Baa mut a nla somol, a kal le a ta ha bé Mbôgi Yéhôva?

Ñ. Manjel ma yé ima ma mut a nla gwélél inyu unda le a ntañba le a ta ha bé Mbôgi Yéhôva:

• Nyemede nyen a mbat hala. Ni njel bipôdôl tole ni njel kaat le a ntila, mut a nla kal le a ngwés ha bé ki yiba kiki Mbôgi Yéhôva.

• Ni maboñok mé. Mut a nla bôdôl bana ngim liboñok i i nlama bé lébna ikété lihaa jés jolisôna ikété nkoñ isi. (1 Pétrô 5:9) Kikii hihéga, a nla jôp i base ipe, a gwés ki yén mu.​—1 Yôhanes 2:​19.

Kii i nla bôña ibale mut a nke ha bé i likalô, to i makoda? Baa di nla yoñ nye kikii mut nu le a ntañba le a ta ha bé ki Mbôgi Yéhôva?

To, di mboñ bé hala. Maselna ma yé i pôla tañba tole i bagla ni bés, ni i nimis makénd. Ngim mangéda, bape ba yé ba nwaa bégés Djob ha bé inyule ba nimis hémle yap, ndi inyule ba nimis makénd map. Iloole di bôdôl kôñba bo, di nyéñ manjel inyu nit bo ni hôgbaha bo. (1 Tésalônika 5:​14; Yuda 22) Ibale ngim mut i gwé ngôñ ni mahôla, mimañ mi likoda mi nyoñ bitelbene inyu ti nye mahôla.​—Galatia 6:1; 1 Pétrô 5:​1-3.

Ndi to hala, mimañ mi nyégsa bé mut nye ki nye le a yén ndigi Mbôgi Yéhôva. Hiki mut nyen a mpohol yé base. (Yôsua 24:15) Di nhoñol le i bôt ba ngwélél Djob, ba nlama gwélél nye ni ñem wap wonsôna.​—Tjémbi 110:3; Matéô 22:37.