Niñ i nsañ i kédé hisi hi yondo
I ngéda u mbénge i titii iyé munu lini lipep, mambe mahoñol ma nlôl we? Ba ñem woñ u nyon bé ni ngôn nsañ, ni masoda ni longe niñ bi binene mu? Ntiig. Ba u hemle le hisi higa ba hala kel yada? Le hala a tabe ya eem?
Ngandag bôt i nhoñol hala. Niñ yés i len iyé ndigi ni gwét, ni njal, makon, biun, d’a tôb mo i sôg hee ... Ndi di kôli i bana bôdñem. Bibel i nkal le “ngéda i nkee lo, ki ngéda likak [li Djob], bés di mbem ngi yondo ni hisi yondo, mu nyen telep sép i nyééne.”—2 Pétrô 3:13; Yésaya 65:17.
Ini “ngi yondo” ni hini “hisi yondo” Bibel i mpôdôl bi ta bé ini ngi to hini hisi di ntehe; ini ngi di ntehe to hini hisi di yiine, Djob a mal heg gwo longe; Bibel i éba bés le bi ga ba boga ni boga. (Tjémbi 89:36,37; 104:5). “Hisi hi yondo” higa ba ntôñ bôt ba té sép ba baga niñ hana isi, “ngi yondo” ki y’a ba longe ane i nlôl ngii, i y’a ba i ñane hisi ni i bôt baga ba mu. Ba i nla toy boña le “hisi yondo” ni ngi yondo i lipém bi ba?
U nlama yi le mana masoda ma ba ikédé bitééne bi Djob leteni i bibéé bi isi. A yoñ muda nu bisu ni munlom nu bisu a yis bo i Paradis i Eden, ni nye a ti bo i oda ini le: “Gwala, ni bôl, ni yônôs hisi ni suhus ki hio.” (Bibôdle 1:28). ñ bitééne bi Djob bi ba le ba gwal ni le ba keñbaha paradis yap le i yon ni hisi hiosôna. To hala kii i mbus ngéda ba teb le ba ntjél nôgôl Djob, ni hala ba éba le ba koli bé ni niñ boga, bitééne bi Djob bi bisu bi héñha bé. Biga yônôl hisi hi yondo!—Yésaya 55:11.
I ngéda un soohe kii nwet abi niiga le “a Tada wés nu a yé ngi”, u kalag le Ane Djob i loo, un soohe le ane yé i i nlôl ngi i héya béba munu isi, ni ki le i énél hisi hi yondo. (Matéo 6:9, 10). Di nlama botñem le Djob a neebe mana masohe, kii banga yé i mbôn le: “Bôt ba téé sép b’a kôdôl hisi, b’a yén ki mu boga ni boga.”—Hiémbi 37:29.
Niñ ikede hisi yondo hi Djob
Ane i Djob iga lona mam malam ma nlo ihega hana isi, ni yônôs bilonge bi mam gwobisôna Djob a bôg kôôba ibôdôl behe inyu boñ le bôt bé ba niñ longe isi. Ôa ni mahoñol mabe b’a mal, hi mut a yila ntiig liwanda u himut nu mpe. I kédé Bibel Djob a mbôn le a mélés ‘gwét le tee ni lisuk li isi.’ “Loñ ya mangle ha bé loñ ipe pansoñ, to jôp yigil gwét.”—Hiémbi 46:9,10; Yésaya 2:4.
Hisi hiosô higa yila kiki paradis. Bibel i nkal le: “Ñoñ ni biték binumnga gwa séé, mbamba mbok w’a hak, u too ki wengoñle lilañ ... I nyule i ñoñ nyen malep ma kubne, yak bihundul i mbamba mbok. Numheñ mbok ki ya yila titimba, yak biték binumnga bi yila mangen ma malép.”—Yésaya 35:1, 6, 7.
Hi ki jam liga ti bôt mahak i kédé Paradis. Mut aga wo habé, to njal kel ki kel. Bibel i nkal le: “Hisi higa ha bijek gwé.” (Hiémbi 67:6; 72:16). Hi mut a kôhna nseñ u nson u mo mé ma nsal. Nheg wes a mbôn le: “B’a bel mwom mi minkôô mi wai, ba je ki matam map. ... Ba bel be mwom le bôt bape bon ba je mwo.”—Yésaya 65:21, 22.
I kédé hisi hi yondo hi Djob, bôt baga ba habé ba pagap i kéké dindandaba to yéne i kédé bi pugul bi mandap, inyule Djob abi téé le: “B’a oñ mandap, b’a yén ki mu...ba oñ be mandap le bôt bape ba yén mu.” Bibel i nkônde ki unu mbônga le: “B’a kéba bé ni nson mbelek.” (Yésaya 65:21-23). Nihala nyen hikiki mut a bana nson u num matam u kônhaga ki masé. Niñ ya babé i ngepba.
I mbus ngéda, Ane Djob iga timbis nsañ u ba bisu bi ngéda i wom Eden i pôla binuga ni i pôla bôt ni binuga. Bibel i nkal le: “Ngwo-njéé ya yén ni man ntômba, njéé ki ya nañal homa wada ni man bép kembee; yak onk nyaga ni onk mbondo ni lém mahoñ pôdna pôdna, ndi ndék mange y’a ba éga gwo.”—Yésaya 11:6-9; Hôséa 2:18.
Hoñol ki! mu i kédé Paradis, makon momasô maga mélhana, bibôk gwobisô bi temb mbôô; Banga i Djob i kal bés le: “Mut nye ki nye a nyééne mu nkoñ u a kal bé le, me nkon.” (Yésaya 33:24). “[Djob] a ntos gwiiha gwobisôna i mis map; nyemb y’a ba habé, to malep, to nlondok, to njiiha ki, b’a ba habé, inyule mam mabisu ma mal tagbe.”—Masoola 21:4.
Lelaa unla boñ le u kos mana masoda
Ni mbale hala a ntihba ñem woñ i yi bilonge bi mam Ane Djob i telep sép y’a lona. I ngéda bôt bape ba hoñol le i mam mana ma nla bé bôña hala inyule ma mpéé ba malam, ba nlama yi le yom i mboum bé Nheg wés nu gwéha nu a mbôn le hala a bôña. — Hiémbi 145:16; Mika 4:4.
Mam mayé ma mut a nlama boñ ibale a nsômbôl niñ boga ni boga i Paradis hana isi. Yésu a éba jam li liyé nseñ i boñ i ngéda a ba sohe Djob le: “Niñ boga i nkobla le ba yi we banga mpom Djob, ni nu u om le Yésus Kristô.”—Yôhanes 17:3.
I nyu hala, i bale di ngwés toy le di niñ i kédé mbog yondo i Djob, di nlama ndugi nigil i yi sômbôl i Djob ni bôñôl yo. I nyule le: “Nkoñ isi u ntagbe, yak minheña mwé. Ndi, i mut a mboñ sômbôl Djob nyen a niñ boga ni boga,” a kôhna ki bisai bi Nheg wes nu gwéha a kôb i ngii yés boga ni boga.—1 Yohanes 2:17.
Bipes bi Bibel gwobiso bi mpémél Bitilna bi Pubi Ngobol isi Yondo