2. Baa bés bon di yé njom i mandutu més?

Inyuki bôt ba mbat mbadga i?

Ibale ndimbhe i yé le ñ, wee hiki wada wés a nla suhus mandutu mé.

Letee ni limbe likala di nla kal le bôt ba binam ba yé njom i mandutu mana?

I ôbôs boñge.

Organisation mondiale de la santé i nkal le ipôla minhôôlak mi bôt ba-na, ba bi ôbôs wada ngéda a bé mange. Ba bi nyégsa muda wada ikété baa i malal tole ba bi bép nye.
Manola.

Ñañga wada u Organisation mondiale de la santé ba nsébél le the World Health Statistics 2018, u nkal le “i nwii 2016, ba bi nol 477 000 bôt.” Mu nsoñgi u, di nkônde 180 000 bôt ba ba bi nol i gwét mu nwii u.
Makon.

Mu manwin ma mpam i National Geographic, Fran Smith a ntila le: “Iloo milliard u bôt wada u ñôt siga. Ndi siga i nlona makon ma ma nola kiki bo: makon ma ñem, AVC, makon ma bisaha, ni pos.”
Liyep.

Mut njoñ yi wada nu ba nsébél le Jay Watts a ntoñol le: “Liyep, mbagla ipôla mingwañ mi bôt ni diyeyeba, mbagla ipôla bôlôm ni bôda, mbagla inyule bôt ba gwé bé nlélém kôkôô nyuu, bôt ba ba nyodi i ngim bahoma inyu ke i bahoma bape, ni pémsan bi nkônde kéñbaha mandutu.”

INYU KÔHNA BINIIGANA BIPE

Béñge vidéô i gwé ño le Inyuki Djob a bi hek hisi? i jw.org.

Bôt ba binam bon ba yé njom i mandutu map.

Ngandak baane i ntét i bet ba yé isi ane yap, jon mandutu ma nkônde ndigi bet, bet ni bet.

“Mut wada a ntét numpe i boñ nye béba.”—ÑAÑAL 8:9.

Mandutu ma bôt ba binam ma nla sôs.

Ikété Bibel, di nléba matiñ ma ma nhôla bés i ba mbôô ni i niñ ikété nsañ ni bôt bape.

“Ñem nwee u yé niñ minsôn, ndi njôñ i mbôlôs bihés.”—BINGÉNGÉN 14:30.

“Ni héya mintén mi lôlha ñem nwominsôna ikété nan, ni hiun, ni nyayak, ni nlondok, ni bisol, lôñni béba ñem yosôna.”—ÉFÉSÔ 4:31.