Di hôlôs likeñge jés inyu likalô​—Tibil gwélél mambadga

INYUKI HALA A YÉ NSEÑ: Ibale “mahoñol ma ñem mut ma yé kiki ndip malép,” mambadga ma yé kiki nlôñga nu a nhôla bés i ôt mo. (Bingéngén 20:5) Mambadga ma nhôla bés i yi mahoñol ma nwet di ntééne likalô. Ngéda di ntibil bat mambadga, mandimbhe ma yé njôôñ. Yésu a bi tibil gwélél mambadga. Lelaa di nla kôna nye?

LELAA DI NLA BOÑ:

• Bat mbadga i ntinde mut i ti mahoñol mé. Yésu a bi bat ngandak mambadga malam inyu yi mahoñol ma banigil bé. (Matéô 16:13-16; be 238 § 3-5) Mambe mambadga u nla bat inyu yi mahoñol ma mut?

• Bat mambadga ma ma nhôla mut i ti ndimbhe. Inyu kodol Pétrô, Yésu a bi bat mambadga, a ti ki Pétrô manjel ma ma bi hôla nye i léba ndimbhe i kôli. (Matéô 17:24-26) Mambe mambadga di nla bat inyu hôla mut i léba ndimbhe i kôli?

• Bégés mut i ngéda a nti ndimbhe. I mbus le nyimbén a bi tibil timbhe, Yésu a bégés nye. (Markô 12:34) Lelaa u nla bégés mut ngéda a timbhe mbadga?

BÉÑGE PES I BISU I VIDÉÔ I GWÉ ÑO LE SAL NLÉLÉM NSON KIKI YÉSU​—NIIGA, I MBUS TIMBHE MANA MAMBADGA:

• Inyuki i ndémbél ini, i ta bé lam to ibale biniigana a ngwélél bi yé maliga?

• Inyuki hala a kôli ndigi bé le di toñol biniigana?

BÉÑGE PES I NYÔNÔS IBA I VIDÉÔ, I MBUS BAT MAMBADGA MANA:

• Lelaa mankéé wés a ngwélél mambadga malam?

• Mambe mam mape makeñge a ngwélél inyu niiga ma nla niiga bés?