“Gwéha yem inyu Yéhôva i bi nit me”

Ndi kii i bi tinde me, mut a bé nit loñ, i hémle base i bôt ba ntehe kiki base i ba ba nkolba loñ? Lelaa gwéha i Yéhôva ni yigil bi bi hôla me i héñha libak jem mu nwii me tégbaha i ñamb nson ngéba ni i minkôm?

Nyiña u telepsép ni nsañ u mahoñol

Me bi gwé i nwii 1930, i Tabani, nkoñ u u bé i ñombok u Moldôva. Bagwal bem ba bé sal ni ngui i yum ni bôt bape inyu ep bon bap basamal i suklu. Di bééna bé bañga jam inyu niñ. Mma yem a bé i base Orthodox i Rusland, pua yem nye a bé i base lôk para. Ba bé béna pôdôl bilem bibe bi bipada bi bi bé suñgaha ñem.

I ngéda me bi mal suklu i 18 nwii, me bi jôp i nlôñ u njohok boñge u u bé niiga bés i gwés loñ le, Komsomol. U bééna njômbi i kôôba bet ba bé mu, le ba ba bôt ba ngwés loñ. Ba bi pohol me kikii mut matila nu libôga jem. Bilem kikii bo gwéha i linyañ, bôt ba kôli, ni telepsép bi bé lémél me, ndi i ngéda me bi tehe ngitelepsép ni makala pati bi bé homa nyeñsô, hala a tômbôs me.

Kii me bé wada mu ikété Komsomol, me bé lama ndik nihbe bioda bi ngomin i Union Sôviétiquea bi bi bé bo; i kwés mandap ma bibase, ba sôñga ki le bôt ba kodba. Mbôgi Yéhôva i bé mu libôga jés. Tolakii me bi yimbe libak jap li maliga ni le ba yé bôt ba nsañ, me bé yoñ bo kikii minyômôk mi bôt. Me bé hégda bé to le bon ba ga timbhe libim li mambadga me bé badba.

Nyandôm wem le Dimtriy, nu a bé yééne mu i nlélém libôga ni me, a bé Mbôgi Yéhôva. Kel yada, i nwii 1952, a bat me le: “A Georgiy, kii u gwé ngôñ i boñ ni niñ yoñ?” Nyetama nyen a bé tôñ me kayéle, a bat me mbadga i. Maliga ma yé le, me bééna ngandak mambadga mahoñol. Kikii héga, me bé badba le: ‘Ibale Djob a yé, inyuki a neebe le mandutu ma kwél bés?’ I dilo juem di bé noñ ha, Dimitriy a bi timbhe mambadga mem ni njel Bibel. Ngim mangéda, di bé di kwel inyu Djob letee ni ngeñ aa maye ma kel.

I mbus minkwel mi, me bi yoñ makidik i nigil Bibel bañga bañga. Ha nyen me bi nok le ngo me gwé Tata nu a ngwés toi me. (Tjémbi 27:10) Tolakii me bé yi bé bitilna bañga, gwéha yem inyu Yéhôva i bééna ngui, i bi hôla me i yoñ makidik ma ngui. Me bi nyodi mu nlôñ m’bô me bé, to hala kiki i nwet a bé éga wo mu libôga jés a bé kôhna me woñi. I sôñ Dipos i nwii 1952, sôñ ina ndigi le me bi bôdôl nigil Bibel, me ti memede nkikip yak Yéhôva, me sôblana.

Gwéha yem inyu Yéhôva i bi wéna

I mbus ngéda, ba bi sôñga nson u Mbôgi Yéhôva. To hala, me bé sômbôl unda gwéha yem inyu Yéhôva ni njel bibôñôl. Kel yada, me bi ke i ti lôk kéé i bé niñ mu mabôga ma bé ha bikaat. Hala a bé wee me bé tuk ni hié, inyule bôt ba bé le ba soman me yak ngomin. Yak lôk kéé i bé kon me woñi le me bé le me ba wada ikété bisônda bi mbep bi loñ, ba ba bé ba jôp likoda. Ndi ba bi sôk léba le me ta bé mut mbep. Sôñ iba i mbus sôble yem ba gwel me, ba kéés me, me kwo ki nkaa inyule me bééna bikaat ba bi sôñga.

Mu kikii me bé i mok inyu ngim nwii, ba bi bat me mambadga kayéle bisônda bi nyéñ yak tinde me le me tjôô hémle yem. Ndi tohala me bi noode kéñbaha gwéha yem inyu Yéhôva Djob. Sôk i nsôk nkaa wem u bi tagbe i ndap bikééhene i bé i tison Odessa i Ukraine. Bagwal Bem ni lôk kéé yem ba ba bé bé Mbôgi Yéhôva i ngéda i, yak bo ba bi sébél bo mu minkaa mi.

Ba bi kéés me inyule bo, me bé mut le ba nkwés nkaa le a jôp i béba nlôñ tole nlôñ u mintonba. Ngomin a bé sômbôl le bagwal bem ni lôk kéé i nhoñol le boña a nyôm me. Bagwal bem ba bi kon woñi. Ba bi kal me ba eek le: ‘Me pam mu ntôñ u’. Ndi me mom nwee. Me kal mma yem le: “Ni ntôñ bañ. Me nimil bé. Me nléba i jam me bé yéñ ibôdôl behee , kekikel me ga somol bé.” (Bingéngén 23:23) Me bééna bé bañga yi i Bibel, ndi me bé yi ngandak mam inyu Yéhôva, jon me bi téñbe ni nye. I mbus nwii minsamal, bagwal bem ba kahal gwés biniigana me bé hémle, yak bo ba sôk yila Mbôgi Yéhôva.

Ba bi bagal nkaa le m’a kee i bôlô mbanda 15 nwii, ba bi kena me ni mashin i nkoñ u Kôlima, u u bé i ñem u soso ñamb nson ngéba i Sibéria. Inyu tibil bémbe bôt ba mok, batat ba bé ba bép bés ba yis ki bés njal. Bibôdle me bé badba too m’a pei.

Yéhôva a yoñ ndun ni me a uñgus ki me

Ndék ngéda i mbus malo mem, i 34 ba Mbôgi Yéhôva me bi koba mu mok i bat me le: “Baa Jônadab i yé mu ni we?” Kunda yada, me yi le lôk kéé yem i mbuu i. Botama bon ba bé le ba gwélél i nya buk i! Minhôôlak mi lôk kéé i, i bi niiga ndik bé me lelaa me nlama bii matiñ ma Bibel i bisésél i ngéda manoodana, ndi ba hôla ki me i hôlôs bilem bi mbuu kikii, bo yi bagal mam.

Mu ñamb me bé sal i mashin. Kel yada, solôñ bôlô wem wada le Matphey a kal ni ngôk le a nyi môl ma 50 bapubhaga ni ñem. Me bi noode bep kodol nye mu, Matphey a yéñ le a ôm me kut, ndi me bi ke ngwéé. I mbus ngéda, me tehe lôk kéé i nol hiol, hala a tééñga me. Me bat bo le: “Kii i nôlha bé? Me sômblak tééne nye likalô!” Ba hôñlaha me ni liyômba le, bôlô yés i yé le di tjam ñañ nlam he bé le di unbaha bôt. ( 1 Pétrô 3:15) Matphey a bé mut a ngwés mam ma mbô, hala a bé hélés nye i tehe lelaa Mbôgi Yéhôva i bé ti batat ni bangomin lipém. I mbus ha a bi bôdôl emble ñañ nlam. M’a hôya bé me lelaa a bi sôblana i nditi i u u, ikété pôndi i i bééna malép ma bé sune.

Ndék ngéda i mbus malo més mu ñamb u, ba bi naña me ni njohok lôk kéé iba i ke i ngim boma inyu pôdôl mam ma mbô. Bisu bi ngéda di bi tjél ke mu i boma i. Di bé hoñol le i ke mu i mbôk mbén Djob. (Yôhanes 17:18) Inyu kogse bés, ba bi leñ bés i ndap mok i bééna bé mapubi sonde iba. I ngéda ba bi pémés bés mu, lôk kéé i gwéha i toñle bés le, di ga bôk bé mbén Djob ndik inyule di nke mu boma i. Iloo ki hala, ipôla i di bééna inyu ti loñge mbôgi. I lôk kéé i i bi hôla bés i kônde bana pék ni i waa ba ndéñ ndéñ.

Wongut yap i bé unda toi le Yéhôva a nyoñ ndun ni me. Kikii héga, mut mok wada nu a bé pada, ba bi téé nye kii nwet basoñgol moni. Hiki ngéda, di bé bomna i ke je kosi, a bé yéga me, a kalak le: “Me nyéga, a man Nsohop!” Solôñ I ndap mok yada i kal me le yak me nlama timbhe nye le: “Me nyéga a Ta!” Yak me, me nôgôl yaa nye me bak maséé, ndi hala a bi boñ le ba bép me ndôm tôlô. I ngéda lôk kéé i bi nok i jam li bi tagbe, ba hôla me i nok le me lamgak bé boñ hala. (Bingéngén 29:11) Me bi ke me bat i pada i nwéhél.

Ilole ba bé ep me i ñamb nson ngéba, me bé ke makoda bisôsôli ni juu tole tutu kegla. Ndi, homa a bé bé nyoo inyu solop. Jon, hiki kel di bé di telep bitétéé i ti i bisônda, inyu pôdôl ngim minlôñ mi Bibel di bi tila ni moo bisu bi ngéda i bon ba mapep. Njômbi yés i bé le di tééda ngandak minlôñ kikii la yés inyu bigda mo hiki ngéda. I ngéda sônda i bé i lo, di bé di pala mil mapep més.

Ba bi kena me i minkôm haa, ndi haa ni gwéha Nyambe bé

I mbus le ba bi pémés me mu ñamb u i nwii 1959, ba bi kena me i Karaganda i Kazakhstan. Tolakii ba bé ngi was me, me bi bat ngomin kunde inyu môm ima ma dilo inyu ke i biiba. Me bi ke i nkoñ Tomsk i Rusland, i het me bi boma sita yada le Maria i i bé liyômba a gwéhék Yéhôva ngandak. Kikii me bééna lem i boñ, me bi bat nye kunda yada le : “A Maria, me gwé bé ngéda inyu béñge we. Biiba ni me!” A bi neebe, di bi tégbaha loñge man ngand. Maria a bi tehe le me tégbaha mandutu ngandak, a bé sômbôl ndik hôla me i ke ni bisu i gwélél Yéhôva. (Bingéngén 19:14).

I nwii 1960, di bé bé le di téé likalô li mandap ni mandap, ndi di bé di gwélél manjel momasôna inyu tjam ñañ nlam i mpaba. Ngéda ba bé ba naña bés homa, tole di nke noi, di bé di añle bôt botñem yés i niñ i boga ni boga hana isi. Di bé di suu bôt minkwel. Kikii héga, di bé di yuuga mandap ma ba bé nuñul, i ngéda di bé yuuga ni bet mandap di bé kwelés bo mam ma mbuu. Hala nyen me ni Maria di bi bôdôl nigil ni bôt basamal ba ba bi sôk ba yila Mbôgi Yéhôva.

Ngim mangéda, di bé di bok mbôgi i ngéda vote. Kel yada, bisônda bi bi yéñ yi mam bisôsôli bi bi lo i homa di bé sélél. Me bé sal nyoo lôñni ndék lôk kéé. I bisu yom kiki bo 1000 solôñ yés i bôlô, ba bat bés inyuki Mbôgi Yéhôva i nyoñ bé ngaba i mam ma mbô. Kiñe yés ni bôt ba bôlô bape ba sôñ bés. Ba kal bisônda le di mboñ bé mpuñgu ni le di ntuk bé ni bôlô yés. Hop wap u bi ti bés ñem ngui i toñol libak jés, di simgak minlôñ mi Bibel di bi tééda i boña. Mbôgi yés i bi boñ le solôñ yés i bôlô ina ba emble ñañ nlam ba sôblana ki, hala a bi boñ bé to nwii wada.

Bibôdle bi nwii 1970, ngandak bôt i bi yila Mbôgi Yéhôva i Kazakhstan. kayéle di bana ngôñ i tégbaha likoda jés likeñi li bisu. Ndi, lelaa di bé le di tégbaha jo ibabé le ngomin a yi? Di bi yoñ makidik i tégbaha jo nlélém kel ni libii jada ha i mbai i bé bebee ni tison i Almaty. Boma yés i bé bañga ngand libii ni likoda, iloo 300 bôt ba bi lo libii! Nwaa wem ni ndék bisita ba bi sal ni ngui inyu eñg homa nu ni lamb ndék bijek bilam. Bakén ba bôt ba bi bégés téntén biniigana bi Bibel bi bi bi tina ni njel iloo jôm li bôt. I kel i ngélé bisu i niñ yem, me bi ti nkwel i mbamba i bisu bi ngandak bôt.

Gwéha Djob i bi nit me ikété mandutu momasôna

Nwaa wem nu gwéha le Maria, a bi ba me soso nhôla niñ yem yosô. A bak nwee ni suhulnyuu, a biyak yéñe i Ane kii jam li bisu i niñ yé. To hala kii a bééna ngui, kunda yada a kahal kon bihés, u kon u u bi niñ nye iloo 16 nwii. Ni ngôô yosôna ngond yés Lyudmila a bi hôla me i yoñ ndun ni nye letee ni nyemb yé i nwii 2014.

I ngéda Maria a bé nok njôghe i kon, hala a bé a wéés me. To hala, letee ni hilo hié hi nsôk, di bé añ Bibel ni minkwel mi nlédhana lôñ. Di bé béna pôdôl mbok yondo ntôñ. Ha ngéda i me bé me ee si ni si ipañ yé. Ndi hiki ngéda di bé di añ yom i mpôdôl mimbônga mi Yéhôva, hala a bé a mômôs bés nwee, hôla ki bés i hônba. _ Tjémbi 37:18; 41:4.

Ibôdôl hilo bisu me bi nôgda gwéha Djob, me nôgda le a nit me hiki ngéda a yoñok ndun ni me. (Tjémbi 34:20) i ngéda me bé njohok mañge, ngi pék, me bi nôgda gwéha yé ni njel bôt ba bi hôla me ni wongut i héñha libak jem. I ngéda me bé boma mandutu i ñamb nson ngéba i ngéda me bé minkôm, me nôgda le ni lipôdôl jé, Yéhôva a bi nit me. Yéhôva a bi ti ki me ngui i yoñ ndun ni nwaa wem nugwéha le Maria, letee ni nyemb yé. I len ini me nla kal i ntiik le, gwéha Yéhôva i nit me niñ yem yosôna.