Baa u yik hala?

Inyuki bakén ba bôt ba bé ikété ntôñ gwét u Kiñe David?

NTÔÑ gwét u Kiñe David u bééna bakén ba bôt kiki bo Zélek man Lôk Amôn, Uriya man Lôk Hét ni Itma mut Môab.a (1 Miñañ 11:​39, 41, 46) Ntôñ gwét u David u bééna yak “bôt ba Kéret . . . bôt ba Pélet . . . ni bôt ba Gat.” (2 Samuel 15:18) I mpôna le bôt ba Kéret ni bôt ba Pélet ba bé i lihaa li bon ba Filistia. (Ézékiel 25:16) Lôk Gat i nlôl i tison yada i loñ Filistia le Gat.​—Yôsua 13:​2, 3; 1 Samuel 6:​17, 18.

Inyuki David a bi neebe le i nya bôt i i jôp ikété ntôñ wé gwét? A bé nkwoog nkaa le ba ntéñbe ndik bé ni nye, ndi yak ni Yéhôva. Kiki hihéga, inyu Lôk Kéret ni Lôk Pélet, i kaat ini le The New Interpreter’s Dictionary of the Bible i nkal le: “Ba bi téñbe ni David mu mandutu momasôna a bi boma mu ane yé.” Lelaa ba bi boñ hala? I ngéda “bôt ba Israel” ba bi waa noñ David, ba kahal noñ “mut yubda wada . . . le Séba,” Lôk Kéret ni Lôk Pélet i bi yén ipañ David, ba hôla nye i jôs Séba gwét. (2 Samuel 20:​1, 2, 7) Lisañga lipe, man Kiñe David wada le Adôniya a bi noode kadal yééne ane. Ndi Lôk Kéret ni Lôk Pélet i bi téñbe ni David, i boñ ki le Salômô a bet i yééne ane, inyule nyen Yéhôva a bi pohol inyu yiha isañ.​—1 Bikiñe 1:​24-27, 38, 39.

Nkén mut numpe nu a bi téñbe ni David a bé Itai man Lôk Gat. Itai ni 600 yé i bajogwét ba bi nit Kiñe David i ngéda man wé Absalôm a bi noode boñ le bon bôlôm ba Israel ba noñ nye inyu kadal yééne ane i isañ. David a bi kal Itai le kiki a yé kén mut, a ta bé nyégsaga i noñ nye mu gwét bi. Ndi Itai a timbhe le: “Me nkum soñ ni niñ i Yéhôva, me nkum ki soñ i jôl joñ a kiñe, a we nu u niñ, le m’a noñ we to hee homa u ga ke, to inyu nyemb, to inyu niñ!”​—2 Samuel 15:​6, 18-21.

Tolakii Lôk Kéret, Lôk Pélet, ni Lôk Gat i bé bakén ba bôt, ba bé ti Yéhôva lipém, ba yik le nyen a yé bañga Djob, ba neebege ki le David a yé nhook wé. David a bi lama ti Nyambe mayéga inyu i nya bôt i i bi téñbe ni nye!