Majubul

I kaat ini le Bitilna inyu niñ i bikristen i ga bane we nseñ inyu pala léba minlôñ mi Bibel ni miñañ mi mi ga hôla we i yémbél mandutu u mboma hiki kel. I ga hôla yak we i léba minlôñ mi Bibel u nla gwélél inyu lédés lôk kéé, ni i hôla bo i yoñ makidik malam ma ma ga lémél Yéhôva. Pohol ño nkwel u nsômbôl. W’a tehe le hiki ño nkwel u gwé mambadga ni dinyo malép di yom Bibel i nkal inyu jam li. (Béñge minkéñék mi matila le, “Lelaa u nla gwélél i kaat ini.”) U ga pala léba bañga mahôla, maéba ma pék, ni hogbe, ni njel Bañga i Djob. W’a la ki gwélél minlôñ mi Bibel mi inyu tééne bôt likalô tole inyu lédés lôk kéé ni bôt bape, mu kiki ba ntégbaga mangéda mabe, inyu ti bo maéba malam ni ngandak makénd.

Lelaa u nla gwélél i kaat ini

Inyu léba ño nkwel, u nla tila wo mu man winda inyu nyiña, tole u nla boñ nyiña inoñnaga ni maboñ. I kaat ini le Bitilna inyu niñ i bikristen i yé nkabak maboñ masaambok: Mandutu; Maboñok; Likoda; Niñ i hiki kel; Lihaa; Maada ni Djob; ni Bilem. U ga léba ño nkwel u nsômbôl isi liboñ jada mu. Pohol liboñ jada, u bôdôl béñge miño mi minkwel nwé. Ndi ibale u nyimbe bé limbe liboñ li nla bana nkwel u nyéñ, Pohol Nwominsô, u bôdôl béñge miño mi minkwel letee u léba ño nkwel u u nlôôha kiha ni njômbi yoñ. Isi hiki ño nkwel, w’a tehe jôga li matode, ma di nhôñôs matila. Mahogi ma nyigye ngim biniigana, mape ma yé mbadga. Añ minlôñ mi Bibel di nhôñôs matila, mi mi nkiha ni matode ma, u ôt pék mu minlôñ mi, inyu tehe laa mi ntoñol biniigana bi, tole mi ntimbhe mbadga. Ngim mangéda, ño nkwel u yé nkabak ni bon ba miño mi minkwel, inyu hôla we i pala léba litode li tôbôtôbô u nyéñ mu nkwel u. Mangéda mape, w’a tehe matila le, “Béñge yak,” kiki bo ngim minloñ mi Bibel. Mu nyen w’a léba mahoñol mape, ma ma nkiha ni litode li. Ngandak ngélé, u ga tehe matila mana le, “Bigda mini miñañ mi Bibel,” tole “Bigda unu ñañ u Bibel.” I sem kwep, ma gwé dinyo malép di miñañ w’a léba ikété ngim minlôñ mi Bibel, tole biniigana w’a la ôt mu. U bigdaga i sem kwep nu, i ngéda u mba u ñañ minlôñ mi Bibel mi, inyu tibil nok nwo.

I yé maliga le i kaat ini, i nti bé minlôñ mi Bibel nwominsôna mi mpôdôl ngim ño nkwel. Ndi i ga hôla we ngandak i bôdôl nyiña. (Bingéngén 2:1-6) Inyu kônde tém, mu nyiña woñ, mu Bitilna Bipubi. Ngobol mbok yondo, u nla gwélél minlôñ mi Bibel mimpe, mi Bibel i nsima ipañ nlôñ u yé añ, mi mi nla hôla we i kônde nok nlôñ u. U nla ki gwélél “notes d’étude” ikété Bibel ni Pulasi le, Les Saintes Écritures. Traduction du monde nouveau. Gwélél Ñéga inyu nyiña u bikaat bi Mbôgi Yéhôva tole Index des Publications Watch Tower, inyu tibil nok ndoñi i minlôñ mi Bibel, ni nseñ wap. Wan bikaat bi nsôk pam inyu ba nkwoog nkaa le u gwé biniigana bi mondo mu jam u yé yéñ.

Njômbi yés i yé le i kaat ini le, Bitilna inyu niñ i bikristen i hôla we i léba pék ni yi, i hôla ki we i tibil nok i biniigana bi yé ikété Bitilna Bipubi. Kiki u mba u ngwélél i kaat ini, u ga kônde ba nkwoog nkaa le “bañga i Nyambe i yé yômi, i gwé ki ngui.”—Lôk Héber 4:12.