Lelaa isañ a nla ba bebee ni lok yé?

“A PUA, lelaa u nyi ngandak mam hala?” Baa lok nan i ma bat bé i mbadga i? Bebek le, ha ngéda i u bi nôgda maséé i ba isañ. Baa u nlôôha bé ba maséé i ngéda lok yoñ i noñ maéba moñ?a—Bingéngén 23:15, 24.

Mu kiki nwii mi ntagbe, baa lok yoñ i nginda gwéhék we kiki behee? Tole i nene we le kiki a nañ gwéha yé inyu yoñ i sôs? Kii u nla boñ inyu ba bebee ni lok yoñ to hala kiki a yé nañ? Ilole di ntimbhe i mbadga i, di bôk ndugi di béñge kii i nla boñ le i ba isañ man i ba ndutu).

Mandutu maa ni mbéna boma

1.NGÉDA I TA BÉ: Ikété ngandak biloñ, isañ mbai nyen a nyéñ moni inyu jés lihaa jé. Bôlô yé i mbéna boñ le a ba bé i ndap kel yosôna. Bahoma bahogi, basañ ba ntégbaha ndigi ndék ngéda ni bon bap. Kiki hihéga, nyiña wada i loñ Pulasi, u bi léba le, hiki kel, basañ ba nti ndik bon bap yom kiki bo 12 mu ngéda yap.

BADBA LE: Ngeñ yañen me ntégbaha ni lok yem? Mu sonde i nlo, baa me nla bé tila ngéda yosôna me ntégbaha ni nye? Yom u ga léba i ga hélés we.

2. NDÉMBÉL ILAM I NHAÑ: Bôlôm bahogi ba bi tégbaha ndik ndék ngéda ni isañ wap. Mambe mandutu hala a nlona? Jean Marie nu a niñ i loñ Pulasi a nkal le: “Kiki me bé tégbaha bé ngéda ngandak ni pua yem, hala a bi lona me ngandak mandutu, me bé hoñlak bé. Yak i len ini me nginda gwé ndutu i bana minkwel mi ngui ni bilok gwem.” Bôlôm bape ba nlôôha yi isañ wap, ndi maada map ma ta bé malam. Philippe nu a gwé 43 nwii, a nkal le: “Pua yem a bé unda bé bés gwéha ngandak. Me nlama jôs libak li, inyu boñ le me unda lok yem le me ngwés nye ngandak.”

BADBA LE: Baa maada me gwé ni pua yem ma mboñ le me bana bañ maada malam ni lok yem? Baa u nyimbe le bilem bi pua yoñ, bilam tole bibe gwon u kôna?

3. LITEHGE LIBE LI NSON ISAÑ (ça ne m’a pas l’air clair. NGI YI): Bahoma bahogi bôt ba nyi bé imbe soso bôlô isañ man a gwé. Luca nu a bi néñél i pes hiôñg Érôpa a nkal le: “I het me bi néñél, bôt ba nhoñol le yoñ ndun ni bon i yé bôlô i bôda.” I mbok ipe, ba mbat le basañ ba jôha bañ to ndék ni bon bap, hala nyen i yé. George, man Afrika a ntoñol le: “I mbai yés, basañ ba ntuk bé ni bon bap tiga le bon bap ba ti ha bé bo lipém. Memede me nginda ban-ga ndutu i yoñ lok yem kiki liwanda jem.”

BADBA LE: I homa me bi gwééne, kii ba mbémél basañ? Baa ba bi niiga me le bôda bon ba lama néñés bon? Baa ba nti basañ makénd i unda bon bap bôlôm gwéha, tole ba niiga bo le hala a ta bé loñge jam?

Kii u nla boñ ibale u mboma i nya ndutu ini tole ngandak mandutu kiki mana? Béñge maéba ma ma noñ ha.

Bôdôl i ngéda lok yoñ i nginda yii hisiina hi mañge

Bon bôlôm, ibôdôl bo ligwéak ba gwés ba nigle isañ wap. Tibil gwélél i ngéda i, ibôdôl nga nye hisiina. Kii u nlama boñ? Hee u nla lébna ngéda?

Hiki kel i ngéda u nsal, ibale pôla i nene, sal lôñni lok yoñ. Kiki hihéga, i ngéda u nsal i ndap, bat nye le a hôla we. Ti nye man hole, tole man soble inyu bada binan. A ga ba maséé ngandak i sal ipañ yoñ, ndémbél yé: pua wé! Bebek le, i sal hala ni nye i ga yoñ we ngandak ngéda, ndi hala a nlédés maada manan. U niiga ki nye i gwés bôlô. Ibôdôl behee, Bibel i nti basañ bon makénd le, hiki ngéda ba sal lôñni bon bap. Ba gwélél ki i ngéda i, inyu kwel ni bo, ni niiga bo. (Ndiimba mbén 6:6-9) Maéba mana ma nginda yii nseñ yak i len ini.

Jam lipe li yé le, u sal ndigi bañ ni lok yoñ, u nlama ki téé ngim ngéda inyu tuk ni nye. I ta ndigi bé nso ntuk; u nla niiga nye ngandak mam ikété mintuk. Ngandak minyiña i ñunda le, i ngéda isañ a ntuk ni man wé, hala a nti lok yé makénd, a bak makwasi.

Ntuk ipôla man bo isañ u nlôôha ba nseñ. Mut njoñ yi wada le Michel Fize a nkal le: “I ngéda a ntuk ni isañ nyen mañge a ntibil kwel ni isañ. Inyule isañ a ñunda le a ngwés nye, ni bipôdôl gwé yak ni maboñok mé. Ha nyen yak isañ a ñéba nye lelaa a nla unda le a ngwés nye.” André, isañ wada nu a yééne loñ Jaman, a nkal le: “I ngéda lok yem i bé hisiina, di bé mbéna tuk ntôñ, me bé me hôôba nye i moo mem. Mangéda ma di bé tégbaha ntôñ ma bi boñ le a pam i unda me le a ngwés me.”

Isañ bon a nla gwélél ngeñ bon ba nke i nañal inyu lédés maada mé ni bon bé bôlôm. Éñél lok yoñ ngim ñañ. Nwas le a añle we lelaa a ntégbaha kel yé, kii i nlémél nye, ni mambe mandutu a mboma. Ibale u mbéna boñ hala, kiki a mba a nañ, hala a ga tômbôl nye i bana minkwel minlam ni we.

Gwés minlélém mi mam bon banan ba ngwés

Njohok i boñge ihogi i mboñ wengoñle ba ngwés bé kwel ni basañ bap, to hala kiki basañ bap bo ba mboñ kii yosôna ba nla inyu kwel ni bo. Ibale u nôgda kii bo le lok yoñ i ntop bé timbhe we, u kit bañ le a gwé bé ngôñ i kwel ni we. Yéñ manjel mape; bebek le ha nyen a ga bana ngôñ i yiblene we ñem wé.

Jacques, isañ mbai wada nu a niñ i loñ Pulasi, a bééna ndutu i kwel ni lok yé Jérôme. Iloole a nyégsa man wé i pot, a bi héñha likeñge: A bi bôdôl tuk bol ni lok yé. A nkal le: “I mbus bol, di bé di yén isi, inyu noye ndék. Ha nyén lok yem i bé i yiblene me ñem wé. Me nhoñol le, i ngéda di bé di ba ndigi bésbotama, le a bak ndigi ni me, hala a bi boñ le di bana maada ma tôbôtôbô.”

Ndi ibale lok nan a ngwés bé sport? André a nhoñol i ngéda a bé tégbaha ni lok yé, i memle tjôdôk, a nkal le: “Juu di bé bii nténdéé yééne i mbégdé. Di ma hôôba soso mboñ, di nyok ndék jam i lék, di béñgege ngii. Di bé di pôdôl i Nwet a bi hek tjôdôk. Di bé pôdôl ki mam ma mbéñge bés. Di bé di pôdôl bebee le mam momasôna.”—Yésaya 40:25, 26.

Kii u nlama boñ ibale i yom i nlémél lok yoñ i nlémél bé we? I ngéda i, u nlama bii i yom u ngwés ipañ. (Filipi 2:⁠4) Ian, nu a yéne i loñ Afrika Nwelmbok, a nkal le: “Lok yem Vaughan a bé gwés bé hianda minsôn ngandak. A bé gwés avioñ ni mam ma ordinater. Jon me bi jôp i bôlô. Me bi kena nye biboma bi mam ma avioñ, me bé tuk yak bigém bi baluk avioñ. Kiki di bé tégbaha loñge ngéda ntôñ, a bé wo ha bé nyuu i kwel ni me.”

Hôla nye le a nkon ha bañ woñi

“A pua, béñge!” Baa hisiina nan hi lok hi bé hi kal bé hala i ngéda a bé a boñ jam lilam? Nano nu a yé mañge wanda, baa i len ini a nyéñ ki le u bégés yom a boñ? Bebek le to. Ndi maliga ma yé le, i mbéda le u boñ hala inyu boñ le a ba nhôôlak u kristen

Yimbe lelaa Yéhôva nyemede a bi boñ ni man wé wada. I ngéda Yésu a bé bôdlak nson wé hana ’isi, Yéhôva a bi yis bôt i mbamba le a ngwés nye: “Man wem nunu, man wem nu gwéha, a nlémél me.” (Matéô 3:17; 5:48) I maliga, u nlama kodol ni niiga lok yoñ. (Éfésô 6:⁠4) Ndi baa u yé, u yis ki nye le a nkônha we maséé i ngéda a mboñ jam lilam?

Inyu bôlôm bahogi i nlédél bo i kal le jam li nlémél bo tole ba ngwés yom. Bebek le ba néñél i mahaa i het ba bé tehe ndigi mahôha map, ibabé i béñge i mam ba mboñ. Ibale hala nyen i bé i bééni, u nlama boñ biliya bi ngui inyu boñ le lok yoñ i bak nkwoog nkaa ni yom a mboñ. Lelaa u nla pam i boñ hala? Luca, nu di bôk pôdôl, a mbéna sal ni lok yé Manuel nu a gwé 15 nwii. Luca a nkal: “Ngim mangéda me bé me kal Manuel le a bôdôl bôlô nyetama, me bé me yis nye le, ibale a gwé ngôñ ni mahôla mem me ga hôla nye. Libim li ngéda a bé a pamba nyetama. Hala a bé lémél nye ngandak, a nôdaga le a yé nseñ. I ngéda a bé a boñ jam loñge, me bé me bégés nye. To a nlôôha bé boñ jam loñge kiki a sômblak me bé me ti nye bibégés inyu biliya gwé.”

U nla ki ti man woñ makénd, ibale u nhôla nye i nyônôs ngim mam makeñi i niñ yé. Kii u nlama boñ ibale u ntehe le i mbéda nye ngandak ngéda iloo kiki u hoñlak? Tole i mam a nsômbôl boñ ma yé malam, ndi ma yé maselna ni ma u ban-ga ngôñ le a yônôs? Ibale hala, u nlama tiimba wan i mam u mbem le a yônôs. Jacques, nu di bôk di mpôdôl a nkal le: “Me nhôla lok yem i téé mam a ga yônôs i dilo di nlo, me ngwés le i ba mam mé a ngwés, he ma me nsômbôl bé le a yônôs. Me mboñ kii yosôna me nla inyu bigda le, a nlama yônôs njômbi yé kiki nla yé.” Ibale u ñemble mahoñol ma lok yoñ, u bégés nye inyu mam malam a mboñ, u nhôla ki nye i téñbe to ibale mam ma nke bé kiki a nsômbôl, u ga hôla nye i yônôs njômbi yé.

I yé maliga le we ni lok yoñ ni ga bana ndigi ngimanôgla ni mandutu. Ndi nsôk i sôk, lok yoñ i ga ba maséé i ba bebee ni we. Ngo mut nyensôna a ngwés a ntégbaha ngéda ni mut nu a yé bebee i hôla nye.

[Ndoñi]