Di nla bana nsañ i ngéda mandutu

1. Kii i yé “nsañ u Nyambe,” lelaa u nla hôla bés? (Filipi 4:6, 7)

NTÉN nsañ nkoñ ’isi u nyi bé won u yé “nsañ u Nyambe,” u u nlôl ni maada malam di gwé ni Tata wés nu ngii. I ngéda di yé nsañ ni “Nyambe nu nsañ,” di yé nwee. (Añ Filipi 4:6, 7.) Di yé maséé i ba mawanda ni bôt ba ba ngwés nye. Di yé maséé i bana maada ma bas bas ni “Nyambe nu nsañ.” (1 Tésalônika 5:23) I ngéda di nyi Tata wés, di bôdlak nye ñem, di nôglak nye, nsañ u Nyambe u nhôyôs nduña yés i ngéda di ntégabaha mangéda mabe.

2. Kii i nkwés bés nkaa le di nla bana nsañ u Nyambe?

² Baa di nla toi bana nsañ i ngéda di mboma mandutu, kiki bo himala hi kon, bikuu, yubda tole ndééñga? To imbe ndutu mu i nla kônha bés woñi. Ndi Yésu a bi kal banigil bé le: “Miñem minan mi siida bañ, to sehla ni sehla bañ.” (Yôhanes 14:27) Masoda le lôk kéé i bôlôm ni i bôda i bi noñ i maéba ma. Ni mahôla ma Yéhôva, ba bi pam i bana nsañ u Nyambe yak ikété mandutu makeñi.

LELAA DI NLA BANA NSAÑ I NGÉDA HIMALA HI KON HI YÉ

3. Lelaa himala hi kon hi nla boñ le di nimis nsañ wés?

³ Himala hi kon hi nla héñha niñ yés héñha yosôna. Di béñge lelaa himala hi COVID-19 hi bi tééñga ngandak bôt. Nyiña wada u bi unda le libim li bôt li nkal le i bé bo ndutu i ke ’ilo i ngéda himala. I himala hi, hi bi boñ ki le ngandak bôt i bé lôôha tôñ, i nyok maok iloo hihéga, ba ôdôk ki hibañga ngandak, yak mindañ mi bi nai ikété mahaa, bahogi ki ba bi noode nidba. Baa himala hi kon hi yé yak nyoo i bééni? Kii ni yé le ni boñ inyu boñ le ni lôôha bañ tôñ, ndi ni bana nsañ u Nyambe?

4. Inyuki i yi mbañ i Yésu inyu dilo di nsôk i nlona bés nsañ?

⁴ Yésu a bi kal le i dilo di nsôk, makon ni “dimala di ga ba bahoma bahoma.” (Lukas 21:11) Lelaa i yi hala i nlona bés nsañ? Hala a mboñ le dimala di nhélés bé bés. Di nyi le mam ma yé i bôña kiki Yésu a bi kal. Jon di ntehe nseñ i noñ maéba Yésu a bi ti i bôt ba niñ i dilo di nsôk le: “Hala a kônha bañ bé woñi.”​—Matéô 24:6.

5. (a) Inoñnaga ni Filipi 4:8, 9, lelaa di nlama soohe i ngéda himala hi kon hi yé? (b) Lelaa i emble lisoñgol li Bibel i nla hôla we?

⁵ Himala hi kon hi nla boñ le di tôñ ngandak, di kahal ki sehla. Hala a bi pémél sita yada le Desi.b I ngéda manyañ isañ nu mbus, ni man nu bisu nu manyañ isañ nu mañ, yak dokta jé jomede, ba bi wo COVID-19, Desi a bi kon woñi le nyemede a yé le a bana i kon u, a lôôs wo nyañ nu a bé ñunuk. Himala hi bi boñ ki le a kahal tôñ le a nla nimis bôlô yé. Jon a bé badba too a ga la ki somb bijek, a saa ki ndap yé. I ngandak nduña i, i bi yon nye i mahoñol kayéle a bé la ha bé ke ’ilo. Ndi lelaa Desi a bi témbna nsañ wé? A bi soohe Yéhôva le a hôla nye i bana ñem nwee, a hoñlak ndik mam malam. (Añ Filipi 4:8, 9.) A bi emble lelaa Yéhôva a “mpôdôs” nye ni njel lisoñgol li Bibel. A nkal le: “Makiñ malam ma basoñgol Bibel ma bi hôgbaha me, ma hôñlaha ki me le Yéhôva a ntôñ me.”​—Tjémbi 94:19.

6. Lelaa yigil yoñ wemede ni makoda bi ga hôla we?

⁶ Himala hi kon hi nla kéñ we i boñ mam u mbéna boñ, ndi u nwas bañ le hala a sôña we i bana yigil yoñ wemede ni i ke i makoda. Miñañ mi lôk kéé mi mi yé mu bikaat gwés ni mu bividéô, mi nhôñlaha bés le yak lôk kéé yés i bôda ni i bôlôm i ntéñbe i gwélél Yéhôva to i ngéda ba mboma minlélém mi mandutu. (1 Pétrô 5:9) Makoda ma ga hôla we i yônôs ñem woñ ni minlôñ mi Bibel mi mi ntina makénd. Makoda ma nti ki bés pôla i tina makénd bés ni bés. (Rôma 1:11, 12) I ngéda u nhoñol lelaa Yéhôva a nit bagwélél bé i ngéda kon u ngwel bo, i ngéda ba nkon woñi, ni i ngéda ba nôgda binyuu, hémle yoñ i ga kônde let, u ga ba ki nkwoog nkaa le Yéhôva a ga nit yak we.

7. Bimbe biniigana u nla ôt mu ndémbél i ñôma Yôhanes?

⁷ Boñ biliya i kwel ni lôkisoñ i bôda ni i bôlôm. Himala hi nla boñ le u ba bé bebee ni lôk kéé. Ha ngéda i, u nla nôgda kiki ñôma Yôhanes. A bé yéñ tehe liwanda jé Gayô i mbom ni mbom. (3 Yôhanes 13, 14) Ndi Yôhanes a bé yi le inyu ngim ngéda, a ga la bé tehe Gayô. Jon a bi boñ i yom a bé la boñ, a bi tilna Gayô kaat. Ibale u nla bé yuuga lôk kéé yoñ i bôda ni i bôlôm i mbom ni mbom, gwélél téléfôn tole vidéô ni njel internet inyu kwel ni bo, tole inyu tilna bo kaat. I ngéda u ntééda maada ni lôk kéé, u ga nôgda le u ta bé wetama, u bana ki ñem nwee. Ndi ibale u nkahal tôñ ngandak, sébél mimañ, u neebe ki makénd ba ga ti we ni gwéha.​—Yésaya 32:1, 2.

LELAA DI NLA BANA NSAÑ I NGÉDA BIKUU BI NKWÉL BÉS

8. Lelaa bikuu bi nla boñ le u nimis nsañ woñ?

⁸ Ibale malép ma bi bet, ndi ma hô homa nyensôna nyoo nkoñ woñ, tole hisi hi nyeñg, tole hié hion hi bi tjé gwom, hala a nla lona we nduña ntandaa ngéda i mbus. Ibale u nimis mut u ngwés, tole nkus woñ, hala a nla tééñga we, u yé le u lehel ñem, tole u unup. Ndi hala a nkobla bé le u ngwés nkus, tole u gwé bé hémle. Hala a ñunda ndik le u ntégbaha mangéda mabe. Bahogi ba yé yak le ba hoñol le hala a ga tômbôs we. (Hiôb 1:11) Ndi yak mukété mandutu ma, u nla bana nsañ. Lelaa?

9. Lelaa Yésu a bi kôôba bés inyu bikuu?

⁹ Hoñol i yom Yésu a bi kal. Ngim bôt i nkoñ ’isi i nhoñol le bikuu bi ga kwél bé bo kekikel, ndi bés di nyi le bikuu bi ga ba munu ngéda yés. Bihogi mu bi yé ki le bi kwél bés. Yésu a bi kal banigil bé le “nyeñg disi ikeñi” ni bikuu bipe bi ga ba ilole lisuk li nlo. (Lukas 21:11) A bi kal ki le “liyanmbén l’a bôl,” hala ki nyen di ntehe munu ngéda yés. Kiki hihéga, manola ni bisañ bi mbôl, yak bôt ba nai ndik le ba njôs bangomin. (Matéô 24:12) Yésu a bi kal bé kekikel le i bikuu bini bi ga kwel ndik i bôt ba ntjôô Yéhôva. I maliga, bikuu bi ma kwél ngandak bagwélél ba Yéhôva. (Yésaya 57:1; 2 Korintô 11:25) Yéhôva a ga boñ bé manyaga inyu sôñ bés mu bikuu bi gwobisôna, ndi a ga boñ kii yosôna i mbéda inyu hôla bés i bana ñem nwee ni i bana nsañ.

10. Inyuki i kôôba ilole bikuu bi nkwo i ñunda le di gwé hémle? (Bingéngén 22:3)

¹⁰ I ngéda di mbôk di kôôba, hala a ga ba jam li ntomb le di bana ñem nwee i ngéda bikuu bi nkwél bés. Ndi baa ibale di mbôk di kôôba, hala a ñunda le di nhémle bé Yéhôva? To jam. I maliga, i ngéda di nkôôba ilole bikuu bi nkwo, di ñunda toi le di nhémle le Yéhôva a gwé ngui i sôñ bés. Inyuki di nkal hala? Bañga i Djob i nkal bés le di nlama kôôba ilole bikuu bi nkwo. (Añ Bingéngén 22:3.) Ni njel bikaat, makoda ni minlegla i loñge ngéda, ntôñ u Yéhôva u ma kôôba bés ngandak ngélé ilole bikuu bi nkwo.c Baa di mbôdôl Yéhôva ñem? Ibale ñ, wee di noñok ni i maéba ma ibôdôl nano​—ilole bikuu bi nkwo.

11. Kii ndémbél i Margaret i niiga bés?

¹¹ Di yoñ hihéga hi sita yada le Margaret. Ngomin a bi ti nye oda le a nyodi mu ndap yé. Inyuki? Inyule hié hi bé ligis lipan mu nkoñ wé. Kiki ngandak bôt i bé noode ke ngwéé i nlélém ngéda, minloñ mi bi pak ni matôa, njel i tagbe i bé ha bé. I bé ki ndutu i hép loñge inyule hiida hi bé homa nyensôna. Inyu ngim ngéda, Margaret a bé nyégsaga i yégle mukété litôa jé. Ndi a bi pei inyule a bé nkôôbaga. A bééna titii nkoñ mu bot yé, yon i bé hôla nye i yi imbe njel a bé lama yoñ inyu nyodi mu nkoñ. A bi pala ki nôñôl mu njel i ilole mam ma bé bep. Inyu ngôôba yé nyen Margaret a bi pei.

12. Inyuki di nlama noñ biniigana ba nti bés inyu sôñ biniñ ngwés?

¹² Inyu sôñ bés ni sôñ bôt bape, bangomin ba nla ti ngim mambén, ba nla téé mangeñ bôt ba nlama bé pam, ba nla ti oda le bôt ba nyodi mu nkoñ, ba nla ki ti biniigana bipe bi bi yé nseñ. Bôt bape ba mpala bé nôgôl ngomin, tole ba mpééna, inyule ba nyéñ bé nimis nkus wap. Ndi kii bikristen bi nlama boñ? Bibel i nkal bés le: “Inyu sômbôl i Nwet, suhlana bébomede isi hiki mut binam ba ntéé, to isi kiñe inyule a gwé kunde i ngii nan.” (1 Pétrô 2:13, 14) Yak ntôñ u Yéhôva u nti bés biniigana inyu sôñ bés. Ba ma hôñlaha bés ngandak ngélé le di nlama ti mimañ nomba yés téléfôn, i i ga hôla bo i sébél bés ibale mam ma mbep. Baa u mal boñ hala? Ba yé ki le ba kal bés hee di nla léba homa lisolbene, lelaa di nla nyodi mu nkoñ wés, ni lelaa di nla kôhna i gwom bi nla bane bés nseñ. Ba yé ki le ba toñle bés lelaa ni imbe ngéda di nla hôla bôt bape. Ibale di noñ bé i biniigana bi, bésbomede ni mimañ mi likoda, di yé le di nimis biniñ gwés. Di hôiga bañ le mimañ mi ntat bés. (Lôk Héber 13:17) Margaret a bi kal le: “Me yé nkwoog nkaa le me bi pei inyule me bi noñ maéba ma mimañ ni ma ntôñ u Yéhôva.”

13. Kii i bi hôla bikristen, bi bi nke nkoñ wap ngwéé, i tééda maséé map ni nsañ wap?

¹³ Ngandak lôk kéé i bôlôm ni i bôda i bi ke nkoñ wap ngwéé inyule bikuu, gwét tole yubda bi bé nyoo. Ndi ba bi boñ kii yosôna ba nla inyu neebe i mahéñha ma, ba ke ki ni bisu i gwélél Yéhôva ni ngui yap yosôna. Kiki bikristen bi hiai hi bisu, bi ndééñga i bi boñ le bi tjama, hala nyen yak bo ba nke ni bisu i añal “ñañ nlam u bañga i Nyambe.” (Minson mi baôma 8:4) I téé likalô i nhôla bo i bok mahoñol map mu Ane, ha mu mandutu map bé. Inyu hala nyen ba mpam i tééda maséé map ni nsañ wap.

LELAA DI NLA BANA NSAÑ I NGÉDA BA NTÉÉÑGA BÉS

14. Lelaa ndééñga i nla boñ le di nimis nsañ wés?

¹⁴ I ngéda ba ntééñga bés, di nla nimis ngandak mam i i nhôla bés i ba nsañ. Di yé maséé i ngéda di nkodba ibabé i sehla, di téak likalô i mbamba, di boñok mam més kiki di mbéna boñ ibabé i kon woñi le ba nla gwel bés. I ngéda di nimis i mam ma, di yé di kahal tôñ, di konok woñi inyu mam ma nla yik pémél bés. I ta bé béba i nôgda hala, ndi di nlama yoñ yihe. Yésu a bi kal le ndééñga i nla boñ le banigil bé ba baage. (Yôhanes 16:1, 2) Kii ni i nla hôla bés i tééda nsañ wés i ngéda ba ntééñga bés?

15. Inyuki di nlama bé kon ndééñga woñi? (Yôhanes 15:20; 16:33)

¹⁵ Bibel i nkal bés le: “I bôt bobasôna ba ngwés niñ ikété adna ni Kristô Yésu, ba téñbege i gwélél Nyambe, yak bo b’a kôhna ndééñga.” (2 Timôtéô 3:12) I ngéda ba bi sôña nson wés nyoo i loñ yé, mankéé wada le Andrei a bé neebe bé le bagwélél ba Yéhôva bobasôna ba nla kôhna ndééñga. A bé kalba le: ‘Mbôgi Yéhôva i yé ngandak munu. Lelaa ngomin a yé le a gwel bésbobasôna?’ I mahoñol ma, ma bi lona bé Andrei nsañ, ndi ma bi boñ le a tôñ ngandak. Ini lôk kéé ipe i bi bii mam i moo ma Yéhôva, i bé hoñol bé le baane ba ta bé le ba gwel bo. Kiki ba bé neebe le ba yé le ba gwel bo, hala a bé boñ le ba bé tôñ bé ngandak kiki Andrei. Jon Andrei a bi yoñ makidik le a nigle bo, yak nye a kahal nwas mam i moo ma Yéhôva. I mbus ngéda, a kahal nôgda nsañ. I len ini, a ntééda maséé mé, to hala kiki mandutu ma ngi yii ngandak. Nlélém jam won u nla pémél bés. To hala kiki Yésu a bi kal le di nlama bem le di ga boma ndééñga, a bi ti bés botñem le di nla téñbe ni Yéhôva ipam lisuk.​—Añ Yôhanes 15:20; 16:33.

16. Bimbe biniigana di nlama noñ i ngéda di mboma ndééñga?

¹⁶ I ngéda ba nsôña nson wés, tole ba nti bés ngandak bikila, hikuu hi loñ tole mimañ mi yé le mi ti bés biniigana. I biniigana bi, bi yé inyu sôñ bés, ni inyu boñ le di kôhna bijek bi mbuu, di kee ki ni bisu i téé likalô kiki la yés. Boñ kii yosôna u nla inyu noñ i biniigana bi, to ibale u ntibil bé nok inyuki ba nti gwo. (Yakôbô 3:17) U yeelene bañ mut a kôli bé yi mam ma ma mbéñge lôk kéé yés i bôda ni i bôlôm, to mam ma ma mbéñge likoda.​—Ñañal 3:7.

17. Kiki baôma i hiai hi bisu, mambe makidik di mal yoñ?

¹⁷ Njom yada i i ntinde Satan i jôs litén li Djob i yé le li ngwel “nson i bok mbôgi inyu Yésu.” (Masoola 12:17) U nwas bañ le Satan ni nkoñ ’isi ba kônha we woñi. I ngéda di ntéé likalô, di niigaga bôt yak i ngéda di mboma ngolba, hala a mboñ le di yé maséé, di nôgda ki le di yé nsañ. I hiai hi bisu, i ngéda baane ba Lôk Yuda ba bi ti baôma oda le ba téé ha bañ likalô, i bôt ba hémle bana ba bi pohol i nôgôl Djob. Ba bi ke ni bisu i téé likalô. I nson u, u bé lona bo maséé. (Minson mi baôma 5:27-29, 41, 42) I yé maliga le i ngéda ba ntééne bés ngandak bikila mu nson wés, di nlama yoñ yihe i ngéda di ntéé likalô. (Matéô 10:16) Ndi ibale di mboñ kii yosôna di nla, di ga bana nsañ ibale di nlémél Yéhôva, di añlak ñañ u u ntohol bôt.

“NYAMBE NU NSAÑ A GA BA LÔÑNI BÉ”

18. Di nlama tééda le bañga nsañ i nlôl hee?

¹⁸ Di ba nkwoog nkaa le to ibale mandutu ma nai, di nla bana nsañ. Di nlama bigda le nsañ di gwé ngôñ ha ngéda i, u yé nsañ u Nyambe, hala wee nsañ Yéhôva nyetama a nla ti. Bôdlana Yéhôva ñem i ngéda ni mboma himala hi kon, bikuu, tole ndééñga. Ni adbe ntôñ wé. Ni hoñol mam malam ma mbem bé i dilo di nlo. Ibale ni mboñ hala, “Nyambe nu nsañ a ga ba lôñni bé.” (Filipi 4:9) Mu yigil i noñ, di ga tehe lelaa di nla hôla lôk kéé yés i i mboma njiiha, i bana nsañ u Nyambe.