U nlama nigil i yi Djob

Inyu ba liwanda li Djob, u nlama nigil i yi nye. Baa mawanda moñ ma nyi jôl joñ ba tôbôg ki jo? Ntiig. Djob a ngwés le yak we u yi jôl jé ni le u gwélél jo. Jôl li Djob le: Yéhôva. (Hiémbi 83:18; Matéô 6:9) U nlama ki nigil i yi mam a ngwés ni ma a ñoo. U nlama ki yi i bet ba yé mawanda mé ni i bet ba yé baoo bé. Li tibil yi mut li nyoñ ngéda. Bibel i nkal le mut pék a nti nyemede ngéda i nigil yi nje a yé Yéhôva.—Efésô 5:15, 16.

Mawanda ma Djob ma mboñ mam ma nlémél nye. Nun ki mawanda moñ. Ibale u ntééñga mo ni boñ mam ba ñoo, baa n’a kônde ke lôñ? Heni! Nlélém ni Djob, ibale u nsômbôl ba liwanda jé, u nlama boñ mam ma nlémél nye.—Yôhanes 4:24.

Bibase gwobisô bé gwon bi tinde bôt i yila mawanda ma Djob. Yésu, nu a yé liwanda li Djob li ñem nyu, a pôdôl manjel ma. Njel yada i yé keñi, nyonog ni bôt. Njel i i nkena i tjiba. Njel ipe i yé hipagda, ndég bôt yon i nkil mu. Njel i i nkena i niñ boga. Hala a nkobla le ibale u ngwés ba liwanda li Djob, u nlama nigil lelaa u nla tibil bégés nye.—Matéô 7:13, 14.