Inyuki Mbôgi Yéhôva i ntimbhe bé bisoman gwobisôna ba nsoman bo?
Inyuki Mbôgi Yéhôva i ntimbhe bé bisoman gwobisôna ba nsoman bo? Kiki hihéga ngén i Bibel i nkal le: “Nu a niiga mut minjôha nyen a nkôs wonyuu.” (Bingéngén 9:7, 8; 26:4) Ilole di jôp i minkaa mi mi gwé bé nseñ wo ki wo ndik inyu nyônôs ngôñ ini le ba nlama bé soman bés, di mboñ kii yosôna di nla inyu lémél Djob.—Tjémbi 119:69.
Ntiik, ngéda i yé inyu ‘mom nwee ni inyu pot.’ (Ñañal 3:7) Di nkwel ni bôt ba ba gwé toi ngôñ i yi maliga, ndi, di nkeñgle i bet ba nyéñ jomol. Di nôñôl biniigana ni dihéga bi Yésu lôñni bi bikristen bi hiai i bisu.
Yésu a bi ti bé ndimbhe yo ki yo ngéda ba bi soman nye ngi njom bisu bi Pilatô. (Matéô 27:11-14; 1 Pétrô 2:21-23) Nlélém ni hala, Yésu a bi timbhe bé to ngéda ba bi ôm nye nsohi le a yé mut nyoba ni mut a mbéna je. Ndi, a bi nwas le maboñok mé momede mon ma unda njee a bé, inoñnaga ni litiñ lini li li nkal le: “Pék i nkéla le i téé sép ikété minson nwé.” (Matéô 11:19) Ngéda i bé i nene le a timbhe i bet ba bé ôm nye nsohi, a bé a boñ hala ni makénd.—Matéô 15:1-3; Markô 3:22-30.
Yésu a bi niiga banigil bé le ba nwas bañ le bisoman bi yuyui bo tole bi hôyôs makénd map. A kal le: “Bé ni yé nsaibak ngéda bôt ba nyahal bé, ni tééñga bé, ni nye bé ndôn mam mabe yosôna inyu yem.” (Matéô 5:11, 12) Ndi Yésu a bi kônde ki le, bisoman bi, bi bé lama yibil banigil bé njel i bok mbôgi inyu maliga, ha ngéda i nyen a yé le a yônôs mbônga ini le: “M’a ti bé nyo ni pék, ba yé le baoo banan bobasôna b’a la bé kolba to timbhe.”—Lukas 21:12-15.
Nôma Paul a bi béhe bikristen le ba jôp bañ minkaa mi mi gwé bé nseñ lôñni bakolba bo, ngéda a nkal le nya minkaa i, i “mbahal bé jam jo ki jo, [i] yé ki yañga.”—Titô 3:9; Rôma 16:17, 18.
Nôma Pétrô a bi ti Bikristen makénd le ba sôñ hémle yap ngéda pôla i nene. (1 Pétrô 3:15) Ndi a bi yigye bo le, hala a tibil nene ikété maboñok iloo ikété bipôdôl. A bi tila le: “Inyu loñge ni mboñ ni yibi manyo ma ngiyi i bijôñ bi bôt.”—1 Pétrô 2:12-15.