Lelaa di nlama tehe jôl li Yéhôva?

1-2. Kii i nyis bés le jôl li Yéhôva li yéne Yésu nseñ?

YOM yo ki yo i ta bé nseñ i niñ i Yésu kiki jôl li Yéhôva. Mut nye ki nye a bi yis bé bôt jôl li Yéhôva kiki Yésu. I yigil i ntagbe, di bi tehe le Yésu a bi wo inyu jôl li Yéhôva, a unda ki le Satan a yé mut bitembee. (Markô 14:36; Lôk Héber 10:​7-9) I lisuk li Ane hikôô nwii, Yésu a ntimbhe Yéhôva Ane yé inyu pubus jôl jé. (1 Korintô 15:​26-28) Gwéha Yésu a ngwés jôl li Yéhôva i ñunda toi le a yé liwanda li Yéhôva. Ibabé pééna, a ngwés Yéhôva ngandak.

² Yésu a bi lo hana ’isi i jôl li Isañ. (Yôhanes 5:43; 12:13) A bi yis banigil bé jôl li Yéhôva. (Yôhanes 17:​6, 26) A bi niiga bôt, a boñ ki bihélha bi mam i jôl li Yéhôva. (Yôhanes 10:25) Yésu a bi soohe Isañ le a tééda banigil bé ‘inyu jôl jé.’ (Yôhanes 17:11) I ngéda di ntehe lelaa Yésu a ngwés jôl li Yéhôva, di mbadba le: ‘Lelaa bôt ba nkadba le ba yé banigil ba Kristô, ndi ba yi bé jôl li Yéhôva, ba gwélél bé to jo?’

3. Kii d’a tehe munu yigil ini?

³ Bés bikristen di noode odop mu mabal ma Yésu, di gwéhék jôl li Isañ. (1 Pétrô 2:21) I yigil ini i ga unda bés inyuki bôt ba ñañal “ñañ nlam u Ane” ba nsébla le Mbôgi Yéhôva. (Matéô 24:14) Di ga tehe ki lelaa hiki wada wés a nlama tehe jôl li Yéhôva.

‘BÔT INYU JÔL JÉ’

4. (a) Imbe bôlô Yésu a bi ti banigil bé ilole a nke i ngii? (b) Imbe mbadga di ga timbhe?

⁴ Ilole Yésu a ntémb i ngii, a bi kal banigil bé le: “N’a kôhna ngui i ngéda mbuu mpubi w’a lo i ngii nan, ha nyen n’a ba mbôgi yem i Yérusalem, i Yudéa yosôna ni i Samaria, letee ni masuk ma ’isi.” (Minson mi baôma 1:8) Hala a nkobla le ñañ nlam u bé lama ndik bé añlana i loñ Israel ndi yak bahoma bape. I mbus ngéda, bôt ba biloñ gwobisôna ba bé le ba yila banigil ba Yésu. (Matéô 28:​19, 20) Ndi ni nyimbe le Yésu a bi kal le: “N’a ba mbôgi yem.” Baa banigil ba Yésu ba bé Mbôgi Yéhôva, tole ba bé ndik mbôgi Yésu? Kaat Minson mi baôma pes 15 i ntimbhe i mbadga i.

5. Lelaa baôma ni mimañ mi Yérusalem ba bi unda le bôt ba nlama yi jôl li Yéhôva? (Béñge yak titii.)

⁵ I nwii 49 N.Y., baôma ni mimañ ba bi bomna i Yérusalem inyu tehe kii bôt ba biloñ bipe, ba ba bé ngi kweeba, ba bé lama boñ inyu yila bikristen. I ngéda nkwel u bé bebee ni mal, Yakôbô manyañ Yésu a bi yoñ hop, a kal le: “[Pétrô] a ntibil toñol lelaa inyu ngélé bisu Nyambe a bi yoñ ngéda i biloñ bipe le a pémés bôt ikété yap inyu jôl jé.” Limbe jôl Yakôbô a mpôdôl hana? A bi sima bibuk bi mpôdôl Amôs, a kal le: “Inyu boñ le i bôt ba nyégle ba yéñ Yéhôva ni ñem wap wonsôna, lôñ yada ni bôt ba biloñ bipe ba ba nsébla ni jôl jem. Me Yéhôva, men me mpot.” (Minson mi baôma 15:​14-18) Banigil ba Yésu ba bé lama yi jôl li Yéhôva, ba ba ki ‘Mbôgi Yéhôva.’ Hala a nkobla le bôt ba bé lama tehe bo kiki bagwélél ba Yéhôva.

6-7. (a) Kii Yésu a bi lo i boñ hana ’isi? (b) Kii ipe Yésu a bi boñ?

⁶ Jôl li Yésu li nkobla le “Yéhôva a yé Tohi,” Yéhôva a bi gwélél ki nye inyu tohol i bôt ba nhémle. Yésu a bi lo hana ’isi, a ti niñ yé inyu tohol bôt ba binam. (Matéô 20:28) Nyemb yé i bi boñ le bôt ba binam ba tohlana, ba bana ki botñem i niñ boga.​—Yôhanes 3:16.

⁷ Ndi inyuki i bé béda le bôt ba binam ba tohlana? Inyule bagwal bés ba bisu ba bi kand kuu i wom Éden. I yigil i ntagbe, di bi tehe le Adam bo Éva ba bi ndogbene Yéhôva, ba nimis niñ boga. (Bibôdle 3:​6, 24) Ndi jam lipe li bé nseñ iloo tohi i bôt ba binam. Satan a bi ôbôs jôl li Yéhôva. (Bibôdle 3:​4, 5) Jon i bé béda le mbôda Adam bo Éva i tohlana, yak jôl li Yéhôva li pubhana. Yésu a bi lo hana ’isi i jôl li Yéhôva, a nôgôl ki mam momasôna Yéhôva a bi kal nye, jon a bé a kôli pubus jôl jé.

8. Kii banigil ba Yésu ba bé lama yi?

⁸ I bé béda le i bôt bobasôna ba nhémle Yésu, Lôk Yuda ni bôt ba matén mape ba yi le tohi yap i nlôl yak Yéhôva Nyambe, Isañ Yésu. (Yôhanes 17:3) Jam lipe li yé le kiki Yésu, yak bo ba bé Mbôgi Yéhôva. I bé béda le ba yi le jôl li Yéhôva li nlama pubhana. Mu nyen tohi yap i bé lôl. (Minson mi baôma 2:​21, 22) Jon i bé béda le banigil ba Yésu ba yi Yéhôva, ba yi yak Yésu. Inyu hala nyen Yésu a bi mélés masoohe mé i kaat Yôhanes 17 ni i bibuk bini le: “Me bi boñ le ba yi jôl joñ, m’a kônde ki boñ le li yiba, le ndi gwéha u bi gwés me, yak bo ba unda yo bape, me bak ki ikété adna ni bo.”​—Yôhanes 17:26.

“NI YÉ MBÔGI YEM”

9. Lelaa di nla unda le jôl li Yéhôva li yéne bés nseñ?

⁹ Kiki di ntip tehe, banigil ba Yésu bobasôna ba nlama pubus jôl li Yéhôva. (Matéô 6:​9, 10) Ba nlama yi le jôl li Yéhôva li nloo môl momasôna. Maboñok map ma nlama unda le ba nyi hala. Ndi kii di nla boñ inyu pubus jôl li Yéhôva, inyu unda le Satan a yé mut bitembee?

10. Kii Kaat Yésaya pes 42-44 i mpôdôl? (Yésaya 43:9; 44:​7-9) (Béñge yak titii.)

¹⁰ Kaat Yésaya pes 42-44 i ñunda bés bôlô di nlama sal inyu pubus jôl li Yéhôva. Mu bipes bi, a yé ndik wee bôt ba yé i bikééhene, ba nlama unda njee a yé toi bañga Djob. Yéhôva a nkal i bet ba nkadba le ba yé banyambe le ba unda toi le ba yé banyambe. A nsébél yak bôt ba mbôgi le ba unda le i banyambe ba, ba yé toi banyambe. Ndi baa wee!​—Añ Yésaya 43:9; 44:​7-9.

11. Kii Yéhôva a nkal bagwélél bé i kaat Yésaya 43:​10-12?

¹¹ Añ Yésaya 43:​10-12. Yéhôva a nkal bagwélél bé le: “Ni yé mbôgi yem, me, me yé Nyambe.” Yéhôva a mbat ki bo i mbadga ini le: “Baa Nyambe numpe a yé, handugi me?” (Yésaya 44:8) Kinje bisai di gwé i timbhe i mbadga i! Di ñunda ni bibuk gwés, yak ni maboñok més le Yéhôva a yé toi bañga Nyambe. Jôl Jé li nloo môl momasôna. Di ñunda le di ngwés toi Yéhôva, di téñbege i gwélél nye to Satan a mboñ kii bés. I ngéda di mboñ hala, di mpubus jôl li Yéhôva.

12. Lelaa mbañ i yé kaat Yésaya 40:​3, 5 i bi yon?

¹² I ngéda di mpubus jôl li Yéhôva, di noñ ndémbél i Yésu Kristô. Yésaya a bi kal ki le mut a bé lama ‘sañal [tole, ‘kôôba,’ buk isi lipep.] njel i Yéhôva.’ Lelaa bibañga bini bi bi yon? Yôhanes Nsôble a bi kôôba njel i Yésu i ngéda Yésu a bi lo hana ’isi i jôl li Yéhôva, a pot ki i jôl li Yéhôva. (Matéô 3:3; Markô 1:​2-4; Lukas 3:​3-6) Mu nlélém mbañ u, Yésaya a nkal le: “Lipém li Yéhôva li ga nene.” (Yésaya 40:5) Lelaa i mbañ i, i bi yon? I ngéda Yésu a bé hana ’isi, a bé boñ mam wengoñle Yéhôva nyemede mede nyen a bé hana ’isi.​—Yôhanes 12:45.

13. Lelaa di yé le di nigle Yésu?

¹³ Yak bés di yé Mbôgi Yéhôva kiki Yésu. Di ñañle bôt bobasôna bihélha bi mam Yéhôva a bi boñ. Ndi inyu boñ le di kônde lémés bôlô yés, di nlama yak yis bôt kii Yésu a bi boñ inyu pubus jôl li Yéhôva. (Minson mi baôma 1:8) Yésu a yé Mbôgi Yéhôva i bisu, di nlama nigle nye. (Masoola 1:5) Ndi lelaa hiki wada wés a nlama tehe jôl li Yéhôva?

LELAA DI NTEHE JÔL LI YÉHÔVA?

14. Inoñnaga ni kaat Tjémbi 105:​3, lelaa di ntehe jôl li Yéhôva?

¹⁴ Di nkadba inyu jôl li Yéhôva. (Añ Tjémbi 105:3.) Yéhôva a nlôôha kon maséé i ngéda di nkadba inyu jôl jé. (Yérémia 9:​23, 24; 1 Korintô 1:31; 2 Korintô 10:17) I ‘kadba inyu Yéhôva’ i nkobla le di nyegep inyule di nyi le Yéhôva a yé Nyambe wés. I pubus jôl jé i yé toi bisai inyu yés. Di wo bañ nyuu i kal bôt i bôlô, i suklu, i homa di nyééne, ni bahoma bape ki, le di yé Mbôgi Yéhôva! Nsohop a nsômbôl le di waa niiga bôt jôl li Yéhôva. (Yérémia 11:21; Masoola 12:17) Satan ni bôt bé, ba gwé ngôñ le bôt ba yi bañ jôl li Yéhôva. (Yérémia 23:​26, 27) Ndi kiki di ngwés jôl li Yéhôva, di yé maséé i bégés nye ngéda yosôna.​—Tjémbi 5:11; 89:16.

15. I loñdôl jôl li Yéhôva wee kii?

¹⁵ Di nwaa bé lôndôl jôl li Yéhôva. (Yôel 2:32; Rôma 10:​13, 14) I lôndôl jôl li Yéhôva i nkobla ndik bé le di yi jôl jé, di gwélél ki jo. Ndi di nlama yi Yéhôva, di bôdôl nye ñem, di bat nye mahôla, di nwas ki le nyen a éga bés. (Tjémbi 20:7; 99:6; 116:4; 145:18) Di niiga ki bôt jôl jé ni bilem gwé, di kalak bo le ba tam bibéba gwap, ni le ba nôgôl Yéhôva inyu boñ le ba lémél nye.​—Yésaya 12:4; Minson mi baôma 2:​21, 38.

16. Lelaa di nla unda le Satan a yé mut bitembee?

¹⁶ Di yé bebee i nok ndutu inyu jôl li Yéhôva. (Yakôbô 5:​10, 11) I ngéda di ntéñbe i gwélél Yéhôva ikété ndutu, di ñunda le Satan a yé mut bitembee. I dilo di Hiôb, Satan a bi ôm bagwélél ba Yéhôva nsohi le: “Mut a’ ti gwom gwobisôna a gwé inyu sôñ niñ yé.” (Hiôb 2:4) Nye yagi di ngwélél ndik Yéhôva i ngéda mam més ma nke loñge ni le ibale mandutu ma ntihba bés loñge loñge, di ga kôm Yéhôva mbus. Hiôb a bi unda le Satan a ntembee. Yak bés di nla unda le to kii Satan a mboñ bés, di yé mbén i kôm Yéhôva mbus. Di nyi le Yéhôva a’ waa bé tat bés inyu jôl jé.​—Yôhanes 17:11.

17. Inoñnaga ni 1 Pétrô 2:​12, kii ipe di nla boñ inyu ti jôl li Yéhôva lipém?

¹⁷ Di nti jôl li Yéhôva lipém. (Bingéngén 30:9; Yérémia 7:​8-11) Bôt ba nyi le di yé Mbôgi Yéhôva, jon di yé le di hindis jôl jé, tole di yé le di ti jo lipém. (Añ 1 Pétrô 2:12.) Inyu hala nyen di nlama boñ kii yosôna di nla inyu ti jôl li Yéhôva lipém ni bipôdôl gwés, yak ni maboñok més. Ibale di mboñ hala, tolakii di ta bé peles, di ga ti jôl jé lipém.

18. Kii ipe di nla boñ inyu unda le jôl li Yéhôva li yéne bés nseñ? (Béñge yak buk isi lipep.)

¹⁸ Di nti jôl li Yéhôva lipém to ibale bôt ba ñôbôs bés jôl. (Tjémbi 138:2) Gwéha di ngwés jôl li Yéhôva i nla boñ le bôt ba ôbôs bés jôl.a Yésu a bi neebe le ba wéha nye nyuu, ba nol nye kiki ntonba inyule a bééna ngôñ i ti jôl li Yéhôva lipém. A bi “yan wonyuu,” hala a nkobla le to kii bôt ba bé pot, to kii ba bé hoñol, a bééna bé jam mu. (Lôk Héber 12:​2-4) Ngôñ yé i bé ndik le a boñ sômbôl i Nyambe.​—Matéô 26:39.

19. Lelaa di ntehe jôl li Yéhôva, inyuki?

¹⁹ Di yé maséé i ba bagwélél ba Yéhôva, di yé ki maséé i ngéda ba nsébél bés le Mbôgi Yéhôva. Inyu hala nyen di nwaa bé ti jôl jé lipém, to bôt bape ba nyan bés. Di nti jôl li Yéhôva lipém to ibale bôt bape ba ñôbôs bés jôl. Di kee ni bisu i ti jôl li Yéhôva lipém, to Satan a mboñ kii bés. Ibale di mboñ hala, d’a unda le kiki Yésu, jôl li Yéhôva li yéne bés nseñ iloo mam momasôna.