Kaat i Juu li bakena ntôñ

A bé ba ni ngwés Yéhôva Nyambe ni Bañga yé, le Bibel:

Yésu a kal le: “N’a yi maliga, ndi maliga m’a yilha bé ngwélés.” (Yôhanes 8:32) Hoñol jam u bi nôgda ngéda u bi léba maliga ma Bibel inyu ngélé yoñ bisu! Kinje maséé u bi nôgda i yi le munu nkoñ isi u bitembee unu, di nla nigil maliga.​—2 Timôtéô 3:1.

Yéhôva Djob a gwé ngôñ le di yi maliga. Ni le kiki di ngwés bôt, di nlama añle bo maliga. Ndi inyu gwélél Djob, di nlama boñ ki mam mape. Di nlama boñ kii yosôna i mbéda i niñ kiki bikristen, inyule di nlôôha diihe matiñ ma Yéhôva. Yésu a bi unda imbe njel i nlôôha ba lam di nla gwélél inyu unda Djob le di ngwés nye. A bi kal le: “Ibale ni ntééda matiñ mem, n’a yén ikété gwéha yem, kiki yak me me bi tééda matiñ ma Tata, me yén ki ikété gwéha yé.”​—Yôhanes 15:10.

Yésu a ngwés toi Isañ, a mboñ ki hiki jam Isañ a nkal nye le a boñ. Ibale di nigle Yésu i niñ yés, Yéhôva a ga gwés bés, hala a ga ti yak bés bañga maséé. Kiki Yésu a bi kal: “Ibale ni nyi mam mana, ni yé nsaibak ibale ni mboñ mo.”​—Yôhanes 13:17.

Di mbot ñem le kaat ini i ga hôla we i nigil lelaa u nla niñ inoñnaga ni Bibel, kayéle u yila liwanda li Nyambe. Masoohe més ma yé le, gwéha yoñ inyu Djob i kônde hol, ni le u tééda wemede ikété “gwéha Nyambe . . . ikepam niñ boga.”​—Yuda 21.