Gwéha i Nyambe i nom boga ni boga

1, 2. Inyuki u ngwés Yéhôva Djob?

BAA u ngwés Djob? Bebek le u ngwés nye ngandak, inyu hala nyen u bi ti wemede nkikip inyu gwélél nye. U nla yak nôgda le a yéne we bañga Liwanda. Ndi Yéhôva a bi gwés we ilole u ngwés nye. Di ñañ i Bibel le: “Bés di ngwés nye, inyule a bôk gwés bés.”​—1 Yôhanes 4:19.

² Hoñol mam momasôna Yéhôva a bi boñ inyu unda bés gwéha yé. A bi ti bés hisi kiki loñge homa liyééne, ni gwom gwobisôna di gwé ngôñ inyu bana niñ i maséé. (Matéô 5:43-48; Masoola 4:11) A gwé ngôñ le di bana maada malam ni nye, ni le a bi ti bés pôla i yi nye. Ngéda di ñañ Bibel, di ñemble Yéhôva. Yak ngéda di nsoohe, a ñemble bés. (Tjémbi 65:3) A ñéga bés, a lédhak ki bés ni ngui mbuu mpubi wé. (Lukas 11:13) A bi om ki tik yé Man hana’ isi inyu kobol bés i mok mi béba ni mi nyemb.​—Añ Yôhanes 3:16; Rôma 5:8.

3. Lelaa di nla tééda maada malam ni Yéhôva?

³ Yoñ le ndék ngéda i bigda liwanda joñ li ñem nyuu jada, li we ni nye ni ma tégbaha mangéda malam ni mangéda mabe. I bi béda le u boñ biliya bi ngui inyu tééda maada ma bas bas ni nye. Nlélém jam won u mbéda inyu ba liwanda li Yéhôva, nu a yé Liwanda li ñem nyuu li mbôk ni li nsôk di yé le di bana. Liwanda jés ni nye li nla nom i boga ni boga. Jon Bibel i nkal bés le: “Ni téédaga bébomede ikété gwéha Nyambe.” (Yuda 21) Lelaa di nla pam i boñ hala? Bibel i ntimbhe le: “Inyule gwéha Nyambe ini, le di tééda matiñ mé, ndi matiñ mé ma ta bé nledek.”​—1 Yôhanes 5:3.

“GWÉHA NYAMBE INI”

4, 5. (a) Bibuk bini le “gwéha Nyambe”, bi nkobla le kii? (b) Lelaa gwéha yoñ inyu Yéhôva i bi bôdôl o ikété ñem woñ?

⁴ Kii Bibel i ngwés kal ni bini bibuk le, “gwéha Nyambe”? Ba mpôdôl bé gwéha Djob inyu yés, ndi gwéha yés inyu yé. Baa u ngi hoñlak ngéda gwéha Djob i bi bôdôl gwéé ñem woñ?

⁵ Bigda lelaa u bi nôgda ngéda u bi tip bôdôl nigil le Yéhôva a gwé ngôñ le u niñ i boga ni boga i mbok yondo. U bi nigil yak lelaa a bi yoñ bitelbene inyu boñ le hala a bôña, ha nyen u nôgda mahee ma likébla Yéhôva a bi ti bés ngéda a bi om mpom wé Man hana isi. (Matéô 20:28; Yôhanes 8:29; Rôma 5:12, 18) Mu kii u bé nigil lelaa Yéhôva a ngwés we, ñem woñ u bi tinde yak we i gwés nye.​—Añ 1 Yôhanes 4:9, 10.

6. I gwés mut i nkobla le kii? Gwéha yoñ inyu Djob i ntinde we i boñ kii?

⁶ Ndi gwéha i, inyu Nyambe i bé ndik bibôdle. Kiki hihéga, ngéda di ngwés mut, di nkal ndik bé nye le: “Me ngwés we.” Gwéha i ntinde bés i boñ mam ma nkônha mut nu maséé. Nlélém jam won u mbôña inyu gwéha yoñ ni Yéhôva. Gwéha i, i ntinde we i boñ mam ma nlémél nye. Ngéda gwéha yoñ ni Yéhôva i bé nañ, hala a bi boñ le u ti wemede nkikip, u kôs ki sôble. Ni njel i, u bi bôn le w’a gwélél Yéhôva i boga ni boga. (Añ Rôma 14:7, 8.) Lelaa u nla yônôs mbônga u?

“DI TÉÉDA MATIÑ MÉ”

7. Ibale di ngwés Yéhôva, kii di ga boñ? Sima matiñ mé mahogi.

⁷ Inyule di ngwés Yéhôva, jon ‘di ntééda matiñ mé.’ Lelaa di nla pam i boñ hala? Di nôgôl nye. Ikété Bibel, di nigil lelaa Yéhôva a ngwés le di niñ. Kiki hihéga, a nkal bés le i yé béba jam i hiôô moog, i nip tole i tembee, i lalna mut we ni nye ni ta bé mbiibaga, tole i bégés mut numpe, tole yom ipe u héya nye Djob.​—1 Korintô 5:11; 6:18; 10:14; Efésô 4:28; Kôlôsé 3:9.

8, 9. Lelaa di nla yi yom Yéhôva a gwé ngôñ le di boñ ngéda mbén Bibel i tôbôtôbô i ta bé? Ti hihéga.

⁸ Inyu lémél Yéhôva, di nlama ndik bé nôgôl mambén mé, ndi di nlama yak yi mahoñol mé. A bi ti bé bés mbôñgô lipep li mambén inyu hiki isii jam di mboñ i niñ yés. Jon ngim mangéda, di nla boma mam le mbén Bibel to yada i mpôdôl bé tôbôtôbô. Lelaa di nla pam i yoñ makidik malam? (Efésô 5:17) Ikété Bibel, di nléba matiñ ma ma yé biniigana bi bisu, ma ma niiga bés lelaa Yéhôva a ntehe mam. Ni le mu kii di ñañ Bibel, di ga pam i yi njee a yé Yéhôva. Di ga nigil mahoñol mé, di pam ki i yi mam a ngwés ni ma a ñoo.​—Añ Tjémbi 97:10; Bingéngén 6:16-19; béñge Ndoñi 1, i mamélél ma kaat.

⁹ Kiki hihéga, mambe makidik di nla yoñ i yi kii di nla béñge i nkuu biliñgeliñge, tole i internet? Yéhôva a nkal bé bés kii di nlama boñ tôbôtôbô. Ndi matiñ a nti bés, ma ga hôla bés i yoñ makidik malam. Ngandak mintuk i len ini, i yôni ni njôô (tole bisañ), ni malal ma nyega. Ikété Bibel, Yéhôva a nkal bés le a “ñoo nu a ngwés njôô” ni le “a’ pémhene. . .bôt ba [malal ma nyega] mbagi.” (Tjémbi 11:5; Lôk Héber 13:4) Lelaa matiñ mana ma nla hôla bés i yoñ makidik malam? Ngéda di nyi le Yéhôva a ñoo ngim jam tole jam li, li yé nyega i mis mé, di nlama keñgle jo.

10, 11. Inyuki di mpohol i nôgôl Yéhôva?

¹⁰ Inyuki di mpohol i nôgôl Yéhôva? Di mboñ bé hala ndik inyule di nke kogse ngwéé, tole inyule di nso mandutu ma ma nla kwél bés ibale di nyoñ makidik mabe. (Galatia 6:7) Mahéñha ni hala, di nôgôl Yéhôva inyule di ngwés nye. Kiki bon le ba ngwés kônha isañ wap maséé, hala ki nyen yak bés di gwé ngôñ i kônha Isañ wés nungingii maséé. Jam lipe li nlôôha bé lilam kiki i yi le Yéhôva a nôgôl bés maséé!​—Tjémbi 5:13; Bingéngén 12:2; béñge Ndoñi 2, i mamélél ma kaat.

¹¹ Di nôgôl ndik bé Yéhôva ngéda hala a tômbôl bés tole ngéda di nla bé boñ nya ipe. Di mpohol bé to mambén ni matiñ di nlama noñ, ndi to tep mo. (Ndiimba Mbén 12:32) Maselna ni hala, di nôgôl nye ni ñem wés wonsôna, kiki ntôp tjémbi nu a kal le: “M’a nok ki lingoñoo inyu matiñ moñ, mon me ngwés.” (Tjémbi 119:47; Rôma 6:17) Di gwé ngôñ i nigle Nôa, nu a bi unda gwéha yé inyu Yéhôva mu kii a boñ mam momasôna Yéhôva a bi bat nye. Bibel i nkal inyu Nôa le: “Hala nyen a boñ.” (Bibôdle 6:22) Baa u gwé ngôñ le Yéhôva a kal nlélém jam inyu yoñ?

12. Lelaa di nla kônha Yéhôva maséé?

¹² Yéhôva a nôgda lelaa ngéda di nôgôl nye? Di “nkônha [ñem wé] maséé.” (Bingéngén 11:20; 27:11) Hoñol le jam li! Di nla nôgha Nhek ngiinda yosôna maséé ngéda di nôgôl nye. Ndi a nyégsa bé bés i boñ hala. Maselna ni hala, a nti bés kunde i pohol. Hala a nkobla le di gwé kunde i pohol i boñ loñge tole i boñ béba. Yéhôva a ngwés le, i gwéha di gwé inyu yé yon i tinde bés i yoñ makidik malam, inyu boñ le di bana niñ i nlôôha lam.​—Ndiimba Mbén 30:15, 16, 19, 20; béñge Ndoñi 3, i mamélél ma kaat.

“MATIÑ MÉ MA TA BÉ NLEDEK”

13, 14. Kii i nyis bés le mambén ma Djob ma nlet bé i nôgôl? Ti hihéga.

¹³ Ibale di nhoñol le matiñ ma Yéhôva ma nlôôha let, tole di ntehe le i nôgôl mo i nha bés mok, kii di nla boñ? Bibel i ntoñol le: “Matiñ mé ma ta bé nledek.” (1 Yôhanes 5:3) I buk Grikia ini le “nledek” i nkobla le “nyédék.” Ikété minlôñ mi Bibel mimpe, ba ngwélél buk i, inyu pôdôl mambén ma ma téé bé, tole inyu pôdôl bôt ba ba nyéñ bémbe bape ni babaa bo. (Matéô 23:4; Minson mi baôma 20:29, 30) Ngobol Bibel ipe le The New English Translation i nkal ha homa nu le: “Matiñ mé ma nyidil bé bés.” Mambén ma Yéhôva “ma nyét” bé, hala wee ma nlôôha bé ba nledek i noñ. Yéhôva mbat bé bés le di boñ mam ma nloo bés.

¹⁴ Kiki hihéga, hégda le u yé hôla liwanda joñ li li yé bôô inyu ke yén i ndap ipe. A mbok gwom gwé gwobisôna ikété minkuu. Minkuu mi yé mu le mi nhoi kayéle mut wada a nla begee nwo, ndi mimpe mi nyét ngandak kayéle i nsômbla bôt iba inyu paa nwo. Baa liwanda joñ li ga bat we le u begee nkuu u nlôôha yét wetama? To jam! Inyuki? Inyule a gwé bé ngôñ le u babaa. Nlélém kiki liwanda joñ, Yéhôva a ga bat bé bés kekikel le di boñ jam li nlôôha lédél bés. (Ndiimba Mbén 30:11-14) Yéhôva a ntibil yi njee di yé. “A nyi maôñg més; a mbigda le di yé nluñ ték.”​—Tjémbi 103:14.

15. Inyuki di yé nkwoog nkaa le mambén ma Yéhôva ma yé inyu loñge yés?

¹⁵ Môsi a kal litén li Israel le mambén ma Yéhôva ma bé inyu “loñge [yap] ngéda yosôna,” ni le i nôgôl mo i bé lama ‘tééda bo i niñ.’ (Ndiimba Mbén 5:28-33; 6:24) Hala a yé ki maliga i len ini. Hiki jam Yéhôva a mbat bés li ga lémés niñ yés. (Añ Yésaya 48:17.) Tata wés le Yéhôva, a nyi hiki ngéda kii i yé loñge inyu yés. (Rôma 11:33) Bibel i nkal bés le: “Nyambe a yé gwéha.” (1 Yôhanes 4:8) Hala a nkobla le gwéha yon i ntinde Yéhôva i pot ni i boñ hiki jam.

16. Lelaa di nyi le di nla ba manôgla tolakii di yé bikwéha bi bôt, ni le di niñ i béba nkoñ isi?

¹⁶ I ta bé jam li ntomb i nôgôl Djob hiki ngéda. Di niñ i béba nkoñ isi u u yé i si énél i Nsohop. A nyéñ tinde bôt i boñ mam mabe. (1 Yôhanes 5:19) Di nlama ki jôs libak jés li kwéha li li ntinde bés i ndogbene Djob. (Rôma 7:21-25) Ndi gwéha inyu Yéhôva i nla ti bés ngui i boñ yom i yé loñge. A ntehe biliya di mboñ inyu nôgôl nye, a nhôla ki bés ni mbuu wé mpubi. (1 Samuel 15:22, 23; Minson mi baôma 5:32) Mbuu mpubi u won u nhôla bés i num matam malam ma ma mboñ le, i nôgôl nye i bane bés jam li ntomb.​—Galatia 5:22, 23.

17, 18. (a) Kii di ga nigil munu kaat ini? (b) Kii di ga kwélél i pes i noñ ha?

¹⁷ Munu kaat ini, di ga nigil lelaa di nla bana niñ i i nlémél Yéhôva. Di ga tehe ki lelaa di nla niñ inoñnaga ni matiñ mé, lôñni mambén mé inyu loñge ni béba. Di bigda le Yéhôva a’ énél bé bés kekikel i nôgôl nye. Ngéda di mpohol i ba manôgla, niñ yés i nkônde lama, di ga bana ki bilôl bilam. Jam li nlôôha mahee li yé le, manôgla més ma ga unda Djob ipam limbe likala di ngwés nye.​—Béñge Ndoñi 4, i mamélél ma kaat.

¹⁸ Inyu hôla bés i yi kii i yé loñge ni kii i yé béba, Yéhôva a bi ti hiki wada wés kiññem. Ibale di niiga kiññem yés, i ga hôla bés i “tééda matiñ mé.” Jon, di badba le: ‘Kii i yé kiññem, ni lelaa di nla niiga yo?’ Di wan jam li.