Yigil 2

Njee a yé Djob?

Njee a yé bañga Djob, jôl jé le njee? (1, 2)

U mbe ntén nyu a gwé? (3)

Mbôm yé bilem yon i yé le kii? (4)

Ba di nlama gwélél biôñgba ni bisat inyu bégés Djob? (5)

Mambe manjel ma di nla yil Djob? (6)

1. Bôt ba mbégés ngandak gwom. Ndi Bibel i niiga bés le BANGA Djob a yé ndik wada. Nyen a bi heg mam momasô i ngii ni isi. Kii nyen a bi ti bés niñ, Nyetama nyen di nlama bégés.—1 Korintô 8:5, 6; Masoola 4:11.

2. Djob a gwé ngandak mangédi, ndi a gwé ndik jôl jada. I jôl li jon li yé le YÉHÔVA. Ikété ngandak Bibel, ba bi héya jôl li Djob, ba héñha jo ni mangédi mé kii bo NWET tole DJOB. Ndi i ngéda Bibel i tilbana, lini jôl le Yéhôva li bé mu jam kii bo 7 000 ngélé!—Manyodi 3:15; Tjémbi 83:18.

3. Yéhôva a gwé nyu, ndi nyu yé i ta bé kii manyu més. Bibel i nkal bés le “Djob a yé mbuu.” (Yôhanes 4:24). Mbuu u yé ngim ntén niñ i gwé ngui ngandak i loo biniñ gwés. Mut nye kii nye a ntehge bé Djob. Yéhôva a niñil i ngii, ndi a nla tehe gwom gwobisô. (Tjémbi 11:4, 5; Yôhanes 1:18) Ndi kii i yé ni mbuu mpubi? U ta bé mut kii Djob. Yom u yé ngui i Djob a mbôñôl mam.—Tjémbi 104:30.

4. Bibel i nsoolene bés libag li Djob. I ñéba bés le bilem gwé bi bi nlôôha nene bi yé gwéha, telepsép, pék, ni lipémba. (Ndiimba Mbén 32:4; Hiôb 12:13; Yésaya 40:26; 1 Yôhanes 4:8) Bibel i nkal ki bés le Djob a yé konangoo, a gwé loñge ñem, a nyégi i nwéhél, a yé likap, ni hônba. Bés, kii bon bé ba manôgla, di nlama noode le di nigle nye.—Efésô 5:1, 2.

5. Ba di nlama ôôp bisu bi biôñgba, to bititii, to bisat inyu bégés gwo to soohe gwo? To! (Manyodi 20:4, 5) Yéhôva a nkal le nyetama nyen di nlama bégés. A ga kabna bé lipém jé ni mut numpe to ni yom ipe yo kii yo. Biôñgba bi gwé bé ngui i hôla bés.—Tjémbi 115:4-8; Yésaya 42:8.

6. Lelaa di nla tibil nigil i yi Djob? Njel yada i yé le di nla nun i gwom a bi heg le di yimbe mam bi nkal bés. Bihégél bi Djob bi ñéba le a gwéé ngandak lipémba ni pék. Di ntehe gwéha yé ikété hikii yom a bi heg. (Tjémbi 19:1-6; Rôma 1:20) Njel i pe di nla yil Djob i yé ni yigil i Bibel. Mu i Bibel nyen a ntibil kal bés u mbe ntén Djob a yé. Mu ki nyen a nkélél bés mam inyu bitééne gwé ni kii a ngwés le di boñ.—Amôs 3:7; 2 Timôtéô 3:16, 17.

[Bititii i mapep 5]

Di nigil i yi Djob ni jel bihégél gwé, ni njel Bibel