le di boñ inyu yoñ matat ni i hiandi hi? Lelaa di nla yi ntiik le dipa di Satan, di ta bé i yumus bés? Inyu timbhe mambadga mana, di béñge bahoma iba i het di nla gwéla: mintuk, ni matibla.

A NLÔBÔL BÉS MU MINHEÑA NWÉS NI NGÔÑ YÉS

15. Lelaa di nla bôdôl bana maada ni mimbuu mimbe ni njel mintuk?

¹⁵ I len ini, ngandak bisinima, biliñgeliñge, mintuk mi gém i nkuu biyi (ordinater), ni bisite bi internet, bi ñunda mimbuu mimbe, makañ, ni mam ma nloo nokna i bôt ba binam. Ngandak bôt i ntehe mam ma kiki minjôha, i ntehe bé ki to ndutu i yé le i kôs i ti mimbuu mimbe kunde i jôp biniñ gwap. Mut a nla bôdôl bana maada ni mimbuu mimbe ni njel mam kiki bo ngambi i hilo hi ligwéé, lem i añ mintende mi libai li woo li mut, baleñ mbam, ni ngéda a ngwélél dibaña inyu yi bilôl. Nsohop a nsôô béba di nla kôs mu, a boñok ki le mam ma ma nene malam, hélha, ni kiki minjôha. I nla pam yak le, mut a hoñol le i ta bé béba i béñge biliñgeliñge, bi bi mpôdôl mimbuu mimbe tole mam ma ma nloo nokna i bôt ba binam, ntel ngéda wonsôna mut nu nyemede a gwé bé maada ni mimbuu mimbe. Inyuki mahoñol mana ma yé mabe?​—1 Korintô 10:12.

16. Inyuki di nlama tjél mintuk mi mi ñunda mam ma nloo nokna i bôt ba binam?

¹⁶ Satan ni mimbuu mimbe ba nla bé añ mahoñol més. Ndi ba nla yi mam ma nkon bés ngôñ, ni lelaa di nhoñol, ngéda ba mbéñge makidik di nyoñ inyu yés ni inyu lihaa jés, ibabé i hôya mintuk di mpohol. Kiki hihéga, ngeñ di mpohol bisinima, minsik, tole bikaat bi bi mpôdôl bôt ba mis ma-na, bôt ba nkop makañ, bôt ba gwé mimbuu mimbe, bôt ba ngwei, bakugi, tole i nya mam i, Satan ni mimbuu nwé mimbe b’a yi le di gwé ngôñ i yi mam ba mboñ. Ha ni nyen ba ga kônde ôt bés i bana maada ma bas bas ni bo.​—Añ Galatia 6:7.

17. Himbe hipa Satan a ngwélél inyu noode i bet ba nkon?

¹⁷ Satan a noode ndigi bé gwélél ngôñ yés i mintuk, ndi yak ngôñ yés i ba mbôô. Lelaa hala? I len ini, ngandak bôt i nkon. I nla pam le mut a nkon, a noode ngandak matibla, ndi a la bé to mbôôp. (Markô 5:25, 26) Hala a nla boñ nye le a bôdôl yodop, kayéle a bana ngôñ i noode to mambe matibla mape. Ndi bés bikristen, di nlama yoñ yihe ni matibla ma ma gwé maada ni makañ tole ma ma ngwélél “ngui i makañ.”​—Yésaya 1:13, MN.

18. Mambe matibla kristen i nlama tjél?

¹⁸ I nlômbi Israel, bôt bahogi ba bi gwélél “ngui i makañ.” Yéhôva a kal bo le: “Ngéda ni nsambal moo manan, m’a sude mis, me béñge bé me. Ñ, ngéda ni nsoohe ngandak, m’a emble bé me.” (Yésaya 1:15) Ni hoñol ki​—Yéhôva a bé lama ha bé emble masoohe map! Di nlama bé boñ jam jo ki jo li li nla ôbôs maada més ni Yéhôva, kayéle a laa ha bé hôla bés, téntén ngéda di nkon. (Tjémbi 41:4) Jon, di nlama tibil wan matibla di nsômbôl yoñ, inyu yi too ma gwé maada ni mimbuu mimbe, tole ma ngwélél makeñge ma ma nloo nokna i bôt ba binam. (Matéô 6:13) Ibale i nene toi le, makañ ma yé mu, di nlama tjél mo!​—Béñge Ndoñi 32, i mamélél ma kaat.

NGÉDA MIÑAÑ MI MIMBUU MIMBE MI NTÔL

19. Kii i mboñ le ngandak bôt i kon Nsohop woñi?

¹⁹ Tolakii bôt bahogi ba nhémle bé le Nsohop a yé, yak mimbuu nwé mimbe, bape ba nyi le ba yé toi, inoñnaga ni mam ma bi pémél bo. Ngandak bôt i niñ ikété woñi nkeñi u mimbuu mimbe, ba bak minkol mi bilem bi bi nhôñôs woñi u mimbuu mimbe. Bape ki ba ntôô woñi u mimbuu mimbe ni njel miñañ mi bihélha bi mam mimbuu mimbe mi mboñ bôt ba binam. Miñañ mi, mi mbéna lémél bôt, ba gwéhék ki añle nwo bôt bape. Miñañ mi, mi mbéna tinde bôt i kon Nsohop woñi.

20. Lelaa di nla tjam bitembee bi Satan?

²⁰ Bigda le​—Satan a ngwés le bôt ba binam ba kon nye woñi. (2 Tésalônika 2:9, 10) Ndi kiki Satan a yé mut bitembee, a nyi lelaa a nla yumus mahoñol ma bôt ba ngwés maada ni mimbuu mimbe, ni i tinde bo i hémle mam ma ta bé maliga. I bôt ba, ba nla añal miñañ mi mam ba nhoñol nhoñlak le ba bi tehe, tole mi ba bi nok. Ndi kiki bôt ba ntiimba añle nwo bôt bape, hala nyen ba nkéñbaha mam. Di nyéñ bé hôla Satan i tjam woñi wé, ni njel nya miñañ i.​—Yôhanes 8:44; 2 Timôtéô 2:16.

21. Iloole di añle bôt miñan mi mimbuu mimbe, mambe mam di nla kwélél?

²¹ Ibale ngwélél Yéhôva wada a bi bana maada ni mimbuu mimbe ilole a nyila kristen, a nlama bé tiimba añle bôt bape miñañ nwé ni mimbuu mimbe, bebek inyu nôlha bo. Bagwélél ba Yéhôva ba nlama bé kon maboñok ma Satan ni mimbuu nwé mimbe woñi. Maselna ni hala, di nlama bok mis més yak Yésu, ni i ngui Yéhôva a nti nye. (Lôk Héber 12:2) Yésu a bé tégbaha bé ngéda ni banigil bé inyu añle bo miñan mi mimbuu mimbe. Ndi a bi bok mis mé mu nwin u Ane, ni i pôdôl bo “mam makeñi ma Nyambe.”​—Minson mi baôma 2:11; Lukas 8:1; Rôma 1:11, 12.

22. Mambe makidik u ntéñbe i yoñ?

²² Di hôiga bañ le njômbi i Satan i yé le a mélés maada més ni Yéhôva. A ga noode gwélél manjel momasôna inyu yônôs njômbi yé. Ndi, di nyi dipa di Nsohop loñge loñge, makidik més ma yé ki le, di tjél maada mo ki mo ni mimbuu mimbe. Jon, di ga ‘ti bé ki to Nsohop pôla’ i tômbôs makidik més. (Añ Efésô 4:27.) Ñ, ibale di nkolba Nsohop, di ga ba haa ni dipa tjé, di bak ki i si papai i Yéhôva.​—Efésô 6:11.