Yibil mis

Hee ndutu i nla lôl

Libim li ngéda, di ntodol bôt inyule di nyi bé bo loñge. Béñge le dihéga di noñ ha:

• Ngandak bôt i nhoñol le bôda ba nla bé sal bibôlô het i mbéda ngui minsôn tole ngandak yi.

• I ngéda kôba i Érôpa, ba bi ôm Lôk Yuda nsohi le bon ba nha mbôñ ikété bibee bi malép ni le ba ntjam makon. I ngéda Nazi i bé énél i loñ Jaman, ba bi tiimba ôm Lôk Yuda nsohi, ba kal le bon ba nlona liyep i loñ. Minsohi mi nwo ima ba bi ôm Lôk Yuda mi bi boñ le bôt ba bôdôl todol bo ngandak; yak i len ini, ngim bôt i ngi todlak bo.

• Bôt bape ba nhoñol le ibale mut a yé ndim tole ndok, tole a yé bôk, wee mut nu a ta bé maséé tole a gwé béba ñem.

I bôt ba nhémle mintén mi miñañ mini, ba yé ba yoñ dihéga inyu éba le ba kôli hoñol yom ba nhoñol. I bôt ba, ba nhoñol ki le ibale mut numpe a nhémle bé miñañ nwap, wee i mut nu nyen a yé ndim.

Maéba ma Bibel

“Le mut a yén ngi yi, hala a ta bé loñge.”​—BINGÉNGÉN 19:2.

Kii hala a nkobla? Ibale di nyi bé maliga inyu ngim jam, d’a yoñ makidik mabe. Ibale di nhémle miñañ bôt bape ba ñañle bés, ilole di hémle maliga, d’a todol bôt.

Inyuki i yé loñge i yi maliga?

Ibale di mboñ biliya i yi bôt, d’a hémle bé mam momasôna bôt bape ba nkal inyu yap. I kel d’a yi le i mam momasôna ba bi añle bés inyu ngim litén ma ta bé maliga, bebek ha nyen bésbomede di mbôdôl badba le baa i mam momasôna me bi añal inyu matén mape, ma bé maliga?

Kii u nla boñ

• Bôt ba nla kal we le ngim litén i gwé bilem bibe. Ndi hôya bañ le bôt bobasôna ba litén li ba ta bé hala.

• Yi le u nyi bé mam momasôna inyu bôt.

• Yéñ maliga i loñge homa.