A boñge ba wanda ni ‘ligip i boñ minson minlam’

Mu kaat a tilna Titô, ñôma Paul a kal le boñge ba wanda hala wee yak Titô, ba nlama boñ biliya i ba ‘ndémbél i minson minlam ikété manjel momasôna.’ (Titô 2:6, 7) I minlôñ mi noñ mu nlélém pes, Paul a ñunda le Yésu a bi pubus bagwélél ba Yéhôva inyu boñ le ba ‘ligip i boñ minson minlam.’ (Titô 2:14) Pand yada i minson minlam i yé i téé likalô ni i niiga bôt mam ma mbéñge Ane Djob. Ibale u yé mañge wanda, baa u yé le u gwélél ngui yoñ inyu ba nsañal nu pes ngéda tole nsañal nu ngéda yosôna?​—Bingéngén 20:29.

Ibale u gwé ngôñ i ba nsañal, tjek mam ma niñ yoñ kayéle u pam i yônôs njômbi yoñ. (Lukas 14:28-30) Kiki hihéga, lelaa w’a boñ inyu bana koga kel mu kii w’a ba nsañal? Lelaa w’a boñ inyu bana nsoñgi u ngeñ tole ñañga basañal ba nlama ti? Bat Yéhôva mahôla ni njel masoohe. (Tjémbi 37:5) Kwélél mu ni bagwal boñ yak ni basañal ba ba ntoo mu nson wap. I mbus, yoñ makidik ma ma mbéda inyu yônôs njômbi yoñ. Ibabé pééna, Yéhôva a ga sayap biliya gwoñ inyu boñ nson wé!

BÉÑGE VIDÉÔ I GWÉ ÑO LE BOÑGE BA WANDA BA NTI YÉHÔVA LIPÉM, I MBUS TIMBHE MAMBADGA MANA:

• Inyu yila basañal, mambe mandutu ngim lôk kéé i bi yémbél, kii i bi hôla bo?

• Lelaa bagwal ba nla hôla bon bap i yila basañal ba ngéda yosôna?

• Inyuki i yé nseñ i bana ntjega u nson u likalô?

• Ikété likoda, lelaa bilôk bikéé bi nla lôl mankéé nu a yé nsañal i mahôla, bi ti ki nye makénd?

• Bimbe bisai basañal ba gwé?