Inyuki Mbôgi Yéhôva i bi héñha linogok jap li ngim mam ba bé hémle?

Bibel yon di ngwélél hiki ngéda kiki lipigil li mam momasôna di nhémle; jon i yé i pam le di kodol litehge jés li ngim mam di bé hémle, inoñnaga ni kiki linogok jés li Bitilna li nkeñep.a

I nya mahéñha i, i nkiha lôñni litiñ li Bibel di ñañ i kaat Bingéngén 4:​18: “Njel bôt ba téé sép i yé kiki mapubi ma maye ma kel, mon ma mbai, bai ni bai letee ni njamuha yaga.” Nlélém kiki mapubi ma maye ma kel ma nsas jiibe ndék ni ndék, ma yelak mam ma nen-ge bé, hala nyen Nyambe a nyelel linogok li maliga ma Bibel ndék ni ndék, i ntéak wé ngéda. (1 Pétrô 1:​10-​12) Kiki Bibel i bôk pot, Djob a mboñ le i linogok jés lini, li kônde hol nholok i “ngéda lisuk.”​—Daniel 12:4.

Mahéñha mana ikété linogok jés li maliga, ma nlama bé hélés bés ndi to tééñga mahoñol més. Yak bagwélél ba Nyambe ba bisu ba bé hôs ngim mangéda mukété linogok jap li mam, ba ban-ga ni le ba kodol litehge jap li mam.

• Môsi a bi yéñ yila nkobol nu litén li Israel, 40 ma nwii i bisu bi ntéak ngéda u Nyambe.​—Minson 7:​23-​25, 30, 35.

• Baôma ba bi hôs mukété linogok jap li mbañ inyu nyemb ni bitugne bi Mésia.​—Yésaya 53:​8-​12; Matéô 16:21-​23.

• Ngim bikristen i hiai bisu i bééna litehge li kôdi inyu ngéda malôl ma “ngwa u Nyambe,” Yéhôva.”​—2 Tésalônika 2:​1, 2.

Mbus ngéda nyen Djob a bi kodol matehge map mana, jon yak bés di nsoohe le kônde boñ nlélém inyu yés.​—Yakôbô 1:5.