Njee a yé Djob?

Ngandak bôt i nkal le i nhémle Djob. Ndi bat bo le njee a yé Djob, u ga kôhna mandimbhe mintén mintén. Bana bo Djob a nyai, a yé ki bebee i nôgôs bôt inyu mam mabe ba mboñ. Bape bo a ngwés bôt a nwéhlak ki bo hiki ngéda, to limbe jam ba mboñ. Ndi bape ba nkal le, Djob a yé nonok ni bés, a ntôñ bé to bés. Kiki bôt ba nôgla bé mu jam li, ngandak ipe i yé i kit sem kwep le di nla bé yi njee Djob a yé.

Baa hala a yé nseñ? Ñ. Li yi Djob loñge loñge, li nla lémés njômbi i niñ yoñ. (Minson mi baôma 17:26-28) Kiki u mboñ biliya i kôôge Djob bebee, hala ki nyen a ga gwés we, a hôla ki we. (Yakôbô 4:8) I ngii mam mana momasôna, li tibil yi Djob li nla éga we i njel i nkena niñ boga.​—Yôhanes 17:3.

Lelaa u nla pam i yi njee a yé Djob? Bigda ki mut nu u nyi loñge, bebek liwanda joñ. Lelaa liwanda linan li bi hol? U bi yoñ ngéda i yi jôl jé, libak jé, mam a ngwés ni mam a ñoo, yak mam a bi boñ ni njômbi yé, yak mam mape ki. I mam ma mon ma bi hôla we i kôôge nye bebee​—u bi nigil i yi njee a yé.

Nlélém, di nla pam i yi njee Djob a yé ngéda di nwan mambadga mana:

• JÔL LI DJOB LE NJEE?

• LIMBE LIBAK DJOB A GWÉ?

• KII DJOB A BI BOÑ?

• KII DJOB A GA BOÑ?

• KII LI YI DJOB LI NLA KOBLA INYU YOÑ?

Mbamble unu u ntilba inyu timbhe mambadga ma momasôna ni njel Bibel. Gwigil bi yé munu bi ga hôla ndigi bé we i yi Djob, ndi yak bisai bi bi mbem we ibale u gwé maada ma tôbôtôbô ni nye.