Lelaa Mbôgi Yéhôva i tehe mabos?

Mbôgi Yéhôva i neebe i yom Bibel i nkal inyu libii ni mabos. Djob a bi hek libii ipôla munlôm ni muda, ni ki le li nom i mba ni mba. Bibel i nkal le ndik ndéñg yotama yon i nti mut kunde i bos.​—Matéô 19:​5, 6, 9.

Baa Mbôgi Yéhôva i nhôla babiina ba ba mboma mandutu?

Ñ, ba nhôla bo ni ngandak manjel:

• Bikaat gwés. Bikaat gwés bi gwé biniigana bi mahee inyu libii ni babiina, yak inyu mabii ma ma mboma mandutu. Kiki hihéga, béñge miño mi minkwel mini ni hop Pulasi “Tenir son engagement envers son conjoint?,” “Comment pardonner?,” ni “Comment rétablir la confiance entre conjoints.”

• Makoda. Di nkôs biniigana bi mahee inyu libii ni babiina i makoda més, yak i makoda més makeñi.

• Mimañ. Mimañ mi makoda mi nti babiina ba ba mboma mandutu mahôla ni njel matiñ ma Bibel kiki bo ma ma mpémél i kaat Éfésô 5:​22-​25.

Baa mimañ mi likoda mi nlama nit Mbôgi Yéhôva i i nyéñ bos?

To. To ibale mimañ mi nla ti babiina ba ba mboma mandutu maéba, ba gwé bé kunde yo ki yo i kal bo kii ba nlama boñ (Galatia 6:5) Ndi, mut nu a mpohol i bos ibabé le sobiina wé a nke ndéñg a ta bé kunde i tiimba biiba.​—1 Timôtéô 3:​1, 5, 12.

Lelaa Mbôgi Yéhôva i ntehe mbagla libii?

Bibel i nti babiina makénd i niñ ntôñ to ibale ba mboma mandutu. (1 Korintô 7:​10-​16) Ngéda babiina ba nsoohe ntôñ, ba biyak matiñ ma Bibel i bisélél, ba tôñnaga wada ni nuu, ngandak mindañ i nla sañgla.​—1 Korintô 13:​4-8; Galatia 5:​22.

Ndi to hala, ngim bikristen i yé i neebe i bos ibale ba mboma ngim mandutu i tôbôtôbô kiki bo:

• Sobiina wé a ntééda bé nye loñge.​—1 Timôtéô 5:8.

• Sobiina wé a yé mut njôô.​—Tjémbi 11:5.

• Sobiina wé a ngwés bé le a sélél Yéhôva. Kiki hihéga, a nyégsa nye i bôk mbén Djob. I njom i, i nla boñ le kristen i kit le i mbagla ni sobiina wé inyu nôgôl mbén Djob, i i nkal le: “Di nlama nôgôl Nyambe kiki ñane iloo bôt.”​—Minson mi Baôma 5:​29.