Gwélél bividéô inyu niiga banigil boñ ba Bibel

Bititii bi nyoña mahoñol ma mut a mbéñge gwo, bi nhôla ki nye i bigda mam a bi nigil. Yéhôva, Niiga wés Nunkeñi a bi gwélél bititii inyu ti bés biniigana bi ngui. (Bibôdle 15:5; Yérémia 18:1-6) Yak Yésu, Malét Nkeñi a bi boñ nlélém. (Matéô 18:2-6; 22:19-21) Ikété bititii bi bi bane bés nsen nwii mini, di nla sima bividéô. Baa u ntibil gwélél bividéô ngéda u niiga banigil boñ ba Bibel?

Ba bi kôôba jôm li bividéô inyu hôla bés i tégbaha gwigil ikété man kaat le Miñañ minlam mi nlôl ni Djob! Bebee le, hiki ño nkwel u vidéô u nkiha ni mbadga yada ba nléba mu yigil. Ikété bisélél gwés, i homa di nlama unda vidéô a ga nene ni minsonol mi tôbôtôbô. U héya hala, bividéô bipe bi nti biniigana bi bi nlôl bikaat di gwé mu Nkuu wés bisélél inyu niiga.

Baa we ni nnigil woñ ni mpôdôl ngim ño nkwel u u nlédél nye i nok? Tole nnigil woñ a gwé ndutu i tôbôtôbô? Ikété bividéô di nléba i jw.org® ni i JW Nkuu biliñgeliñge®, yéñ ngim vidéô i i nla hôla nye. Bebek we ni nnigil woñ ni nla béñge vidéô yada mu ntôñ, i mbus ni kwélél mu.

Hiki sôñ, bividéô bi mondo bi mpam. Ngéda u mba u mbéñge gwo, ôt mahoñol inyu yi lelaa u nla gwélél gwo ngéda u niiga bôt bape.